2 — Peupir pànuhu zeàmàtyry'ymawhu pe purenoz taw nehe,

amo ywytyr ka'a heta 'ym ma'e rehe nehe. Nezewe mehe teko paw upuner hexakaw rehe wà nehe.

Eze'eg wàmàtyry'ymar wanupe nehe. — Pezàmàtyry'ym peho pe wà nehe, peze wanupe nehe.

— Peupir pepo wanenataromo nehe.

Hexak mehe wixe putar tawhu uhua'u ma'e pupe ukenaw rupi nehe.

3 Tupàn Tuweharupi Wiko Ma'e wenoz wemiruze'eg zauxiapekwer wanereko a'e wà.

Wenoz zauxiapekwer ipuruzukaiwahy ma'e wanereko wà. Hurywete wàmàtyry'ymar waneityk mehe wà.

Wenoz wanereko a'e wà. — Pezepyk ko teko wanehe nehe, ta'e aikwahy wanupe ihe xe, i'i iko wanupe.

4 Peinu iànoànogaw nehe. Nuzawy kwaw teko tetea'u ywytyruhu rehe heiheihem ma'e wà.

Zauxiapekwer tetea'u uzemono'og ma'e wànoànog waiko wà.

Zauxiapekwer ywy tetea'u rehe har uzemono'og zeàmàtyry'ymawhu rehe wà.

Tupàn Tuweharupi Wiko Ma'e Ikàg Wera'u Ma'e umuàgà'ym zauxiapekwer wanereko zeàmàtyry'ymawhu pe wà.

5 Zauxiapekwer ur waiko Per ywy wi wà. Muitea'u waiwy.

Ywy ahykaw wi wanur waiko wà.

Wikwahy mehe Tupàn Tuweharupi Wiko Ma'e

umumaw kar putar Mawiron a'e zauxiapekwer wanupe upaw rupi wà nehe.

6 Pezai'o nehe. Pehapukaz nehe. Ta'e Tupàn Tuweharupi Wiko Ma'e i'ar uhem iko kury xe.

Purumumaw pàwàm pureityk àwàm Tupàn Ikàg Wera'u Ma'e hemimur kar a'e, namuite kwaw a'e.

7 Teko paw wazywa upytu'u ukàg ire wà nehe.

Wàzà'à ututututuk putar na'arewahy wera'u ukyze haw rehe wà nehe no.

8 Wakyze haw uzeapo putar wazar zàwenugar romo nehe.

Upuraraw putar ma'erahy kuzà imemyrahy ma'e ài wà nehe.

Uzeruwaruwak kuzà umemyrzexak kar ma'e ài wà nehe.

Ume'eme'e putar uzehezehe ma'e wi ukyze haw pupe utynehem ma'e romo wà nehe.

Wanuwa ipiràg putar umaranugar haw rehe wà nehe no.

9 Tupàn Tuweharupi Wiko Ma'e i'ar uhem wà iko a'e kury.

Iaiw putar a'e 'ar ikwahy haw ipuruzukaiw ma'e herur har nehe.

Umuaiw putar ko ywy nehe.

Uzuka putar ikatu 'ym ma'e iapo har wà nehe.

10 Zahytata paw upytu'u putar weny katu re wà nehe.

Uhem ire na'arewahy kwarahy ipihun putar nehe.

Zahy upytu'u weny katu re a'e nehe no.

11 Tupàn Tuweharupi Wiko Ma'e uze'eg nezewe.

— Azepyk putar ywy nànànar wanehe wakatu 'ymaw hekuzaromo nehe.

Azepyk putar teko iaiw ma'e wanehe wanemiapo kwer ikatu 'ym ma'e hekuzaromo nehe.

Amo teko wiko wera'u amogwer wanuwi wà. Amupytu'u kar putar nezewe waze'eg ire ihe wà nehe. — Aiko wera'u amogwer wanuwi ihe, ni'i wi kwaw wà nehe.

Apyro teko ipuruzukaiw ma'e wakàgaw wanuwi ihe.

12 Wanehe hezepyk ire teko wikuwe ma'e naheta tete kwaw wà nehe. Xo màràn zo heta putar wà nehe.

Wiko putar or zàwenugar romo wà nehe. Naheta tete kwaw or ko ywy rehe a'e no. Or ikatuahy ma'e Opir parer zo pixika'i zo heta. Nezewegatete naheta tetea'u kwaw teko ikatu ma'e a'e wà nehe no.

13 Ihe Tupàn Tuweharupi Wiko Ma'e Ikàg Wera'u Ma'e

aexak kar putar hekwahy haw hepuruzukaiw paw amo 'ar mehe nehe.

A'e 'ar mehe amuryryryryz kar putar ywak ihe nehe.

Amunyryk kar ywy henaw wi nehe no.

14 Amo ae ywy rehe arer Mawiron ywy rehe wiko ma'e wà nehe, uzàwehem putar a'e wi wà nehe,

uiwy rehe uzewyr pà wà nehe.

Arapuha uzàwehem oho uzuka àràm wanuwi wà. A'e teko uzàwehem putar nezewegatete wà nehe no.

Nuzawy kwaw àràpuhàràn hawitu ma'e wanehe uzekaiw ma'e hereko 'ymar wà nehe.

15 Waàmàtyry'ymar zauxiapekwer upyhyk putar amo wà nehe, waàpixipixi pà kyhàhàmtàtà pupe wà nehe.

Na'e zauxiapekwer uzuka putar a'e teko utakihepuku pupe wà nehe.

16 Uzuhazuhaw putar kwarer wanu

wanenataromo wà nehe.

Wixe putar wanàpuz me wama'e rehe imunar pà wà nehe.

Uzapo putar iaiw ma'e wanemireko wapuhe wà nehe no.

17 Amukyze kar putar teko Mawiron ywy rehe har Per ywy rehe har wanuwi ihe wà nehe.

Per rehe har nuputar kwaw itaxig parat wà Itazu or numurywete kar kwaw a'e teko a'e wà.

18 Uzuka putar kwàkwàmo u'yw pupe wà nehe. Uzuka putar kuzàwaza u'yw pupe wà nehe no.

Uzuka putar kwarearer wà nehe. Uzuka putar kuzàtàigwer wà nehe no. Uzuka putar pixika'i ma'e wà nehe no.

Uzuka putar wapuhareko 'ym pà wà nehe.

19 — Ikatuahy Mawiron tawhu a'e, i'i a'e pe har wà.

— Ipuràg eteahy zanereko haw a'e, i'i wà.

Waneko haw uzeapo putar imumaw pyrer Xotom tawhu zàwenugar romo nehe, Komor tawhu zàwenugar romo nehe no:

ta'e amumaw putar ihe wà nehe xe a'e tawhu wamumaw pawer zàwegatete ihe wà nehe.

20 Mawiron uzeapo putar teko heta 'ymaw romo nehe.

Ni amo nuiko wi pixik kwaw a'e pe wà nehe.

Teko Ar her ma'e wata ma'e numuapyk pixik kwaw wàpuzràn a'e pe wà nehe.

Ni amo àràpuhàràn hawitu ma'e wamono'ogar nueraha pixik kwaw weimaw a'e pe wapoz pà wà nehe.

21 Miar ywyxiguhu rehe har wiko putar a'e tawhu pupe wà nehe.

Tàpuz tynehem putar pypy pupe wà nehe no.

Wiranu wiko putar a'e pe wà nehe.

Àràpuhàrànete hehaite ma'e opoopor putar a'e pe tàpuz gwer heityk pyrer i'aromo wà nehe.

22 Zawar hehaite ma'e ien her ma'e wà nehe, awara wà nehe no,

Uze'eg putar tàpuzaiha pupe wà nehe, tàpuzuhu pupe wà nehe no.

Mawiron i'ar uhem wà iko.

Na'iàrew kwaw kury, i'i Tupàn Tuweharupi Wiko Ma'e.