21
Israelerãba Arad purud̶ebema boro poyaped̶ad̶a
1 Arad purud̶ebema borora cananeo basía. Negue ẽjũã põãsa ewaraga b̶ʌra idji drua basía. Idjia ũrĩsia israelerãra Atariʌ̃naa wãbada od̶e zebʌdada. Maʌ̃ bẽrã idji sordaorãda israelerã ume djõne edesia. Djõ panʌne ãdjirãba ʌ̃cʌrʌ israelerãra jida edesid̶aa. 2 Maʌ̃ bẽrã israelerãba Ãcõrẽa wãrãneba nãwã jarasid̶aa: “Dairãba naʌ̃ ẽberãrã poyad̶amãrẽã bʌa carebaibʌrʌ, ãdji purura jũma ãrĩcuad̶aped̶a babued̶ia.”* Hebreo bed̶ead̶e naʌ̃ crĩchada dia b̶ʌa: “Dji quĩrũra poyad̶aped̶a jũma idjia erob̶ʌra Ãcõrẽ itea b̶eya. Maʌ̃ bẽrã jũma ãrĩnaped̶a babued̶ia ni ab̶aʌba ara idji itea edarãnamãrẽã.”
3 Israelerãba wãrãneba jaraped̶ad̶ara Ãcõrẽba bia ũrĩsia. Idjia carebasia ãdjirãba maʌ̃ cananeorãda poyad̶amãrẽã. Israelerãba jũma quenanaped̶a ãdji purura jũma ãrĩnaped̶a babuesid̶aa. Maʌ̃ bẽrã mama trʌ̃ b̶ʌsid̶aa Hormá.† Hebreo bed̶ead̶e Hormá trʌ̃ba jara b̶ʌa “jũma ãrĩped̶ad̶a.”
Moiseba bronce dama od̶a
4 Hor eyad̶eba israelerãra Pusa Purrud̶aa wãbada óare wãsid̶aa Edoʌ̃ drua aud̶u pʌrrʌgad̶i carea. Mãwã wãnane sẽ panesid̶aa. 5 Maʌ̃ carea Ãcõrẽda, Moise sid̶a nãwã biẽ́ jara duanesid̶aa:
–¿Bʌa dairãra Egiptod̶eba ẽdrʌ enesica naʌ̃ ẽjũã põãsa ewaraga b̶ʌd̶e quininamãrẽã? Cod̶ira neẽ́a. Baido sid̶a neẽ́a. Idjab̶a naʌ̃ maná warraẽ́ tab̶ʌ co panʌba sẽ panʌa.–
6 Maʌ̃gʌ carea Ãcõrẽba israelerãmaa dama dji arada zocãrã diabuesia. Maʌ̃ damaba israelerãra cácuad̶aped̶a zocãrã quinisid̶aa. 7 Maʌ̃ bẽrã israelerãra Moisemaa wãnaped̶a jarasid̶aa:
–Dairãba cadjiruada osid̶aa Ãcõrẽda, bʌ sid̶a biẽ́ jarasid̶a bẽrã. Dai quĩrã djuburia Ãcõrẽa iwid̶idua naʌ̃ damara ãyã wãbicuamãrẽã.–
Ara maʌ̃da Moiseba ãdjirã carea Ãcõrẽa bed̶ea djuburiasia. 8 Maʌ̃ne Ãcõrẽba Moisea jarasia:
–Bronceda dama quĩrãca ab̶a oped̶a bacuru erad̶ad̶e ʌ̃tʌ jira b̶ʌdua. Damaba ab̶aʌda casira, maʌ̃ ẽberãba bronce od̶a damada acʌibʌrʌ biaya.–
9 Ara maʌ̃da Moiseba bronceda dama quĩrãca oped̶a bacuru erad̶ad̶e ʌ̃tʌ jira b̶ʌsia. Damaba ab̶a cabʌrʌd̶e maʌ̃ ẽberãba bronce od̶a damada acʌsira biabadjia.
Israelerã Moab druad̶e jũẽped̶ad̶a
10 Mamaʌba wãnaped̶a israelerãra Obot abadad̶e duanesid̶aa. 11 Mamaʌba wãnaped̶a Ije-Abariʌ̃ne duanesid̶aa. Maʌ̃ra Moab druad̶eba ʌ̃mãdau odjabariare ẽjũã põãsa ewaraga b̶ʌd̶e b̶ʌa. 12 Mamaʌba wãnaped̶a Zared do jewed̶ad̶e duanesid̶aa. 13 Mamaʌba wãnaped̶a Arnoʌ̃ do quĩrãrẽ duanesid̶aa ẽjũã põãsa ewaraga b̶ʌd̶e. Maʌ̃ ẽjũãra amorreorã druad̶e b̶ʌa. Arnoʌ̃ dora Moab drua idjab̶a amorreorã drua ẽsi b̶ʌa. 14-15 Maʌ̃ bẽrã carta Ãcõrẽ Djõna abadad̶e nãwã b̶ʌ́ b̶ʌa:
Vaheb puru Supa druad̶e b̶ʌare, Arnoʌ̃ do jʌwateare bid̶a wãyã wãsid̶aa.
Do zaque b̶ea caita Ar abadad̶aa wãsid̶aa Moab drua orrocawa.‡ Hebreo bed̶ead̶e jũma maʌ̃ versículora ebud̶a b̶ʌẽ́a.
16 Mamaʌba israelerãra baido juebada uria Beer abadad̶aa wãsid̶aa. Mama Ãcõrẽba Moisea nãwã jarasia:
–Purura ãbaa jʌredua. Mʌ̃a ãdjirãa baidoda diaya.–
17 Maʌ̃ne israelerãra nãwã trʌ̃ãsid̶aa:
Baido juebada uriara bogadrʌ b̶adua. Maʌ̃ baido carea trʌ̃ãnia.
18 Dadjirã bororãba ãdji bacuruba naʌ̃ baido juebada uriara corosid̶aa. Dji dromarãba ãdji bardonaba corosid̶aa.
Mama ẽjũã põãsa ewaraga b̶ʌd̶eba Matanánaa wãsid̶aa. 19 Mamaʌba Najalield̶aa wãsid̶aa. Mamaʌba Bamod̶aa wãsid̶aa. 20 Mamaʌba jewed̶a Moab druad̶e b̶ʌd̶e jũẽne wãnaped̶a Pisga eyad̶e duanesid̶aa. Pisga eyad̶eba Jesimoʌ̃ ẽjũã põãsa ewaraga b̶ʌra unubaria.
Israelerãba amorreorã poyaped̶ad̶a
21 Maʌ̃be israelerãba amorreorã boro Sehoʌ̃ abadamaa ʌ̃cʌrʌ diabuesia nãwã jarad̶amãrẽã:
22 –Dai quĩrã djuburia bʌ druad̶e idu wãyã wãbidua. Dairãra bãrã néud̶e ed̶a wãnaẽ́a, bãrã uva ẽjũãne bid̶a ed̶a wãnaẽ́a, ni bãrã baido juebada uriad̶ebemada dod̶aẽ́a. Ẽberãrã Boro abada od̶e quĩrãipa wãnia.–
23 Baribʌrʌ Sehoʌ̃ba israelerãra idji druad̶e idu wãbiẽ́ basía. Idji sordaorãra jũma trʌ̃cuaped̶a ẽjũã põãsa ewaraga b̶ʌd̶e israelerãmaa wãnaped̶a Jahaza puru caita djõsid̶aa. 24 Baribʌrʌ israelerãba ãdjirãra poyad̶aped̶a ãdji druara jãrĩsid̶aa Arnoʌ̃ dod̶eba ab̶a Jabó dod̶aa amonitarã drua daucha. Amonitarãba ãdji druara bio waga eropanasid̶aa. 25 Israelerãba amorreorã puru b̶eada jũma poyasid̶aa; dji puru droma Hesboʌ̃ abadara, puru zaquerã sid̶a. Poyad̶aped̶a maʌ̃ purud̶e panesid̶aa.
26 Amorreorã boro Sehoʌ̃ra Hesboʌ̃ purud̶e b̶abadjia. Naẽna idjira moabitarã boro ume djõped̶a ãdji druara jũma jãrĩsia ab̶a Arnoʌ̃ do daucha. 27 Maʌ̃ carea nãwã jarabadaa:
¡Hesboʌ̃ purura wayacusa od̶e zed̶adua! Sehoʌ̃ purura idji b̶ad̶a quĩrãca bia od̶ia.
28 Sehoʌ̃ sordaorãra Hesboʌ̃ purud̶eba wãsid̶aa. Tʌbʌ urua eradrʌbʌrʌ quĩrãca Sehoʌ̃ purud̶eba wãsid̶aa.
Maʌ̃ne Ar puru Moab druad̶e b̶ʌra babuesid̶aa. Arnoʌ̃ do icawa eyad̶e b̶ea puru sid̶a jũma babuesid̶aa.§ Do icawa eyad̶e b̶ea puru. Hebreo bed̶ead̶e maʌ̃ra ebud̶a b̶ʌẽ́a.
29 ¡Ay, moabitarã! ¡Bãrãra mĩã djuburi b̶eaa! Bãrã ãcõrẽ Quemo ẽpẽbadara beusid̶aa.
Amorreorã boro Sehoʌ̃ba bãrã warrarãra memenebisia. Bãrã caurãra jida edesia.
30 Baribʌrʌ dadjirãba ãdjira jũma poyasid̶aa.* Dadjirãba ãdjira jũma poyasid̶aa. Hebreo bed̶ead̶e mãwã b̶ʌ́ b̶ʌa. Griego bed̶ead̶e jara b̶ʌa “ãdjia eropananara jũma ãrĩsid̶aa.” Hesboʌ̃ purud̶eba ab̶a Diboʌ̃ purud̶aa jũma quenasid̶aa.
Nopa purud̶eba ab̶a Medebá purud̶aa jũma ãrĩnaped̶a babuesid̶aa.
Israelerãba Basaʌ̃nebema boro Og poyaped̶ad̶a
31 Mãwã israelerãra amorreorã druad̶e panesid̶aa. 32 Maʌ̃ne Moiseba ʌ̃cʌrʌ diabuesia Jazer drua acʌd̶amãrẽã. Israelerãba puru maʌ̃ druad̶e b̶eara poyad̶aped̶a amorreorãra ãyã jʌretasid̶aa. Mama bid̶a israelerãra panesid̶aa.
33 Mamaʌba israelerãra Basaʌ̃naa wãbada od̶e wãsid̶aa. Maʌ̃ne Basaʌ̃nebema boro Og abadaba idji sordaorãda Edrei puru b̶ʌmaa edesia israelerã ume djõni carea. 34 Mãwã panʌne Ãcõrẽba Moisea jarasia:
–Ne wayarãdua. Mʌ̃a idjida, idji sordaorã sid̶a bãrãa jũma poyabiya. Idji drua sid̶a mʌ̃a bãrãa diaya. Bãrãba Hesboʌ̃ne b̶ad̶a amorreorã boro Sehoʌ̃ beaped̶ad̶a quĩrãca idji sid̶a bead̶adua.–
35 Ara maʌ̃da israelerãba Basaʌ̃nebema boro Og abadara, idji warrarãra, idji sordaorã sid̶a jũma quenasid̶aa. Ni ab̶aʌda zocai b̶ʌd̶aẽ́ basía. Maʌ̃be idji druara jũma edasid̶aa.
*21:2 Hebreo bed̶ead̶e naʌ̃ crĩchada dia b̶ʌa: “Dji quĩrũra poyad̶aped̶a jũma idjia erob̶ʌra Ãcõrẽ itea b̶eya. Maʌ̃ bẽrã jũma ãrĩnaped̶a babued̶ia ni ab̶aʌba ara idji itea edarãnamãrẽã.”
†21:3 Hebreo bed̶ead̶e Hormá trʌ̃ba jara b̶ʌa “jũma ãrĩped̶ad̶a.”
‡21:14-15 Hebreo bed̶ead̶e jũma maʌ̃ versículora ebud̶a b̶ʌẽ́a.
§21:28 Do icawa eyad̶e b̶ea puru. Hebreo bed̶ead̶e maʌ̃ra ebud̶a b̶ʌẽ́a.
*21:30 Dadjirãba ãdjira jũma poyasid̶aa. Hebreo bed̶ead̶e mãwã b̶ʌ́ b̶ʌa. Griego bed̶ead̶e jara b̶ʌa “ãdjia eropananara jũma ãrĩsid̶aa.”