1 Jisasanya disaipolo dupame maka nakaeyao, koteaka lao loma soo katena lao baame kongali pii mende dapa lao lamaiya: 2  “Siti mendenya jasa mende katea dokome Gote paka nakaeyao, endakali dupa anda-anda semaiya naeyaowaka katea. 3  Dokopa siti dokonya enda walyakae mende petea. Enda doko jasa katea dokonya ipupala lao pituu, ‘Nambanya yandapipi dokome namba kenda dilyamona tolasakapoko’ lao tondani pia. 4  Tondani piamopa, jasa dokome tolasala naeyatoana, daa lao gii kuki mendalapo katea. Dopaka doko, maitakao jasa dokome dapa lao masia: ‘Nambame Gote paka nakaeyao, endakali dupa anda-anda semaiya naeyaowaka pingi doko, 5  enda walyakae dakeme tondani pitamopa, namba etete maka kaeyalapo-lamona, baanya kenda doko tolasakamaitoana’ lao masiana” lea. 6 Dopa latala Kamongome lao pituu, “Mana tolatae naminingi jasa dokome lea-lumu doko nyakamame auu pyoo masalapape. 7  Gotenya yapao nyepae endakali dupame kuka kotakapi wii lao loma soo katataminopa, dupanya kenda dupa Goteme yapa tolasakamaiya naeyatape? Baame dupa yapa nisala naeyao, gii longo nepao malisoo katatape? 8  Dupanya kenda dupa baame yapa tolasakamaitana lao nambame nyakama langilyo. Dopaka doko, Akalinya Ikiningi doko ipatamo gii dokopa, Gote tungi pingi akipate isa yuu dakenya katatami kandatape?” lea.

9 Endakali mendapuame nyakama tange tolataena lao mona andaka kyeto joo masetala, endakali waka dupa kandanya palyiaminosa, Jisasame dokaita kongali dake lamaiya: 10  “Akali lapoma lotuu anda nee nyetae kamapu dokonya loma sala peambi. Mende doko Parasi. Mende doko takisa nyingi. 11  Parasi dokome baa iki katao dapa lao loma sia: ‘Gote, namba pake nengepi, mana koo miningipi, kepo kolengepi, endakali waka dopale daa. Namba takisa nyingi kalyamo dapale daaka dokonyana, nambame emba yaka pilyino lelyo. 12  Wiki mendainya yuu gii lapoma nambame loma soo nee nanao katenge. Nambame dopale nyilyo dupa pitaka malu akalita mokosoo setapala, dutupanya malu mendai emba dingina’ lao loma sia. 13  Dokopa takisa nyingi dokome kaiti-kisa kandalyetae nakatatoo lao masetala, omosale katao, mona kenda kaeyao lao pituu, ‘Namba akali koo pingi mendena, Gote embame namba kondo kaeyape’ lea. 14  Matyu 23:12; Luku 14:11Nambame nyakama langilyo: Takisa nyingi doko Goteme tolataena lateamopa baanya andaka lanao pea. Akali mende doko tolataena nalea. Endakali mendeme baa tange kenge minalyetamo doko, Goteme baanya kenge doko minanata. Dopaka doko, endakali mendeme baa tange kenge minanatamo doko, Goteme baanya kenge doko minalyetana” lea.

15  Matyu 19:13-15; Make 10:13-16Endakali mendapuame wane ŋaŋa dupa apata Jisasame watandena lao kopyoo epeami. Dokopa disaipolo dupame kandatala, endakali dupa pyalanya leami. 16 Dokopa Jisasame wane wanakupi koo dupa epena latala lao pituu, “Gotenya kingdom doko wane wanakupi koo dapale dupanyana, dokaita epekena kaita lyokala naeyalapa. 17  Nambame nyakama kiningi langilyo: Gotenya kingdom doko wane wanakupi koo mendeme nyingili pyoo, endakali mendeme nanyetamo doko, baa Gotenya kingdom dokonya kolandala naeyatana” lea.

18  Matyu 19:16-30; Make 10:17-31Isingi akali mendeme Jisasa tipa pyoo, “Mana Lenge Epe, lete etete katenge doko nambame aipa petala nyotope?” lea. 19 Dokopa Jisasame baa lamaiyoo, “Aipuma embame namba epe lelye? Endakali mende epe daa. Gote iki baa epe. 20  Eks 20:12-16; Diut 5:16-20Mana setapae dupa embame masilyino: Kepo kolala naeyape. Endakali pyao kumasala naeyape. Pake nala naeyape. Endakali mende sambo lao kotimi laa naeyape. Embanya endangi takangepa dolapo anda-anda semaiyoo katape lapae silyamona” lea. 21 Dokopa isingi akali dokome lao pituu, “Namba wane kolesa pituu, mana setapae dutupa pitaka nambame wata-minio dopaka pyoo wata-minao kalyona” lea. 22 Dopa leamopa Jisasame sepala akali doko lamaiyoo, “Emba mendai mende daa jilyamona, embanya oapi dupa pitaka salimi latala, endakali daa jepae dupa mokosoo maipi. Dopa pitinopa oapi epe dupa embanya kaiti-kisa sakata. Dopana, emba namba watao ipu” lea. 23 Dopa leamopa isingi akali dokome sepala, baanya oapi etete longo setenge dokonyana, mona etete kenda kaeya. 24 Akali doko mona etete kenda kaeyamo kandatala, Jisasame lao pituu, “Muni longo singi endakali dupa Gotenya kingdom dokonya kolandalanya etete lekeleke tatami. 25  Kamele mendeme kepo tii mendenya lekeleke tao kolandapyaliaka doko, yuunya kamongo mendeme Gotenya kingdom dokonya kolandalanya eteteaka lekeleke tatana” lea. 26 Dopa leamopa siami endakali dupame lao pituu, “Dopa-tamo doko, endakali api pyoo nyetape?” leami. 27 Dopa leaminopa Jisasame lao pituu, “Endakalimi kapa pao napipenge dupa pitaka Goteme pingina” lea. 28 Dokopa Pitame lao pituu, “Naimame dupa pitaka yakinatala emba watao epelyamanona” lea. 29 Dopa leamopa Jisasame dokaita lamaiyoo, “Nambame nyakama kiningi langilyo: Akali mendeme Gotenya kingdom doko masetala, baanya andapi, endangi takangepi, kaiminingipi, endapi, wane wanakupi, dupa yakinatamo dokome, 30  indupa gii dakepa wakao longo lao nyalapomo. Yuu enenge ipata dokonya baa lete etete katenge doko apata nyetakana” lea.

31  Matyu 20:17-19; Make 10:32-34Jisasame 12 disaipolo dutupa lanyepala dokaita lamaiyoo, “Salapape! Naima lalyoo Jerusalema pelyamano. Pupala katatamanopa, Akalinya Ikiningi doko-kisa mendapu pitana lao propeta dupame pepa pyanya seteami dupa pitaka angi jeta. 32  Akalinya Ikiningi doko akali tata waka dupanya kinginya maitaminopa, dokaitame baa lamba lao, elya pisoo, sopokalimi pyatami. 33  Dopa petala, dokaitame baa konjame pyapala pyao kumasetataminopa, yuu gii tepo dokonya baa sakatatana” lea. 34 Pii dokonya tenge doko disaipolo dutupame nanyiami. Pii doko yalo petae katea dokonya, baame pii lea dupa auu pyoo masala naeyamiaka.

35  Matyu 20:29-34; Make 10:46-52Jisasa baa Jeriko tengesa pyakameamopa, akali lenge monda mende muni tee lao kaitini lemba dokonya petea. 36 Peteamopa, endakali longo kaita ipao puiyamino sepala, doko aipa pilyape lao baame tipa pia. 37 Dopa leamopa dokaitame baa lamaiyoo, “Nasarete tange Jisasa doko ipao pelyamona” leami. 38 Dokopa baame wii lao, “Dapita Ikiningi Jisasa, embame namba kondo kaeyapoko!” lea. 39 Dopa leamopa, endakali wambeami dupame baa pii kaena lao pyalanya leami. Dopa leaminopapi, baame etete puu lao wii lao, “Dapita Ikiningi, embame namba kondo kaeyapoko!” lea. 40 Dopa leamopa Jisasa katapala, akali doko laminao epena lea. Laminao tengesa ipateaminopa, Jisasame baa tipa pyoo, 41  “Nambame embanya aipa pyakapili lao masilyipi?” lea. Dokopa baame lao pituu, “Kamongo, namba lenge auu pyoo tao kandapu laka lao masilyona” lea. 42 Dopa leamopa Jisasame baa lamaiyoo, “Embame namba tungi pilyino dokome, embanya lenge dolapo auu pisekelyamona, emba lenge auu pyoo taa” lea. 43 Dopa lalu piamopa, baanya lenge dolapo auu pyoo talu petala, Jisasa watao pao pituu, Gote kenge andake maiyoo pea. Dokopa endakali dupa pitakame kandatala Gote mambo piami.