1 Tupàn Tuweharupi Wiko Ma'e Zanezar uze'eg nezewe.

— Pemurywete kar heremiaihu pe wà nehe. Pemupytu'u kar wazemumikahy re pe wà nehe.

2 Peme'egatu Zeruzarez tawhu pe har wanupe nehe.

— Upaw pemunehew paw kwez kury, peze wanupe nehe.

— Tupàn umunàn penemiapo kwer ikatu 'ym ma'e kwez pewi kury, peze wanupe nehe.

Azepyk wanehe mokoz haw

wanemiapo kwer hekuzaromo, i'i Tupàn.

3 Amo uhapukaz iko.

— Pemuàgà'ym amo pe ywyxiguhu rehe Tupàn Tuweharupi Wiko Ma'e pe nehe.

Pezapo pe hy'ygatu ma'e zanezar iho àwàm romo nehe.

4 Umynehem putar ywyàpyznaw ywy pupe wà nehe.

Umumew putar ywytyr wà nehe no.

Ywy iaiha ma'e uzemumew putar nehe. Ywy ipew ma'e uzeupir putar uzemuhym pà nehe no.

Ywy ywytyruhu hereko har uzeapo putar ihym ma'e romo nehe.

5 Na'e Tupàn Tuweharupi Wiko Ma'e wexak kar putar ukàgaw upuràgaw a'e nehe.

Teko paw wexak putar wà nehe.

Tupàn Tuweharupi Wiko Ma'e ae umume'u a'e ma'e iapo àwàm a'e.

6 Tupàn uze'eg nezewe. — Emume'u ko ze'eg nehe, i'i.

— Ma'e ze'eg amume'u putar nehe, a'e izupe hehe hepuranu pà.

— Teko paw nuzawy kwaw ka'api'i ko pe har wà.

Wakàgaw nuzawy kwaw ma'eputyr kaiwer pe har ikàgaw.

7 Ka'api'i uxinig ma'e kwer a'e, ma'e putyr no,

aze Tupàn Tuweharupi Wiko Ma'e upy wanehe, u'ar a'e.

Azeharomoete teko nuzawy kwaw ka'api'i wà. Aze Tupàn uzepyk wanehe, wakàgaw uhem wanuwi.

8 Uxinig ka'a kyr. Iputyr u'ar.

Nezewe rehe we Tupàn ze'eg nupaw pixik kwaw nehe, ere purupe nehe, i'i ihewe.

9 Ne Zeruzarez tawhu pe uzeapo ma'e kwer ikatu ma'e imume'u har ne,

ezeupir eho amo ywytyr iaiha ma'e rehe nehe.

Ne Xiàw pe ikatu ma'e uzeapo ma'e kwer imume'u har ne,

eze'eg wahy har rupi imume'u mehe nehe.

Eze'eg tawhu Zuta ywy rehe har wanupe nekyze 'ym pà nehe.

Eze'eg wahy har rupi.

— Tupàn pezar uhem iko a'e, ere wanupe nehe.

10 Tupàn Tuweharupi Wiko Ma'e Zanezar ur iko ukàg romo a'e.

Uzywa pureityk ma'e pupe umumaw putar wàmàtyry'ymar a'e wà nehe.

Werur putar teko wemipyro kwer uzeupi tur mehe wà nehe.

11 Àràpuhàràn mono'ogar uzekaiw katu weimaw wanehe.

Nezewegatete Tupàn Tuweharupi Wiko Ma'e uzekaiw katu putar wemiaihu wanehe nehe.

Omono'og putar àràpuhàràna'yr uzywa rehe upuxi'a huwake wà nehe.

Weraha katu àràpuhàràn hawitu ma'e umemyr wamukamu har wà nehe no.

12 Mo upapar 'y yryhu pe har opo pupe wà. Ni amo wà.

Mo wexak ywak uhua'u haw ukwà pupe wà. Ni amo wà.

Mo upapar ywy ywy nànànar

heta haw kawaw pupe wà. Ni amo wà.

Mo upapar ywytyruhu wà, mo upapar ywytyr wà, puhuz haw hagapaw pupe wà. Ni amo wà.

13 Mo upuner Tupàn Tuweharupi Wiko Ma'e ima'enukwaw paw ikwaw paw rehe wà. Ni amo wà.

Mo upuner Tupàn Tuweharupi Wiko Ma'e heruze'egaw rehe wà. Ni amo wà.

14 Mo umu'e ma'e rehe wà. Mo umume'u purumu'e haw izupe wà. Ni amo wà.

Mo umu'e teko waneruze'egatu haw rehe wà.

Mo ipurumu'e wer hehe amo ma'e rehe wà.

Mo ukwaw kar ma'e kwaw par romo heko àwàm izupe wà.

15 Ywy paw nuzawy kwaw 'y pitài tykyr haw y'a pupe har

Tupàn Tuweharupi Wiko Ma'e pe wà.

Nuzawy kwaw pitài ywy iku'i kwer puhuz haw hagapaw rehe har izupe.

Weraha yrypypo'o muite har opo pe pitài ywyxig imuku'i pyrer ài.

16 Irimano ywy rehe ma'ea'yr paw nuhyk kwaw izuka pyràm romo Tupàn henataromo wà.

Ta'e ikatuahy a'e xe.

Ywyra a'e ywy rehe har paw nuhyk kwaw zepe'aw romo a'e tata pe no.

17 Ywy paw nuzawy kwaw pixika'i ma'e izupe wà.

Henataromo nahekuzar pixik kwaw wà.

18 Mo ikàg Tupàn ài wà.

Mo wiko izàwe wà. Ni amo wà.

19 Nuiko kwaw ma'eragapaw awa hemiapo kwer zàwe a'e.

Ma'eragapaw iapo har upeao wemiapo kwer or pupe wà.

Uzapo parat ipuràg ma'e romo a'e wà. Upyupyk a'e ma'eragapaw ipuràg ma'e parat iapo pyrer pupe wà.

20 Aze amo hemetarer nuhyk kwaw parat hekuzaromo nehe, aze ru'u or hekuzaromo nehe,

a'e teko ume'eg kar ywyra ikatu ma'e.

Wekar iapo har ikwaw katu har.

Uzapo kar ma'eragapaw izupe. A'e ma'eragapaw upyta katu wenaw rehe a'e.

21 Aipo napekwaw kwaw ko ma'e.

Aipo ni amo numume'u kwaw peme wà.

Kwehe ni amo numume'u kwaw ywy iapo awer peme wà,

numume'u kwaw ywy iapo arer peme wà.

22 Ma'e paw iapo har

wapyk wenaw rehe ywate a'e.

Muite ywy wi a'e.

A'e rupi teko nuzawy kwaw tahyw izupe wà.

A'e ae upupirar ywak pànuhu ài.

Umuàgà'ym tàpuzràn ài weko àwàm romo.

23 A'e ae weityk tuwihawete ikàg ma'e wà.

A'e ae umumaw tuwihaw upuner ma'e wakàgaw.

24 A'e tuwihaw nuzawy kwaw ma'e hezuz romo ma'e kwer wà.

Pixika'i wanapo.

Aze Tupàn upytuhem wanehe, uxinig wà.

Ywytu weraha muite ka'a ruwer uxinig ma'e ài wà.

25 Mo ikàg Tupàn Ikatuahy Ma'e ài wà.

Mo wiko izàwe wà.

26 Peme'e ywate zahytata wanexak pà nehe.

Mo uzapo wà.

A'e ae umuata kar zahytata ywak rehe zauxiapekwer wazàwe wà.

Ukwaw waneta haw.

Ukwaw waner pitàitàigatu no. Ukwaw waner paw rupi wà.

Ikàgaw uhua'u. Ipuner haw uhua'u.

A'e rupi zahytata paw uwazar ize'eg izupe wà.

27 Teko Izaew izuapyapyr wà: màràzàwe tuwe peze'eg pezemumikahy haw rupi.

— Tupàn Tuweharupi Wiko Ma'e nuzekaiw kwaw zanerehe, peze peiko.

— Tupàn Tuweharupi Wiko Ma'e nume'e kwaw zanereko haw rehe, peze peiko. Màràzàwe tuwe peze'eg nezewe.

28 Aipo napekwaw kwaw ko ma'e.

Aipo ni amo numume'u kwaw peme wà.

Tupàn Tuweharupi Wiko Ma'e uzapo ywy paw a'e.

Tuweharupi upureruze'eg a'e no.

Na'ikene'o kwaw. Nuiko pixik kwaw ikene'o ma'e romo.

Ni amo nupuner kwaw ima'ekwaw paw uhua'u haw ikwaw paw rehe wà.

29 Omono ukàgaw ikene'o ma'e wanupe.

Umukàg kar ikàg 'ym ma'e ukàgaw pupe wà.

30 Te kwàkwàmo ikene'o wà.

Uzepyapi u'ar pà wà.

31 Tupàn Tuweharupi Wiko Ma'e rehe uzeruzar ma'e

ikàg wi wi tuweharupi wà.

Uwewe ywate wiràhu ài wà.

Uzàn ukàgaw heityk 'ym pà wà.

Wata ukene'o 'ym pà wà.