1 A'e 'ar mehe teko paw uzegar putar nezewe wà nehe.

— Amume'u nekatu haw, O Tupàn Tuweharupi Wiko Ma'e.

Kwehe mehe erekwahy ihewe.

Nekwahy haw upaw kury.

Ko 'ar rehe hemurywete kar iko ne.

2 Tupàn wiko hepyro har romo.

Azeruzar hehe.

Nakyze kwaw nehe ta'e Tupàn Tuweharupi Wiko Ma'e umur ukàgaw ihewe a'e xe.

Hepyro har romo hekon.

3 Teko hurywete putar tuwe wà nehe. Wanurywete haw nuzawy kwaw ytyzuzàmaw pe waho haw nehe.

Uwi'u putar 'y pupe wà nehe, ikatu putar wanupe nehe, i'i putar uzegar pà wà nehe.

4 A'e 'ar mehe teko paw umuzàg putar ko zegar haw wà nehe.

— Pemume'u Tupàn Tuweharupi Wiko Ma'e ikatu haw nehe.

Pehapukaz pepytywà àwàm henoz pà Tupàn pe nehe.

Pemume'u hemiapo kwer teko paw wanupe nehe.

Pemume'u uhua'u haw wanupe nehe no.

5 Pemuzàg Tupàn Tuweharupi Wiko Ma'e ikatu haw rehe zegar haw nehe,

ta'e uzapo ikatuahy ma'e a'e xe.

Tuwe teko ywy nànànar ukwaw hemiapo kwer wà nehe.

6 Xiàw rehe har wà, penurywete nehe.

Pemume'u Tupàn ikatu haw nehe, ta'e Tupàn Izaew wazar Ikatuahy Ma'e Ikàg Ma'e a'e xe,

wiko wemiaihu wainuinuromo a'e xe.