1 Sambata gii mendenya Jisasa baa Parasi dupanya isingi akali mendenya andaka pupala nee nao peteamopa, Jisasame aipa pilyape lao Parasi dupame isokondape piami. 2 Dokopa Jisasanya enomba dokonya, akali yonge endaki pituu andao koeyapae mende ipupala katea. 3 Dokopa Jisasame looyapi, Parasipi dupa lamaiyoo, “Sambata gii dupanya endakali yaina pyapae dupa mee jakamaiyepape lao loome latae silyape?” lea. 4 Dopa leamopa dupame pii mende naleaminosa, Jisasame akali doko minatala, yaina doko mee jetakamai pena lea. 5  Matyu 12:11Pateamopa Jisasame dokaita lamaiyoo, “Sambata gii mendenya, embanya wanepi, kaowapi mende endaki pete tombapae mendenya pyakatamopa, embame pupae pyalya lao nanyetepe?” lea. 6 Dopa leamopa dokaitame baanya pii dutupa kapa pao yanu napiami.

7 Nee nala epena leamopa epeami endakali dupame toko epe dupa yapao peteaminopa Jisasame kandatala, kongali dake dokaita lamaiya: 8-9  Pro 25:6-7“Akali mendeme enda watapae pyao nee andake depa lelyona nambana ipupi latamopa, emba ipupala toko epe mendenya napitipi. Aipumape, emba ipupi lata akali dokome akali andake alyasale mende apata epena lataka. Nyakamba lapota ipupape lata akali doko ipupala lao pituu, ‘Emba pilyino toko doko akali dake mai’ latamopa, emba elya sepala toko maita-kaita dupanya pilya patena, toko epe dupanya napitipi. 10  Akali mendeme nee nambana ipupi latamopa, emba pao etete maita-kaita pitipi. Dopa pitinopa, emba ipupi lata akali doko ipupala emba langyoo, ‘Kaimii, emba enomba nyoo pilya ipu’ lata. Dopa lata dokome, endakali nee nao tole pititami dupanya enombanya emba lalyetamosa pita. 11  Matyu 23:12; Luku 18:14Dopana, endakali mendeme baa tange kenge minalyetamo doko, Goteme baanya kenge doko minanata. Endakali mendeme baa tange kenge minanatamo doko, Goteme baanya kenge doko minalyetana” lea.

12 Dopa latala Jisasame baa nee nala epena lea akali doko lamaiyoo, “Embame nee yakane-tamopi, andake-tamopi mende yangatala, embanya kaita miningipi, embanya kaiminingipi, embanya tatapi, embanya patali maki yuunya kamongopi, dupame yanu pyao emba nee nala ipupi latamina, dupa nee nala epena laa naeyape. 13  Embame nee andake mende yangateno dokopa, endakali tipyapi, kingi talyangapi, moko takyepaepi, lenge mondapi dupa nala epena lape. 14  Dopa pitino doko, Goteme emba auu piseta. Endakali dopale dupame kapa pao yanu pyakala naeyatamiaka doko, Goteme endakali tolatae dupa sakataseta gii dokopa, baame embanya yanu dupa pyakatana” lea.

15  Matyu 22:1-10Nee nao tole peteami dupanya mendeme Jisasame pii leamo dupa sepala baa lamaiyoo, “Gotenya kingdom dokonya nee nao pititami endakali dupa pitaka Goteme auu pisetae-lumuna” lea. 16 Dopa leamopa Jisasame baa lamaiyoo, “Akali mendeme nee andake mende yangatoo latala, endakali longo nee nala epena lea. 17  Nee andake napenge gii doko epeamopa, baanya kalai akali mende pena latala lamaiyoo, ‘Indupa nee dupa pitaka depa latae silyamona, endakali epena latae dupa epena lanyala puu’ lea. 18  Dokopa kalai akali dokome pao lamaitiamopa, epena latae endakali dupa pitakame naipamane-lumuna leami. Wambao dokome baa lamaiyoo, ‘Nambanya yuu mende sambapu doko kanja pupengena, namba naipatoana, yatae lelyona’ lea. 19  Mende dokome lao pituu, ‘Nambanya kao akalita sambapuna, dutupame kalai pina makande pyaa pelyona, namba naipatoana, yatae lelyona’ lea. 20  Mende dokome lao pituu, ‘Namba enda kelyapu dokonya kapa naipapo-lumuna’ lea. 21  Dokopa kalai akali doko ipupala, leami dupa baanya akali andake doko lamaiya. Lamaitiamopa anda tange, akali andake doko imbu kaeyapala, baanya kalai akali doko lamaiyoo, ‘Emba alo pyao siti dokonya kaitini yalepi, yakanepi dupanya paeyao, endakali tipyapi, kingi talyangapi, moko takyepaepi, lenge mondapi dupa laminao andaka dakenya andakote ipupi’ lea. 22  Akali andake dokome leali petala, kalai akali dokome baa lamaiyoo, ‘Embame lapinoli petapupa, panda longo mee silyamoakana’ lea. 23  Dokopa akali andake dokome kalai akali doko lamaiyoo, ‘Nambanya anda dake tumbinana, embame kaitini yalepi, kame kilikili kaitini yakanepi, dupanya endakali kandate dupa pitaka epena lao kyeto joo lamaipi. 24  Akali nee nala epena lapupa naipamino dupanya mendaipi mendeme nambanya nee andake dakenya nao sala naeyatana lao nambame nyakama langilyona’ leana” Jisasame lea. Dopa latala Jisasame lao pituu, “Goteme endakali longo epena lengeaka doko, baame endakali kuki yapao nyingina” lea.

25 Endakali kambu andake mendapu Jisasa-pipa peamino dupa baame kandalyetala lamaiyoo, 26  Matyu 10:37-38“Akali mende namba katato dokonya ipupala, baanya endangi takangepa, enda wanepi, kaiminingi pimalengepi, baanya lete katengepi, dupa maita maiya naeyatamo doko, baa kapa pao nambanya disaipolo nakatata. 27  Matyu 16:24; Make 8:34; Luku 9:23Endakali mendeme baanya poko ita doko soo, namba watao naipatamo doko, baa nambanya disaipolo nakatataka. 28  Nyakamanya mendeme kandao isoo pitipenge anda ketae mende pyoo pyakalyotoo lao maseteno doko, wambao isa pitipala, anda doko pyoo etasepenge muni yaka silyape lao itaki pyala naeyatepe? 29  Itaki pyala naeyateno doko, embame anda muku minapala kapa pao angi pyoo etasala naeyatenopa, kandatami endakali dupa pitakame tee pyao emba lamba lao, 30  ‘Akali dakeme anda pyaanya tee pyatala, pyoo etasala naeya-lamona’ latami. 31  Kiŋi mendeme kiŋi waka mende yanda pimaiya paanya pituu, kiŋi mende dokonya amii 20 tausene ipataminopa, baanya amii 10 tausene katatami dutupame kapa pao yanda pimaitala ita minalapope lao, wambao isa pitipala masokondape napitape? 32  Baame kapa napapomona lao masetamo doko, kiŋi mende doko londati katatamopa, yanda doko kaeyambana lao akema latala, akali mendapuame wai minao pena lata. 33  Dopana, nyakamanya mendeme oapi setenge dupa pitaka yakinatala namba watao naipateno doko, emba kapa pao nambanya disaipolo nakatatena” lea.

34-35  Matyu 5:13; Make 9:50“Sole doko epe. Dopaka doko, sole dokonya tende patamo doko, aipa petala dee tende pisetami? Sole tende patae dokome yuu auu pisala naenge. Ninu wasala naengeaka. Dopa petae doko kamaka soo nepenge. Nambame pii lelyo dutupa endakali kale katenge dupame sepengena” lea.