1 Zeruzarez, nanera'yr pixik kwaw ne.

Nanememyrahy pixik kwaw.

Ezegar nehe kury. Ehapukaz nerurywete romo nehe no,

ta'e Tupàn Tuweharupi Wiko Ma'e uze'eg nezewe kury xe.

— Kuzà hezar pyrer imemyr wera'u putar kuzà umen ipyr wiko ma'e wi a'e nehe i'i Tupàn.

2 Emuhua'u neràpuzràn nehe.

Ezapo nereko haw uhua'u wera'u ma'e romo nehe.

Nerekyty'ym zo iapo mehe nehe.

Emupukua'u kar neràpuzràn ihàm nehe, emonoete kar izyta nehe no.

3 Ta'e eremunyryk kar putar neiwyzaw paw nehe xe, neiwy imuhua'u kar pà nehe.

Neremiaihu wiko wi putar

ywy neàmàtyry'ymar hemipyhyk kwer izar romo wà nehe.

Tawhu teko hereko 'ymar tynehem putar teko wapupe wà nehe no.

4 Ekyze zo nehe. Nanemaranugar kwaw nehe.

Nepytuhegatu zo nehe, ta'e ni amo nanemuigo kar kwaw ikàg 'ym ma'e romo a'e wà nehe xe.

Nekuzàtài mehe uzapo iaiw ma'e newe imaranugar ma'e romo nemuigo kar pà wà. Nereharaz putar a'e uzeapo ma'e kwer wi nehe.

Nanema'enukwaw kwaw iaiw ma'e newe uzeapo ma'e kwer rehe nehe, kuzà imen umàno ma'e kwer romo nereko mehe uzeapo ma'e kwer rehe nehe.

5 Neapo arer a'e nehe, Tupàn Tuweharupi Wiko Ma'e a'e nehe, Tupàn Upuner Wera'u Ma'e a'e nehe, wiko putar nemen romo a'e nehe.

Izaew wazar Ikatuahy Ma'e a'e nehe, ywy rehe har paw wazar a'e nehe, nepyro putar a'e nehe.

6 Aze awa upuir wemireko wi, a'e hemireko kwer uzemumikahy a'e.

Nezewegatete erezemumikahy ne no, Zeruzarez tawhu.

Tupàn Tuweharupi Wiko Ma'e nerenoz nerereko nemuzewyr kar pà a'e.

Nezar uze'eg nezewe.

— Aipo amo awa upuner wemireko imono kar pà uzewi a'e, aze wereko a'e kuzà ukwàkwàmo mehe a'e.

7 Apuir newi.

Namumaw kwaw kwarahy tetea'u muite newi.

Ko 'ar rehe urumuzewyr kar putar hezeupe ihe nehe kury, neamutar katu pà ihe nehe kury.

8 Hekwahy mehe azeàmim newi.

Nazexak kar kwaw newe ta'e aikwahy newe ihe xe.

Namumaw kwaw kwarahy tetea'u muite newi nehe.

Urupuhareko katu putar nehe, ta'e uruamutar katu hepytu'u 'ym pà ihe xe, i'i Tupàn Tuweharupi Wiko Ma'e nepyro har a'e.

9 Uze'eg Tupàn Tuweharupi Wiko Ma'e nezewe kury.

— Àmànuhu ikyr mehe amume'uahy heze'eg Noe pe ihe.

— 'Y numim zuapyr wi pixik kwaw ywy a'e nehe, a'e tuwe izupe.

Nezewegatete amume'uahy putar ko heze'eg newe ihe kury.

— Naikwahy zuapyr wi pixik kwaw newe ihe nehe, a'eahy newe kury. Nazepyk zuapyr wi pixik kwaw nerehe nehe.

10 Ywytyruhu upuner ukàzymaw rehe wà nehe.

Ywytyr upuner uzepe'àpe'àgaw rehe wà nehe no.

Nezewe rehe we napytu'u pixik kwaw neamutar katu re nehe.

Neàmàtyry'ym pixik àwàm newe heremimume'u kwer nazuhaw pixik kwaw nehe,

i'i Tupàn Tuweharupi Wiko Ma'e

neamutar katu har a'e.

11 Tupàn Tuweharupi Wiko Ma'e uze'eg nezewe a'e.

— O Zeruzarez, ywytu àmànuhu inuromo har zàwenugar uzepyk nerehe a'e. Upuraraw kar ma'erahy newe a'e.

Ni amo nozo'ok kwaw nezemumikahy haw newi wà.

Uruzapo wi putar ita hekuzar katu ma'e ipuràg eteahy ma'e pupe ihe nehe.

Amono putar ita xapir her ma'e newy pe har romo nehe.

12 Azapo putar neràpuz iaiha ma'e ita humi her ma'e pupe nehe.

Azapo putar nerukenawhu ita meriw her ma'e ima'ema'e pà nehe.

Azapo putar nepàrirogawhu ita hekuzar katu ma'e ima'ema'e pà nehe no.

13 Ihe ae ihe, amu'e putar nepupe wiko ma'e ràm ihe wà nehe.

Wiko putar wàmàtyry'ymar wanuwi ukyze 'ym pà wà nehe, uzeàmàtyry'ym 'ym pà wà nehe.

14 A'e pe har wiko putar ikatu ma'e iapo har romo heze'eg heruzar pà wà nehe.

A'e rupi nuzeapo kwaw ikatu 'ym ma'e newe nehe.

Teko ikatu 'ym ma'e nuzuka kwaw nepupe har wà nehe. Nepupe har nukyze kwaw ma'e wi wà nehe.

15 Aze amo ur neàmàtyry'ym pà wà nehe, ihe naiko kwaw wamur kar har romo ihe.

Ereityk putar neàmàtyry'ymar nekutyr ur ma'e ràm upaw rupi katete ne wà nehe.

16 Azapo itaper ima'ema'e har ihe wà. Upy tàtàpyz rehe wà.

Uzapo puruzuka haw zeàmàtyry'ymawhu pe har wà.

Azapo zauxiapekwer ihe wà no.

Uzuka teko a'e puruzuka haw pupe wà. Umumaw teko a'e puruzuka haw pupe wà.

17 Ni amo puruzuka haw nupuner kwaw nereitykaw rehe wà.

Aze amo oho tuwihaw wanenataromo neremiapo kwer ikatu 'ym ma'e imume'u pà nehe,

tuwihaw numume'u kwaw nerehe uzepyk àwàm wà nehe.

Azapo agwer ma'e heremiruze'eg wanupe ihe:

Amono waàmàtyry'ymar waneitykaw wanupe ihe.

Tupàn Tuweharupi Wiko Ma'e uze'eg kwez kury.