1 Teko ywy nànànar wà, pezur pezeapyaka pà nehe.

Teko wà, pezemono'og ko ma'e rehe peme'egatu pà nehe.

Tuwe ywy nànàn wiko ma'e

wenu katu ko ma'e wà nehe.

2 Tupàn Tuweharupi Wiko Ma'e wikwahy ywy nànàn a'e.

Wikwahy zauxiapekwer ywy nànànar wanupe upaw rupi a'e.

Umume'u wazuka àwàm kwez kury. Umume'u wamumaw pàwàm kwez kury.

3 Umàno ma'e kwer upyta putar u'ar awer pe wà nehe.

Inem wà. Wanemahy haw uhàuhàz putar taw nàn nehe.

Wanuwykwer uwyryk putar ywytyruhu wanuwi nehe.

4 Tupàn umumaw putar kwarahy nehe, zahy nehe no, zahytata wà nehe no.

Ywak uzemàzemàn putar pape huwer ài nehe.

Huwer u'ar uwà 'yw wi wà. Huwer u'ar pi 'yw wi wà.

Nezewegatete zahytata paw u'ar putar ywak wi nehe.

5 Tupàn Tuweharupi Wiko Ma'e umuàgà'ym utakihepuku ywate kury.

Tupàn Tuweharupi Wiko Ma'e umume'u teko Enom izuapyapyr wamumaw pàwàm a'e.

Uzuka putar Enom izuapyapyr utakihepuku pupe nehe.

6 Aze teko uzuka àràpuhàràn hawitu ma'e Tupàn henataromo wà, aze uzuka àràpuhàrànete henataromo wà,

wanuwykwer a'e, wakawer a'e no, upyk watakihe a'e wà.

Nezewegatete Enom wanuwykwer upyk putar Tupàn itakihepuku nehe.

Wakawer upyk putar itakihepuku nehe no,

Mozira tawhu pe wazuka mehe nehe no.

7 Uzuka putar tapi'ak hehaite ma'e a'e teko wanehe we wà nehe no.

Uzuka putar tapi'aka'yr kuzà wà nehe. Uzuka putar tapi'aka'yr awa wà nehe no.

Wanuwykwer umuàkym putar ywy 'y ài nehe.

Wakawer upyk putar ywy nehe no.

8 A'e 'ar uzeapo putar Tupàn izepykaw 'ar mehe nehe.

A'e 'ar mehe uzepyk putar Xiàw iàmàtyry'ymar wanehe wanemiapo kwer ikatu 'ym ma'e hekuzaromo nehe.

9 Yrykawhu Enom ywy rehe har uzeapo putar iraity zàwenugar romo wà nehe.

Ywy uzeapo putar ywyku'i exopere her ma'e romo nehe.

Ywy paw ukaz putar iraity zàwenugar ài nehe.

10 A'e tata nuwew pixik kwaw nehe.

Hàtàxiner nupytu'u pixik kwaw uzeupir ire nehe.

Iaiw putar a'e ywy nehe. Nupaw kwaw iaiw paw izuwi nehe.

Ni amo noho kwaw a'e pe wà nehe.

11 Pypy wà nehe, zàpuun wà nehe no, wiko putar a'e ywy izar romo wà nehe.

Uzapo putar waity a'e ywy nànàn wà nehe.

Tupàn Tuweharupi Wiko Ma'e umuigo kar putar a'e ywy

teko heta 'ymaw romo nehe, tuwihaw heta 'ymaw romo nehe.

Izypy mehe ywy iapo mehe naheta kwaw teko a'e ywy rehe. Iahykaw rehe nuzawy kwaw izypy mehe arer nehe.

12 Enom izuapyapyr nuwereko kwaw awa uwihawete romo wà nehe.

Naheta kwaw tuwihaw a'e pe wà nehe.

13 Xu 'yw hezuz putar teko hemetarer katu ma'e wanàpuzuhu wapupe nehe.

Ka'a uzeapo putar tàpuztàtà wazar romo nehe no.

Awara oho putar Enom ywy rehe wiko pà wà nehe. Wiranu oho putar a'e ywy rehe wiko pà wà nehe no.

14 Marakaza wà nehe, amo miar wà nehe no, wiko putar a'e pe wà nehe.

Tekwe ikatu 'ym ma'e uhapukaz putar uzeupeupe a'e pe wà nehe.

Kuzà ipaze ma'e ywyxiguhu rehe har pyhaw uzexak kar ma'e wexak putar upytu'u àwàm a'e pe nehe no.

15 Pypy uzapo putar waity a'e pe wà nehe.

Upi'amomor putar wà nehe. Ukwaku putar wà nehe.

Upyk putar umemyr upepo pupe wà nehe.

Apitaw uzemono'og putar a'e pe wà nehe no.

Pitàitàigatu uzemono'og putar uzehe we har wainuromo wà nehe.

16 Pekar Tupàn Tuweharupi Wiko Ma'e ipape nehe. Pemugeta nehe:

Ma'ea'yr xe heremimume'u kwer paw wiko putar a'e pe wà nehe.

Upaw rupi wiko putar a'e pe uzehe we har wainuromo wà nehe,

ta'e Tupàn Tuweharupi Wiko Ma'e umuigo kar putar a'e pe wà nehe xe.

Hekwe omono'og putar a'e miar a'e ma'ea'yr paw a'e pe wà nehe.

17 Tupàn Tuweharupi Wiko Ma'e umuza'aza'ak Enom iziwy kwer a'e miar wanupe

ipegegwer imonomono pà pitàitàigatu nehe.

A'e pe umumaw putar kwarahy tetea'u wiko pà wà nehe.

Nupytu'u kwaw a'e pe wiko re wà nehe.