52
Tupàn upyro Zeruzarez pe har a'e wà
1 Eme'e, Zeruzarez, eme'e kury,
ezemukàg wi nehe.
Tawhu Tupàn pe imonokatu pyrer, emunehew neropoz hekuzar katu wera'u ma'e nehe.
Tupàn rehe uzeruzar 'ym ma'e a'e wà nehe, a'e teko iaiw ma'e a'e wà nehe,
nuiko pixik kwaw nepyr a'e wà nehe.
2 O Xiàw, tawhu ipuràg eteahy ma'e.
Ipyhyk pyrer romo ereiko, ko 'ar rehe ereapyk ywy rehe.
Emonohok kyhàhàm tàtà ma'e heityk pà nehe.
Epu'àm nehe, emutuhutuhug ywy ywy ku'i kwer neropoz wi nehe.
Eapyk nerenaw rehe nehe, tuwihawete henaw rehe nehe.
3 Tupàn Tuweharupi Wiko Ma'e uze'eg wemiaihu wanupe.
— Kwehe mehe zauxiapekwer peneraha amo ae ywy rehe wà, uma'ereko e ma'e romo pemuigo kar pà wà. A'e 'ar mehe ni amo nomono kwaw temetarer amo pe penekuzaromo wà. A'e rupi ihe namono kwaw temetarer amo pe penekuzaromo ihe nehe no, pema'ereko e haw wi pepyro pà ihe nehe no.
4 Zanezar Tupàn Tuweharupi Wiko Ma'e uze'eg kury.
— Kwehe mehe heremiaihu oho Ezit ywy rehe wà, a'e pe wiko pà wà. Oho wà, ta'e iho wer wà xe. Amo kwarahy pawire Axir weraha wemipyhyk romo uma'ereko e ma'e romo uiwy rehe wà. Nomono kwaw temetarer wanekuzaromo wà. 5 Ma'e aexak ko 'ar rehe kury. Mawiron uzapo ma'e Axir wanemiapo kwer zàwenugar wà no. Weraha heremiaihu uma'ereko e ma'e romo wamuigo kar pà wà no. Nomono kwaw temetarer wanekuzaromo wà. Waneraha har uhapukaz wà, ta'e weityk heremiaihu wà. Uze'eg zemueteahy herehe upytu'u 'ym pà wà. 6 Heta putar amo 'ar mehe nehe. A'e 'ar mehe heremiaihu ukwaw putar herer a'e wà nehe. Ukwaw putar ihe Tupàn Tuweharupi Wiko Ma'e ko ze'eg imume'u har romo hereko haw a'e wà nehe. — Aiko aiko xe ihe, a'e wanupe.
7 Ipuràg eteahy ze'eg heraha har ywytyruhu rupi uzàn ma'e hexakaw.
Zeàmàtyry'ymawhu heta 'ymaw imume'u haw werur iko a'e.
Purupyro haw imume'u haw werur iko a'e no.
Uze'eg Xiàw pe.
— Tupàn pezar wiko tuwihawete romo a'e: i'i.
8 Pàrirogawaiha tyrapyr har ume'egatu ma'e wà, uhapukaz wà. Peinu katu waze'eg nehe.
Uhapukaz urywete haw rupi wà,
ta'e uweha pupe wexak
Tupàn Tuweharupi Wiko Ma'e Xiàw pe izewyr haw wà xe.
9 Zeruzarez heityk pyrer, ezegar nerurywete haw rehe nehe, ta'e Tupàn Tuweharupi Wiko Ma'e upuhareko katu wemiaihu a'e wà xe.
Upyro putar Zeruzarez a'e nehe.
10 Teko ywy nànànar wanenataromo
Tupàn Tuweharupi Wiko Ma'e wexak kar putar upuner haw ikatuahy ma'e nehe.
Ywy rehe har paw wexak putar
Tupàn Zanezar zanepyro har romo heko haw wà nehe.
11 Heremiaihu wà, pehem Mawiron wi nehe.
Pehem paw rupi nehe. Pepokok zo ma'e iaiw ma'e rehe nehe.
Ma'e heràpuzuhu pe har heraha har wà nehe, tuwe uzemukatu kar herenataromo wà nehe.
12 Napehem kwaw na'arewahy nehe.
Ni amo napemuzàn kar kwaw wà nehe,
ta'e Tupàn Tuweharupi Wiko Ma'e wexak kar putar peho àwàm peme nehe xe.
Tupàn Izaew wazar wiko putar peiwyr penehe uzekaiw katu pà nehe.
Tupàn hemiruze'eg ma'erahy hemipuraraw, ikàgaw no
13 Uze'eg Tupàn Tuweharupi Wiko Ma'e nezewe.
— Heremiruze'eg hemiapo ràm paw ikatu putar nehe.
Teko umume'u putar ikatu haw wà nehe.
Umume'u tetea'u putar ikatu haw izupe wà nehe.
14 Teko tetea'u uze'eg nezewe hexak mehe wà.
— upuraraw ma'erahy tetea'u a'e, i'i izupe wà, ta'e hexakaw amo ae romo uzeapo a'e xe.
— Aipo awa romo hekon tuwe a'e, i'i izupe uzehe upuranu pà wà.
15 Ko 'ar rehe teko tetea'u ipytuhegatu putar hexak mehe wà nehe.
Tuwihawete tetea'u nukwaw kwaw ni uze'egaw hexak mehe wà nehe.
Ta'e wexak putar imume'u pixik 'ym pyrer wà nehe xe.
Ukwaw putar weminu pixik 'ym wà nehe no.