1 Poa djiwid̶id̶e dji nabema jed̶ecod̶e israelerãra Cadé abadama jũẽne wãsid̶aa.* Ebud̶a b̶ʌẽ́a sãʌ̃gʌ poa djiwid̶ida jara b̶ʌa. Zocãrãmaarã naʌ̃ capítulod̶e b̶ʌ́ b̶ʌa israelerãra cuarenta poa ẽjũã põãsa ewaraga b̶ʌd̶e pʌrrʌaped̶ad̶acarea mãwãnada. Maʌ̃ Cadéra Ziʌ̃ ẽjũã põãsa ewaraga b̶ʌd̶e b̶ʌa. Mama Moise djabawẽrã Mariara jaid̶aped̶a tʌb̶arisid̶aa.

2 Mama baido dod̶i carea neẽ́ basía. Maʌ̃ bẽrã purura Moisemaa, Aaroʌ̃maa bid̶a wãsid̶aa biẽ́ jarad̶i carea. 3 Quĩrũbid̶eba Moisea nãwã jarasid̶aa:

–¡Ãcõrẽba dai djabarã quinibisid̶e dairã sid̶a quiniped̶ad̶abara biara b̶acasia!† Numero 16:23-33. 4 ¿Bãrãba cãrẽ cãrẽã dairã, Ãcõrẽ purura naʌ̃ ẽjũã põãsa ewaraga b̶ʌd̶aa enesid̶aa? ¿Dairãra dai animarã sid̶a nama beud̶amãrẽã enesid̶aca? 5 ¿Cãrẽ cãrẽã Egiptod̶eba naʌ̃ ẽjũã biẽ́ tab̶ʌd̶aa enesid̶a? ¡Nama poya ne ucara tab̶ʌa! ¡Higojõda, uvada, granadajõ sid̶a neẽ́ tab̶ʌa! ¡Baido sid̶a neẽ́ tab̶ʌa!–

6 Ara maʌ̃da Moisera Aaroʌ̃ sid̶a israelerã duanʌmaʌba Ãcõrẽ wua ded̶e ed̶a wãbada caita wãnaped̶a chĩrãborod̶e b̶arru copanesid̶aa Ãcõrẽa iwid̶id̶i carea. Maʌ̃ne Ãcõrẽ quĩrãwãrẽã dorrodorroada ãdji quĩrãpita ʌ̃naga dogosia. 7 Ãcõrẽba Moisea jarasia:

8 –Bʌ bacuruda edaped̶a bʌ djaba Aaroʌ̃ ume purura eded̶adua awuá mõgara waib̶ʌa b̶ʌmaa. Ãdjirã quĩrãpita maʌ̃ mõgaraa bed̶eadua baidoda weamãrẽã. Ara mãwã bed̶eabʌrʌd̶e baidora mõgarad̶eba wea dogoya. Mãwã bʌa baidora weabiya israelerãba ãdji animarã bid̶a dod̶amãrẽã.–

9 Ara maʌ̃da Moiseba idji bacurura Ãcõrẽ wua ded̶e b̶ʌda edasia Ãcõrẽba jarad̶a quĩrãca. 10 Idjia Aaroʌ̃ ume purura ãbaa jʌresid̶aa Ãcõrẽba jarad̶a mõgara quĩrãpe. Maʌ̃ne Moiseba israelerãa jarasia:

–¡Bãrã cʌwʌrʌ zarea b̶ea, ũrĩnadua! ¿Bãrãba ĩjãnamãrẽã daiba bãrã itea baidoda naʌ̃ mõgarad̶eba weabid̶ida panʌca?–

11 Mãwã jaraped̶a Moiseba idji bacurura ʌ̃taa waped̶a mõgarad̶aa b̶arima umé usía. Ara maʌ̃da baidora wea dogoped̶a israelerãba ãdji animarã bid̶a dosid̶aa.

12 Mãwãnacarea Ãcõrẽba Moisea Aaroʌ̃a bid̶a nãwã jarasia:

–Mʌ̃ ĩjãnaẽ́ panʌneba bãrãba israelerã quĩrãpita cawabid̶aẽ́ basía mʌ̃ra wãrãda Ãcõrẽda. Maʌ̃ bẽrã bãrãra naʌ̃ puru ume jũẽne wãnaẽ́a mʌ̃a diai jarad̶a druad̶aa.–

13 Maʌ̃ baido weabid̶ama trʌ̃ b̶ʌsid̶aa Meribá, israelerãra baido carea quĩrũbid̶eba Ãcõrẽ quĩrãpita biẽ́ bed̶eaped̶ad̶a bẽrã.‡ Hebreo bed̶ead̶e Meribá trʌ̃ba jara b̶ʌa “quĩrũbid̶eba biẽ́ bed̶ead̶i” wa “caicayad̶i.” Maʌ̃ baido weabi b̶ʌd̶eba Ãcõrẽba ãdjirãa cawabisia idjira wãrãda Ãcõrẽda.

14 Cadé abadad̶eba Moiseba ʌ̃cʌrʌ ẽberãrãda Edoʌ̃nebema boromaa nãwã jarad̶e diabuesia:

–Dai israelerãra bãrã djabarãa.§ Israelerãra Jacobod̶eba yõsid̶aa. Edoʌ̃nebemarãra Jacobo djaba Esaúd̶eba yõsid̶aa. Genesi 36:6-8. Maʌ̃ bẽrã dairãra bʌ ume bed̶ead̶e ze panʌa. Bʌa bio cawa b̶ʌa dairã bia mĩga panʌnebemada. 15 Dairã drõã naẽnabemara Egiptod̶aa wãnaped̶a mama dãrã panasid̶aa. Maʌ̃ne egiptorãba ãdjirãra, dairã sid̶a biẽ́ o eropanasid̶aa. 16 Maʌ̃ carea Ãcõrẽa quĩrã djuburiada iwid̶isid̶aa. Maʌ̃ra Ãcõrẽba ũrĩped̶a idji nezoca bajãnebemada ab̶a diabuesia dairã Egiptod̶eba ẽdrʌ enemãrẽã. Id̶ira bʌ drua caita Cadé abadad̶e panʌa. 17 Dai quĩrã djuburia, bʌ druad̶e idu wãyã wãbidua. Bãrã néud̶e ed̶a wãnaẽ́a, bãrã uva ẽjũãne ed̶a wãnaẽ́a, ni bãrã baido juebada uriad̶ebemada dod̶aẽ́a. Ẽberãrã Boro abada od̶e quĩrãipa wãnia. Bʌ druad̶e panʌne maʌ̃ od̶ebemada jʌwa araare ni jʌwa acʌare bid̶a ãyã wãnaẽ́a.–

18 Baribʌrʌ Edoʌ̃nebema boroba panusia:

–Bãrãra mʌ̃ druad̶e wãnacara panʌa. Maʌ̃da ĩjãnaẽ́bʌrʌ dairãra bãrãmaa djõne wãnia.–

19 Dji iwid̶id̶e wã panʌba jarasid̶aa:

–Wãrãda quĩrãipa od̶e wãnia. Maʌ̃ne dairãba wa dai animarãba bãrã baidoda dod̶ibʌrʌ, maʌ̃bari paratada diad̶ia. Ab̶abe bʌ druad̶e wãyã wãna quĩrĩã panʌa. Ab̶abe maʌ̃drʌ iwid̶i panʌa.–

20 Baribʌrʌ Edoʌ̃nebema boroba wayacusa panusia:

–Bãrãra mʌ̃ druad̶e wãnacara panʌa.–

Ara maʌ̃da Edoʌ̃nebema boroba sordaorã bio mẽsrã b̶eara zocãrã israelerãmaa djõne edesia. 21 Edoʌ̃nebema boroba idji druad̶e idu wãbiẽ́ bẽrã israelerãra dewara óare wãsid̶aa.

22 Cadé abadad̶eba Israel purura Hor eyad̶aa wãsid̶aa. 23 Hor eyara Edoʌ̃ drua caita b̶ʌa. Mama Ãcõrẽba Moisea Aaroʌ̃a bid̶a jarasia:

24 –Nama Aaroʌ̃ra jaid̶aya. Idjira mʌ̃a israelerãa diai jarad̶a druad̶e ed̶a wãcara b̶ʌa, Meribád̶e mʌ̃a baido weabid̶ama bãrãba mʌ̃a jarad̶ara ĩjã od̶aẽ́ basi bẽrã. 25 Moise, bʌ djaba Aaroʌ̃ra idji warra Eleaza sid̶a Hor eyad̶e ʌ̃taa ededua. 26 Mama Aaroʌ̃ba jʌ̃ b̶ʌ djiora ẽrãped̶a idji warra Eleazaa jʌ̃bidua sacerdote dji dromada b̶emãrẽã. Maʌ̃be Aaroʌ̃ra mama jaid̶aya.–

27 Ara maʌ̃da Moiseba jũma osia Ãcõrẽba jarad̶a quĩrãca. Jũma israelerãba acʌ panʌne Aaroʌ̃ra, Eleaza sid̶a Hor eyad̶e ʌ̃taa edesia. 28 Mama Aaroʌ̃ba jʌ̃ b̶ʌ djiora jũma ẽrãped̶a Moiseba Aaroʌ̃ warra Eleazaa jʌ̃bisia. Maʌ̃be Aaroʌ̃ra eya borod̶e jaid̶asia. Mãwãnacarea Moisera Eleaza sid̶a eyad̶eba ed̶aa zesid̶aa. 29 Israelerãba Aaroʌ̃ jaid̶ad̶a cawasid̶ad̶e idji carea jũmarãda jed̶eco ab̶a jĩãsid̶aa.