— Mo upuner a'e ma'e zanereminu kwer rehe uzeruzar haw rehe wà.

— Na'aw Tupàn Tuweharupi Wiko Ma'e ima'ereko haw a'e, ni'i kwaw amo wà.

2 Tupàn Tuweharupi Wiko Ma'e uputar wemiruze'eg izexak kar haw a'e.

Nuzawy kwaw ka'akyr hezuz romo ma'e.

Itua'u ywy uxinig ma'e kwer rehe.

Na'ipuràg kwaw a'e. — Ipuràg eteahy a'e, ni'i kwaw teko izupe wà. — Umurywete kar teko tetea'u a'e, ni'i kwaw teko izupe wà.

Naheta kwaw ipuràgaw hehe.

A'e rupi nazazekaiw kwaw hehe.

Na'ikatu kwaw zanewe.

3 Ikàg 'ym ma'e romo hekon purupe. Nuputar kwaw uwihaw romo wà.

Upuraraw ma'eahy haw a'e. Upuraraw ma'erahy a'e no.

Nazanepurexak wer kwaw awa iro ma'e rehe.

Nazame'e kwaw hehe. Iro zanewe a'e.

4 Nezewe rehe we ma'erahy zaneremipuraraw weraha a'e.

Zanema'erahy upuraraw a'e.

— Wemiapo kwer ikatu 'ym ma'e rupi upuraraw iko a'e, za'e izupe ikwaw 'ym pà.

— Tupàn uzepyk iko hehe, za'e izupe.

— Tupàn ae upuraraw kar ma'erahy hereko izupe. A'e ae ukutuk hereko, za'e izupe.

5 Nan kwaw wemiapo kwer rehe upuraraw. Zaneremiapo kwer ikatu 'ym ma'e hekuzaromo upuraraw a'e ma'erahy a'e.

Tupàn uzepyk hehe zanekatu 'ymaw rehe.

Zanemukatu Tupàn hemipuraraw kwer pupe a'e.

Ikutuk awer pupe zanemukatu a'e.

6 Zane paw zaiko àràpuhàràn hawitu ma'e ukàzym ma'e kwer ài zane.

Zane pitàitàigatu zaha zaiko zanerape rupi zane.

Tupàn Tuweharupi Wiko Ma'e uzepyk wemiruze'eg rehe.

Upuraraw kar ma'erahy izupe zanekatu 'ymaw hekuzaromo. Nupuraraw kar kwaw a'e ma'erahy zanewe a'e.

7 Amo upetepetek wà. Ukutukutuk wà no. Nuiko kwaw ikàg 'ym ma'e romo a'e.

Nezewe rehe we upuraraw a'e ma'e paw ikàg 'ym ma'e ài.

Nuze'eg kwaw ni pitài ze'eg ipuraraw mehe.

Upyta uze'eg 'ym pà àràpuhàràn hawitu ma'e izuka pyràm ài, àràpuhàràn hawitu ma'e wawer imonohok kar mehe har ài.

8 Umunehew zemunehew paw pe wà. Umume'u izuka àwàm wà. Weraha izuka àwàm me wà.

Ni amo nuzekaiw kwaw izupe iapo pyràm rehe wà.

Umuhem kar ywy wikuwe ma'e waneko haw wi wà.

Uzuka teko zaneremiaihu wanemiapo kwer ikatu 'ygwer hekuzaromo wà.

9 Utym hetekwer ikatu 'ym ma'e iapo tetea'u har wanuwake wà.

Utym hetekwer hemetarer katu ma'e wanetekwer wanuwake wà.

Nuzapo pixik kwaw ni pitài ikatu 'ym ma'e a'e.

Numume'u kwaw ni pitài temu'emaw. Nezewe rehe we uzapo a'e ma'e paw izupe wà.

10 Tupàn Tuweharupi Wiko Ma'e uze'eg nezewe.

— Hepurapo wer ikatu 'ym ma'e rehe izupe. Hepurupuraraw kar wer ma'erahy rehe izupe.

Uzezuka kar teko wanemiapo kwer ikatu 'ym ma'e wanekuzaromo.

Nezewe rehe we, ipukua'u putar heko àwàm a'e rupi nehe.

Wexak putar uzuapyapyr wà nehe.

Umuzeapo kar putar ma'e paw heremimutar rupi nehe.

11 A'e ma'erahy paw ipuraraw ire hurywete putar nehe.

Nupytu'u kwaw a'e zawaiw katu ma'e iapo re.

A'e rupi hemiapo kwer ikatu putar izupe nehe.

Naheta kwaw ikatu 'ymaw heremiruze'eg rehe.

Upuraraw putar zepykaw a'e nehe, ta'e amo teko uzapo ikatu 'ym ma'e tetea'u a'e wà xe.

A'e rupi amunàn putar wanemiapo kwer ikatu 'ym ma'e ihe nehe. Hereharaz putar izuwi nehe.

12 A'e rupi amonokatu putar imuawate katu haw izupe nehe.

Amono putar hekuzar izupe nehe,

hemetarer katu ma'e wanenataromo nehe, upuner ma'e wanenataromo nehe no,

ta'e omono weko haw uzezuka kar pà a'e xe.

Zauxiapekwer wereko xiroahy wà.

Teko tetea'u wanekuzaromo azepyk hehe ihe.

Uze'eg ihewe wanemiapo kwer imunànaw henoz pà ihewe,