12
ማጫሲዉኔ ዳዊያ
1 ሄሳፌ ጉዬ፥ ሳሎን ዎልቃማ ማላቲ ቤንቲስ። ኣዋ ማዓዳ፥ ኣጌና ቦላ ኤቃዳ፥ ታማኔ ናምዑ ፆሊንቶ ካላቻ ባ ሁዔን ዎꬂዳ ዴዒያ፥ ኢሲ ማጫሲያ ቤንታሱ። 2 ሄ ማጫሲያ ቃንꬄሺን፥ ኢዮ ኢቄꬂ ኦይኪን ኡንዔታዳ ዋሳሱ።
3 ቃሲ ሃራ ማላቲ ሳሎን ቤንቲስ። ላፑን ሁዔቲኔ ታሙ ካጬቲ ዴዒያ ጊታ ዞዖ ዳዌይ ቤንቲስ። ኢ ባ ሁዔታ ቦላ ላፑን ካላቻ ዎꬂስ። ዳኔ 7፡7 4 ሄ ዳዌይ ባ ጎይናን ፆሊንቶታፔ ሲኩዋ ሳሎፔ ዳፊዲ ሳዓን ዬጊስ። ሄ ዳዌይ ናዓይ ዬሌቲ ዎꬊዳ ሜላ ሚታናው ኮዪዲ፥ ዬላናው ኤቄቲያ ማጫሴ ሲንꬃን ኤቂስ። ዳኔ 8፡10
5 ሄ ማጫሲያ ካዎቴꬃ ኡባ ቢራታ ፃምዓን ሃራናው ዴዒያ ኣዴ ናዓ ዬላሱ። ናዓይ ፆሳኮኔ ኢያ ኣራታኮ ፑዴ ኤኬቲስ። ኢሳ 66፡7፤ ማዝ 2፡9 6 ማጫሲያ 1260 ጋላስ ጋካናው ኢዮ ናጋና ሜላ ፆሳይ ኢው ጊጊሲ ዎꬂዳ ቤሳ ባዞ ቢታ ባቃታሱ።
7 ሳሎን ኦሊ ሜꬌቲስ። ሚካዔሌይ ባ ኪታንቾታራ ዳዊያራ ኦሌቲስ፤ ዳዌይ ባ ኪታንቾታራ ጊዲዲ ዛሪ ኦሌቲስ። ዳኔ 10፡13 8 ሺን ዳዌይ ፆኔቲዲ ሳሎን ኤንታው ዴዒያ ቤሲ ꬋዪዶሶና። 9 ጊታ ዳዌይ፥ ቤኒ ሾሻይ፥ ሳዓን ዬጌቲስ። ኢካ ዳቡሎሳ ዎይኮ ፃላሄ ጌቴቲያ ኣላሚያ ባሌꬄይሳ። ኢ ባ ኪታንቾታራ ኢሲፌ ዱጌ ኣላሚያ ዬጌቲስ። ሜꬌ 3፡1፤ ሉቃ 10፡18
10 ሄሳፌ ጉዬ፥ ሳሎን ሃይሳዳ ያጊያ ቃላ ሲዓስ።
«ሃዒ ኣቶቴꬃይ፥ ዎልቃይኔ ካዎቴꬃይ፥ ኑ ፆሳሳ፤
ማታይ ኪሪስቶሳስ ጊዲስ።
ሂዛ፥ ቃማኔ ጋላስ ፆሳ ሲንꬃን፥
ኑ ኢሻታ ሞቴይሲ ሳሎፔ ዱጌ ሆሌቲስ። ኢዮ 1፡9
11 ኤንቲ ዶርሳ ሱꬃኒኔ ባንታ ማርካቴꬃ ቃላን፥
ኢያ ኦሊዲ ፆኒዶሶና።
ኤንቲ ባንታ ሼምፑዋስ ሚሼቶና
ባንታና ሃይቆስ ኣꬂ ኢሚዶሶና።
12 ሄሳ ጊሾ፥ ሳሎኒኔ ኢያ ጊዶን ዴዔይሳቶ ኡፋይቲቴ።
ሺን ቢታኔ ኣባ ኣዬ!
ሂዛ፥ ፃላሄይ ባው ጉꬃ ዎዴይ ኣቲዳይሳ ኤሪዳ ጊሾ
ዎልቃማ ሃንቆን ሂንቴኮ ዎꬊስ»
ያጊስ።
13 ቃሲ ዳዌይ ባና ሳዓ ዬጊዳይሳ ቤዒዳ ዎዴ ኣዴ ናዓ ዬሊዳ ማጫሲው ጎዲስ። 14 ማጫሲው ሾሻይ ቆሆና ሜላ ሄꬑ ላይꬂኔ ባጋ ማሼኔ ኡያሼ ኢያ ናጌቲያ ቤሲ ባዞ ቢታ ፒራꬋዳ ባና ሜላ ናምዑ ዎልቃማ ኣርጋንꬃ ቄፌይ ኢው ኢሜቲስ። ዳኔ 7፡25፤ 12፡7
15 ያቲዲ፥ ማጫሲው ዲዖይ ዲዒዲ ኤፋና ሜላ ዳዌይ ሻፋ ሃꬃ ሜላ ባ ዶናፔ ማጫሴ ጉዬራ ጮዪስ። 16 ሺን ቢታይ ማጫሲው ማዲስ፤ ቢታይ ባ ዶና ዶዪዲ ዳዊያ ዶናፔ ኬዪዳ ሃꬃ ሚቲስ። 17 ሄ ዳዌይ ማጫሴ ቦላ ዳሮ ሃንቄቲዲ፥ ኢ ዜሬꬃታ፥ ፆሳ ኪታ ናጌይሳታኔ ዬሱሲ ቆንጪሲዳ ቱማስ ኣማኔቲዳይሳታ ኦላናው ቢዲ። 18 ኣባ ጋፃን ዴዒያ ሻፊያን ኤቂስ።