1 Ywyxiguhu hurywete putar nehe.

Ma'eputyr hezuz putar ywy uxinig ma'e kwer rehe nehe.

2 Ywyxiguhu ma'eputyr pupe tynehem mehe uzegar putar urywete haw rupi nehe.

Tupàn umupuràg eteahy kar putar ywytyruhu Irimano ywy rehe har ài nehe.

Ma'e itym pyrer hezuz katu i'a katu Karamew ywytyr rehe, Xarom ywyàpyznaw rehe no. Nezewegatete ma'e itym pyrer hezuz katu putar nehe. I'a katu putar a'e ywyxiguhu rehe nehe no.

Teko paw wexak putar Tupàn Tuweharupi Wiko Ma'e ikàgaw wà nehe. Wexak putar ipuràg eteahy haw wà nehe no.

Wexak putar Zanezar uhua'u haw wà nehe.

3 Pemukàg pepo ikene'o ma'e nehe.

Pemukàg pepenàràg ikàg 'ym ma'e nehe no.

4 Peze'eg nezewe uzemumikahy ma'e wanupe nehe.

— Pekyze zo nehe. Penurywete nehe,

ta'e Tupàn Zanezar wiko xe a'e xe.

Ur zanepyro pà a'e.

Ur zaneàmàtyry'ymar wanehe uzepyk pà no, peze wanupe nehe.

5 Na'e hehàpyhà 'ym ma'e wexak putar wà nehe.

Iapyha 'ym ma'e wenu putar a'e wà nehe no.

6 Wata 'ym ma'e opoopor putar wà nehe. Upynyk putar wà nehe no.

Uze'eg 'ym ma'e uzegar putar urywete haw rupi wà nehe.

Ytyzuzàmaw upupur putar ywyxiguhu rehe wà nehe.

Yrykawhu uwyryk putar ywy uxinig ma'e kwer rupi wà nehe no.

7 Ywyxig ywyxiguhu rehe har hakuahy ma'e uzeapo putar ypawhu romo nehe.

Heta tetea'u putar ytyzuzàmaw ywy uxinig ma'e kwer rehe wà nehe.

Xo amo miar zo wiko a'e pe ko 'ar rehe wà.

A'e ywyxig rehe hezuz putar wywàràn a'e nehe. Hezuz putar ka'api'i popok a'e pe a'e nehe no. A'e ywy iàkym wewer putar nehe.

8 Heta putar pe a'e pe nehe.

— Ikatuahy haw, i'i putar teko a'e pe henoz pà wà nehe.

Ikatu 'ym ma'e nuwata kwaw a'e pe rupi wà nehe.

Tupàn hemiaihu wiko a'e pe izar romo wà.

Te ma'e ikwaw katu 'ymar upuner putar hupi wata haw rehe

uzeàmim 'ym pà wà nehe.

9 Naheta kwaw zàwàruhu iriàw a'e pe rupi wà nehe.

Miar nuwata kwaw oho hupi wà nehe.

Xo ipyro pyrer zo wata putar hupi wà nehe.

10 Tupàn Tuweharupi Wiko Ma'e hemipyro kwer uzewyr putar weko haw pe wà nehe.

Uzewyr putar Zeruzarez pe uzegar pà wà nehe.

Wiko putar a'e pe tuweharupi urywete romo wà nehe.

Turywete haw nehe, zemumikahy 'ymaw nehe, wainuinuromo wanuz tuweharupi wà nehe.

Naheta kwaw zemumikahy haw a'e pe nehe. Teko nuzai'o kwaw a'e pe wà nehe.