1  Matyu 26:1-5; Make 14:1-2; Jone 11:45-53 Eks 12:1-27Breta Yisa Pyandala Naeyao Yangapae Nengema, Pasopa lenge gii doko ipanya tengesa pia. 2 Dokopa prisa mupapi, Mosesanya loo mana nyepaepi, dupame endakali dupa paka kaeyami dokonya, aipa petala Jisasa yalo pyoo pyao kumasemape lao kaitini kutiami.

3  Matyu 26:14-16; Make 14:10-11Dokopa 12 disaipolo dutupanya mende Judasa, kenge mende Iskariota lenge doko-kisa Satane ipao landa pia. 4 Dokopa Judasa baa prisa mupapi, lotuu anda nee nyetae dokonya yanda singipi, dupa kateami dokonya pupala, baame aipa petala Jisasa nyakamanya kinginya ditoape leamopa dokaita-pipa pii leami. 5 Pii latala dokaitame auu kaeyapala, muni mendatupa Judasa maimana lao pii yaki piami. 6 Dopa petala, Judasame pii doko yakana latala, endakali kambu dupa nakatataminopa dokaitanya kinginya Jisasa maiyanya kaitini kutao katea.

7  Matyu 26:17-19; Make 14:12-16Breta Yisa Pyandala Naeyao Yangapae Nengema gii dokonya, Pasopa gii doko kandao nyoo, sipisipi ŋaŋa pyao yangapenge gii doko epeamopa, 8 Jisasame Pitapa, Jonepa dolapo pena latala lamaiyoo, “Pasopa nee doko namana, depa laa pupa” lea. 9 Dopa leamopa dolapome baa lamaiyoo, “Nalimbame anja depa lapale lao masilyipi?” leambi. 10 Dokopa baame dolapo lamaiyoo, “Salapape! Nyakamba siti dokonya pyakamatambinopa, endaki kamuu singi akali mendeme nyakamba kandanyalapomona, doko watao pupape. Pupala, baa kolandata andaka dokonya nyakamba apata kolandatala, 11  nyakambame anda tange doko lamaiyoo, ‘Mana Lenge dokome baanya disaipolo dupa-pipa Pasopa nee doko namana, panda doko andusa silyape lelyamona’ lao lamaiyepape. 12  Lamaitambinopa baame anda ketae mendenya ruma andake, depa latae mende laitaka pyaapomona, dokonya nyakambame nee doko depa lapape” lea. 13 Dolapo pupala, Jisasame lealiaka petae siamo kandatala, Pasopa nee doko depa leambi.

14  Matyu 26:26-30; Make 14:22-26; 1 Kor 11:23-25Nee napenge awa doko epeamopa, Jisasa baa 12 aposole dutupa-pipa nee nao peteami. 15 Peteaminopa baame dutupa lamaiyoo, “Namba tanda andake ene nyalanya, Pasopa nee dake nyakama-pipa wambao natamana lao nee kaeyao masoo katapu. 16  Dopana nambame nyakama langilyo: Pasopa nee mende namba nanaowaka katao, nee dokonya tenge angi doko Gotenya kingdom dokonya panatamopa natona” lea. 17 Dopa latala baame kapo waene peteta mende nyepala, Gote yaka pilyino latala lao pituu, “Dake nyepala nyakamame kapa-kapa lao mokosoo nalapa. 18  Nambame nyakama langilyo: Namba waene nala naeyaowaka katao, Gotenya kingdom doko ipatamo gii dokonya tuu latona” lea. 19 Dopa latala baame breta mende nyepala, Gote yaka pilyino latala konjia. Konjepala dokaita maiyoo pituu dapa lea: “Dake nambanya yonge doko, nyakama nisoo setekelyona, nyakamame namba masoo nalapape” lea. 20  Jer 31:31-34Nee nao etapala, mendai dopaka pyoo baame kapo waene peteta mende nyepala lao pituu, “Kapo dakenya nambanya taeyoko pilyamo doko kai lekelyo dokome, pii enenge mende lao yaki pinya setelyo. 21  Sam 41:9; Matyu 26:21-24; Make 14:18-21; Jone 13:21-30Dopaka doko, namba yandapipi dupanya kinginya maiyapomo akali doko namba pilyo dakenya apata pilyambano. 22  Goteme masiamo dokonya-kaita Akalinya Ikiningi doko kiningi kumala pupenge. Dopaka doko, baa yandapipi dupanya kinginya maiyapomo akali doko koeyalapomona!” lea. 23 Pii doko sepala, “Apimi dopa pyaanya pilyamape?” lao tee pyao nyakama-lapo tipa pii-pii piami.

24  Matyu 18:1; Make 9:34; Luku 9:46Dokopa disaipolo dupame nyakamanya api alyasale joo kalyape lao nyakama-lapo pii yanda piami. 25  Matyu 20:25-28; Make 10:42-45Dokopa Jisasame dokaita lamaiyoo, “Akali tata waka dupanya kiŋi dupame nyakama alyasale joo katao, endakali isoo katengema dupa kyeto joo isingima. Akali tata waka dupanya isingi akali dupa kenge Nisingi Akali lengema. 26  Matyu 23:11; Make 9:35Dopaka doko, nyakamanya kainanya mana dopale dupa naseta. Nyakamanya mende alyasale joo katate doko, wane kole joo katapenge. Nyakamanya mende isingi akali katate doko, kalai akali joo katapenge. 27  Jone 13:12-15Api alyasale joo kalya? Nee nao petenge doko alyasalepe, pande nee yangao setakamaingi doko alyasale? Nee nao petenge doko alyasale daape. Dopaka doko, namba nyakamanya kainanya kalai akali joo kalyo.

28  “Namba-kisa makande pipae ipumupa, nyakama namba-pipa apata kalyamano. 29  Dopana, nambanya Takangeme kingdom mende nambame isatale lao diamoli pyoo, kingdom mende nyakamame isalapale lao nambame dilyo. 30  Matyu 19:28Nyakama nambanya nee setao nenge toko dokonya nee endakipi nao pitipa, kiŋi toko mendapuanya pituu Israele tata 12 dutupa yapata pitaminopa lao dilyona” lea.

31  Matyu 26:31-35; Make 14:27-31; Jone 13:36-38Dokopa Kamongome Saimone Pita lamaiyoo, “Saimone, Saimone, embame sepe! Wita lyanda-lyanda lao angi imbupi yapengeli pyoo, Sataneme nyakama lyanda-lyanda lao yapalanya Gote-kisa tee latelyamo. 32  Embame namba tungi pingi doko yakinala naeyatale lao nambame embanya kyeto joo loma sekeo. Dopa pyekeona, emba mona kapilyete gii dokopa, embanya Kristene kaiminingi dupa kyeto jisepe” lea. 33 Dopa leamopa Pitame baa lamaiyoo, “Kamongo, emba anjetae patenopapi, kumala patenopapi, dupanya namba apata patambana lao depa latae kalyona” lea. 34 Dopa leamopa Jisasame lao pituu, “Pita, nambame emba langilyo: Indupa kuka gii dakepa, yaka pauli pii laa naeyatamopa, paa tepomasa embame namba nakandengena laapenona” lea.

35  Matyu 10:9-10; Make 6:8-9; Luku 9:3; 10:4Dokopa Jisasame dokaita lamaiyoo, “Nyakama munipi, nokainapi, moko peepi mende namandyoo mee pupape leo dokopa, nyakama dopale mende daa jiape?” lea. Dokopa dokaitame lao pituu, “Naima dopale mende daa nanjiana” leami. 36 Dokopa baame dokaita lamaiyoo, “Indupa nyakama-kisa munipi, nokainapi mende setamo doko, nyoo minalapape. Nyakamanya mende konjuwa daa jia-kandeno doko, embanya yonge pee kisa pingi doko salimi latala konjuwa mende sambape. 37  Ais 53:12Gotenya pii pepa pyapae singi dake namba-kisa angi jepenge: ‘Loo yalenge dupa-pipa baa apata nyoo palyoo itaki piamina’ lao pepa pyapae singi doko indupa namba-kisa kaeyala naeyao angi jilyamona lao nambame nyakama langilyona” lea. 38 Dokopa dokaitame lao pituu, “Kamongo, konjuwa lapoma asa silyamona kanda” leami. Dokopa baame dokaita lamaiyoo, “Yaka-lumuna kaeyalapa” lea.

39  Matyu 26:36-46; Make 14:32-42Dopa latala Jisasa siti doko yakinatala, Olipimanda pengeli pyoo peamopa, baanya disaipolo dupame baa watao peami. 40 Panda dokonya pao pyakalyetala, baame dokaita lamaiyoo, “Makande pipae dupa nyakama-kisa naepena lao loma salapape” lea. 41 Dopa latala baame dokaita yakinatala, omosale pao luma lakapala loma sia. 42 Loma soo pituu, “Apane, kapo kenda paleta mende nalapo dake embame nyoo nepakatoo lao masii-kandeno doko, nyoo nepakape. Dopaka doko, nambame masilyo dokonya-kaita napipi. Embame masilyino dokonya-kaita pipi” lea. 43 Dokopa kaitinya enjele mende ipao kalyu petala, baa kyeto maiya. 44 Dopa piamopa, Jisasa baa mona etete kenda kaeyapala, kyeto joo loma siamopa, baanya enaputi dupa taeyoko joo dopo lao isa yuunya pea. 45 Baa loma soo etapala toeya katea. Toeya katapala ipao disaipolo dupa kandeamopa, dupa mona kenda kaeyapala luu paliu siami. 46 Dokopa baame dokaita lamaiyoo, “Nyakama aipuma luu paliu silyami? Nyakama sakatatala, makande pipae dupa nyakama-kisa naepena lao loma salapape” lea.

47  Matyu 26:47-56; Make 14:43-50; Jone 18:3-12Jisasame dopa lao kateamopa, baanya 12 disaipolo dutupanya mende, Judasa lenge dokome endakali kambu mende laminao ipupala, Jisasa nunu pitoo lao baa katea tengesa dosa pea. 48 Dokopa Jisasame baa lamaiyoo, “Judasa, embame nunu pilyino dokome Akalinya Ikiningi doko yandapipi dupanya kinginya mailyipi?” lea. 49 Dopa leamopa, mende pyaapome-lamo lao Jisasa-pipa kateami dupame kandatala baa lamaiyoo, “Kamongo, naimame konjuwame pyamape?” leami. 50 Dopa latala akali dupanya mendeme prisa mupa dokonya kalai akali dokonya kale tolaetena konjuwame lyanya nepea. 51 Dokopa Jisasame lao pituu, “Dopa napinya kaeyalapa!” lea. Dopa latala baame akali dokonya kale doko kingimi watandeamopa, katengeli pia. 52 Dokopa Jisasame prisa mupapi, lotuu anda nee nyetae dokonya yanda singipi, Juumanya isingi akalipi, baa anjala epeami dupa lamaiyoo, “Pake nenge mende anjala epele lao nyakamame konjuwapi, kolyepepi dupa minao epelyamipi? 53  Luku 19:47; 21:37Koteaka lao namba nyakama-pipa lotuu anda nee nyetae kamapu dokonya kateamanopa, nyakamame namba anjala naeyami. Dopaka doko, iminjetaenya pupu lapae dokopa, awa dakepa, dolapo nyakamanyana” lea.

54  Matyu 26:57-58; Make 14:53-54; Jone 18:12-16Dokopa dokaitame Jisasa minatala laminao, prisa mupa dokonya andaka kolandeami. Dopa piaminopa, Pita baa kuki londatili joo watao pea. 55 Pupala, anda kamapu kaina dokonya endakali mendapuame ita yangatala peteami dupa-pipa Pita apata petea. 56  Matyu 26:69-75; Make 14:66-72; Jone 18:16-18,25-27Dokopa itate tii pia dokonya Pita peteamopa, kalai wanaku mendeme baa kandakondape pyoo kandatala lao pituu, “Akali dake apata Jisasapa kateambina” lea. 57 Dopa leamopa Pitame tanga lao, “Wanaku, nambame akali doko nakandengena” lea. 58 Gii kuki pateamopa, akali mendeme Pita kandatala lao pituu, “Emba apata akali dutupanya mendena” lea. Dopa leamopa Pitame lao pituu, “Wane, namba dutupanya mende daana” lea. 59 Awa mendai joo pateamopa, akali mendeme lao pituu, “Akali dake apata Galali tange dokonyana, kiningi etete Jisasapa kateambina” lao kyeto joo lea. 60 Dopa leamopa Pitame lao pituu, “Wane, embame pii lelyeno doko aki mende lelyepe lao nambame masala naelyona” lea. Dopa lalu piamopa, yaka pauli pii mende lea. 61 Pauli pii doko lateamopa, Kamongo kapilyetala Pita kandakondape pia. Dopa piamopa, Kamongome Pita lamaiya pii datupa Pitame masia: “Yaka pauli pii ene laanya pitamopa, paa tepomasa embame namba nakandengena laapenona” lea dutupa masetala, 62 Pita kamaka pyakalyetala, ee lao putukia.

63  Matyu 26:63-68; Make 14:61-65; Jone 18:19-24Jisasa isetae kateami akali dupame baa lamba latapu, pyao indyepa piami. 64 Dokaitame baanya lenge-lyaapi yaki petala pyao pituu, “Emba pyalumu akali doko, dokona lao propesi piimi laa” leami. 65 Dopa latala baa lao nepao, pii koo longo mendapu leamiaka.

66 Yuu yongeamopa, prisa mupapi, Mosesanya loo mana nyepaepi, Juumanya isingi akali dupa kambuiyami. Kambuiyami dokonya Jisasa laminao pateaminopa, dokaitame lao pituu, 67 “Emba Kraisa doko-tamo doko, naima langi” leami. Dokopa Jisasame dokaita lamaiyoo, “Nambame nyakama langipuli doko, nyakamame kiningina lao masala naeyamili. 68  Nambame nyakama tipa mende pipuli doko, nyakamame yanu pyala naeyao, namba paale lao yakinala naeyamiliaka. 69  Dopaka doko, indupa pituu Akalinya Ikiningi doko, Gote etete kyeto dokonya kingi tolaetena pilyapomona” lea. 70 Dokopa dokaita pitakame lao pituu, “Dopa lelyeno doko, emba Gote Ikiningi dokope?” leami. Dokopa baame dokaita lamaiyoo, “Nyakamame namba dokona lao latelyaminona” lea. 71 Dopa leamopa dokaitame lao pituu, “Baame pii lelyamo dutupa sepelyamano doko, aipuma endakali mendenya deaka pii nyemanape?” leami.