1 Nezewe uze'eg Tupàn Tuweharupi Wiko Ma'e.

— Teko ywy muite har rehe har wà, Pepytu'u peze'eg ire. Pezeapyaka katu nehe.

Pemupyahu pekàgaw nehe.

Pezur penemiapo kwer ikatu ma'e imume'u àwàm rehe pezemuàgà'ym pà nehe.

Zazemono'og nehe. — Mo ikatu, za'e putar zanezehezehe zanepuranu pà nehe.

2 Tuwihawete kwarahy ihemaw kutyr har weityk amogwer tuwihawete paw rupi a'e wà.

Mo werur a'e tuwihawete xe.

Mo weityk kar ywy paw izupe wà.

Mo uzuka kar tuwihawete izupe wà.

Umuigo kar a'e tuwihawete ywy imuku'i pyrer romo

utakihepuku pupe u'yw pupe wà.

Umuzàwehem kar ka'a ruwer uxinig ma'e ywytu hemiraha ài wà.

3 Oho wanaikweromo ukyze 'ym pà.

Zànetea'u a'e, a'e rupi ipy nupyrog ma'e ài kwaw ywy rehe.

4 Mo umume'u ko ma'e uzeapo ma'e ràm paw a'e. Mo uzapo kar paw rupi a'e.

Mo umuzeapo kar ma'e ywy rehe 'ar izypy henataromo.

Ihe Tupàn Tuweharupi Wiko Ma'e ihe.

Aiko xe izypy mehe ma'e paw iapo 'ym mehe we ihe.

Aiko putar xe ma'e paw ipaw ire nehe no, i'i Tupàn.

5 Teko ywy muite har wexak ma'e izeapo mehe wà.

Teko ywy nànànar uryryryryz ukyze pà wà.

A'e rupi ur xe uzemono'og pà wà.

6 Ma'e hagapaw iapo har uzepytywàtywà wà.

Pitàitàigatu uzeagaw uzehe we har imurywete kar pà wà.

7 Ywyra ikixi har umurywete kar or imuapu'a har,

itaper inupà haw pupe inupà har a'e,

uze'egatu tupàn a'ua'u imuhykar pe a'e.

— Ikatuahy neremiapo kwer, i'i izupe.

Umupu'àgatu kar tupàn a'ua'u wanagapaw wapu'àm àwàm pe itaxu pupe wà. Nezewe mehe nu'ar kwaw upu'àmaw wi wà nehe.

8 Tupàn Tuweharupi Wiko Ma'e uze'eg teko Izaew wanupe.

— Peiko heremiruze'eg romo.

Peiko heremixamixak kwer romo.

Àmàrààw hemyrypar izuapyapyr romo peiko.

9 Apuerur ywy iahykaw rehe har wi ihe.

Apuerur ywy muite wera'u ma'e wi.

— Peiko heremiruze'eg romo, a'e peme.

Apuexaexak ihe. Napuityk pixik kwaw.

10 Pekyze zo nehe ta'e aiko pepyr ihe xe.

Pekyze wera'u zo nehe, ta'e aiko pezar romo ihe xe.

Amono hekàgaw peme pepytywà pà.

Apupyro ikatu 'ymaw wi hepo ikàg ma'e pupe.

11 Aityk putar peàmàtyry'ymar paw rupi ihe wà nehe.

Amuigo kar putar ikàg 'ym ma'e romo ihe wà nehe.

Peàmàtyry'ymar paw amumaw putar ihe wà nehe.

Umàno putar upaw rupi wà nehe.

12 Aze pekar peàmàtyry'ymar pe wà nehe,

napexak kwaw pe wà nehe,

ta'e ukàzym putar upaw rupi wà nehe xe.

13 Aiko Tupàn Tuweharupi Wiko Ma'e pezar romo ihe.

Apupyhyk pepo rehe peme heze'eg pà.

— Pekyze zo nehe, ta'e apupytywà putar ihe nehe xe, a'e peme.

14 Tupàn Tuweharupi Wiko Ma'e uze'eg wemiaihu wanupe.

— Napeneta tetea'u kwaw. Napekàg kwaw.

Nezewe rehe we pekyze zo nehe,

ta'e ihe Tupàn Izaew wazar Ikatuahy Ma'e ihe xe,

aiko pepyro har romo ihe xe.

Apupyro putar ikatu 'ymaw wi nehe.

15 Apumuigo kar putar arozràn iapirer henuhemaw ài nehe.

Penàz zàwenugar ipyahu ma'e haime katu takihe ài.

Peho putar ywytyr wanehe nehe. Ywytyr uzeapo putar ywy imuku'i pyrer romo wà nehe.

Ywytyruhu uzeapo putar ka'a ruwer uxinig ma'e zàwenugar romo wà nehe.

16 Pemomor putar ywate pe nehe.

Ywytu weraha putar wà nehe.

Ywytu ikàg wera'u ma'e umuhàmuhàz putar wà nehe.

Na'e penurywete putar nehe, ta'e ihe Tupàn Tuweharupi Wiko Ma'e aiko pezar romo ihe xe.

Hemuwete katu putar pe nehe. Aiko Tupàn Izaew wazar Ikatuahy Ma'e romo ihe.

17 Amo 'ar mehe heremiaihu nahemetarer katu kwaw wà nehe.

Wekar putar 'y oho wà nehe. Nuexak kwaw wà nehe.

Wazuru uxinig putar waiwez mehe wà nehe.

A'e 'ar mehe ihe Tupàn Tuweharupi Wiko Ma'e azekaiw putar wanehe ihe nehe.

Ihe Tupàn Izaew wazar natyryk kwaw wanuwi ihe nehe.

18 Amuyryk kar putar ytyzuzàmaw ywyàpyznaw uxinig ma'e wanehe ihe nehe.

Amuyryk kar putar yrykawhu ywytyruhu ka'a heta 'ymaw rehe ihe nehe no.

Azapo putar ywyxiguhu ypawhu romo nehe.

Azapo putar 'yzygwar tetea'u ywy uxinig ma'e rehe ihe wà nehe no.

19 Azutym putar ywyra tetea'u ywyxiguhu rehe ihe wà nehe:

Ywyràkàxigyw, ywyra akaz her ma'e, ywyra muruta her ma'e, uri 'yw.

Ywy uxinig ma'e rehe amuezuz kar putar ywyra pin her ma'e wà nehe,

zimiro her ma'e wainuromo wà nehe, xip her ma'e wainuromo wà nehe no.

20 Teko paw wexak putar uzeapo ma'e kwer a'e wà nehe.

Ukwaw putar Tupàn Tuweharupi Wiko Ma'e a'e ma'e paw iapo har romo hereko haw a'e wà nehe.

Teko paw ima'enukwaw katu putar wà nehe.

— Tupàn Ikatuahy Ma'e Izaew wazar uzapo a'e ma'e paw a'e, i'i putar uzeupeupe wà nehe, i'i Tupàn uzeupe.

21 Tupàn Tuweharupi Wiko Ma'e Izaew wazar uze'eg kury.

— Tupàn ywy nànànar wazar wà, pezur penemimutar imume'u pà nehe.

Pemume'u penemiapo kwer nehe.

22 Pezur uzeapo ma'e ràm imume'u pà urewe nehe.

Pemume'u katu uzeapo ma'e ràm penemimume'u kwer kwehe arer nehe no.

Nezewe mehe urukwaw putar pekàgaw nehe. — Aipo uzeapo tuwe ma'e peze'eg awer rupi, uru'e putar peme nehe.

Pemume'u ma'e uzeapo ma'e ràm nehe.

A'e mehe urexak putar nehe, aze uzeapo tuwe a'e ma'e nehe.

23 Pemume'u ma'e uzeapo ma'e ràm ko 'ar henataromo àràm nehe.

Nezewe mehe urukwaw putar tupànete romo peneko haw nehe.

Pezapo penemimutar ikatu ma'e nehe. Aze ru'u, pezapo penemimutar ikatu 'ym ma'e nehe.

Nezewe mehe urukyze putar tuwe pewi nehe.

24 Azeharomoete napeiko kwaw ikàg ma'e romo.

Napepuner kwaw ma'e iapo haw rehe.

Naheakatuwawahy kwaw pemuwete har wanehe ihe.

25 Ihe ainoz amo awa kwarahy ihemaw kutyr har rehe har ihe.

Uzeruzar herehe a'e.

Ur putar kwarahy heixe haw awyze har wi nehe, wàmàtyry'ymar waàmàtyry'ym pà nehe.

Upyrog tuwihawete wanehe a'e. Nuzawy kwaw to'om izupe wà.

Zapepo iapo har upyropyrog ywy rehe upy pupe.

Nezewegatete a'e awa upyrog wàmàtyry'ymar wanehe.

26 Aipo amo tupàn a'ua'u peinuromo har umume'u a'e ma'e izeapo àwàm wà.

Aipo ukwaw kar hemiapo ràm urewe wà.

Aipo amo tupàn umume'u a'e ma'e wà.

Aze mo amo umume'u, — Azeharomoete ukwaw ma'e uzeapo ma'e ràm a'e, uru'e mo izupe.

Ni amo tupàn a'ua'u hagapaw numume'u kwaw tur àwàm wà.

Ni amo nuze'eg kwaw urewe wà.

Nurenu kwaw ni pitài waze'egaw ure.

27 Ihe amume'u ko ma'e Xiàw rehe har wanupe izypy mehe ihe.

Amono kar ko ze'eg ikatu ma'e imume'u har Zeruzarez tawhu pe har wanupe ihe.

28 Aekar a'e tupàn ihe wà. Ni amo nuzexak kar kwaw ihewe wà.

Ni amo nupuner kwaw ma'e imume'u katu haw rehe ihewe wà.

Apuranu wanehe. Nuwazar kwaw heze'eg ihewe wà.

29 Nuiko kwaw wikuwe ma'e romo wà.

Nupuner kwaw ma'e iapo haw rehe wà.

Ko ma'eragapaw nuiko kwaw wikuwe ma'e romo wà. Ma'e iapo har 'ym romo wanekon wà,