30
Tupàn umume'u wemiapo ràm
1-3 Tupàn Tuweharupi Wiko Ma'e Izaew wazar umume'u ko ma'e ihewe kury. — Zeremi, i'i. — Emuapyk heze'eg awer paw amo pape rehe nehe. Ta'e uhem 'ar iko kury xe. A'e 'ar mehe amuzewyr kar putar heremiaihu ihe wà nehe: Izaew ywy rehe har wà, Zuta ywy rehe har wà no. Amono ko ywy waipy wanupe ihe. Arur wi putar xe ihe wà nehe no. Wiko wi putar izar romo wà nehe. Ihe Tupàn Tuweharupi Wiko Ma'e aze'eg kwez kury.
4 Tupàn Tuweharupi Wiko Ma'e umume'u ko ma'e Izaew wanehe Zuta wanehe kury.
5 — Aenu amo ukyze hawhu wi uhapukaz ma'e ihe wà.
Uhapukaz wà, ta'e ukyze wà xe. Nuhapukaz kwaw zeàmàtyry'ym 'ymaw rehe wà.
6 Aipo awa upuner umemyr haw rehe a'e.
Màràzàwe tuwe aexak awa tetea'u opo wie pyhykar ihe wà.
Nuzawy kwaw kuzà imemyrahy ma'e wà.
Màràzàwe tuwe itawaahy paw rupi wà.
7 Amo 'ar iaiw ma'e uhem iko kury.
Ni amo 'ar nahexakaw kwaw a'e 'ar ài a'e.
Zako izuapyapyr upuraraw putar ma'erahy a'e 'ar mehe wà nehe.
Nezewe rehe we apyro putar a'e 'ar wi ihe wà nehe.
8 Tupàn Tuweharupi Wiko Ma'e upuner wera'u ma'e uze'eg wi kury.
— A'e 'ar ihem mehe azuhazuhaw kawaru kupe pe har zàwenugar watuwa rehe har ihe nehe. Azo'ok putar kyhàhàm tàtà wanuwi ihe nehe no. A'e mehe nuiko kwaw amo ywy rehe har wanupe uma'ereko e ma'e romo wà nehe. 9 Wiko putar heremiruze'eg romo wà nehe. Aiko Tupàn Tuweharupi Wiko Ma'e romo ihe wazar romo ihe. Wiko putar Tawi izuapyr hemiruze'eg romo wà nehe no. Amono putar a'e awa heremiaihu wanupe wanuwihawete romo ihe nehe.
10 Heremiruze'eg Zako izuapyapyr wà, pekyze zo nehe.
Teko Izaew ywy rehe har wà, pepytuhegatu zo nehe.
Apupyro putar a'e ywy muite har wi ihe nehe,
ywy pepyhykaw wi ihe nehe.
Zako izuapyapyr uzewyr putar wà nehe.
Wiko putar zeàmàtyry'ym 'ymaw rehe wà nehe no.
Ni amo nupuner kwaw ikatu 'ym ma'e iapo haw rehe wanupe wà nehe.
Ni amo numukyze kar kwaw wà nehe.
Ihe Tupàn Tuweharupi Wiko Ma'e aiko ko ma'e imume'u har romo ihe.
11 Aiko putar pepyr pepyro pà ihe nehe.
Apumuhàmuhàz ywy nànàn ihe.
Amumaw putar a'e ywy paw rupi ihe wà nehe.
Napumumaw kwaw nehe.
Nezewe rehe we azepyk putar penehe nehe.
Penehe hezepyk mehe
napuraraw kar wera'u kwaw ma'erahy peme nehe.
Ihe Tupàn Tuweharupi Wiko Ma'e aze'eg kwez kury.
12 Tupàn Tuweharupi Wiko Ma'e uze'eg Zeruzarez tawhu pe kury.
— Naheta kwaw imukatu haw 'aw teko wama'eahy haw pe.
Waperew nuke'e kwaw.
13 Naheta kwaw penehe uzekaiw ma'e wà.
Naheta kwaw muhàg peperew pe.
Naheta kwaw pemukatu àwàm hàro haw.
14 Peamutar arer paw heharaz pewi wà.
Nuzeruzar kwaw penehe wà.
Apuàmàtyry'ym ihe, ta'e peiko heàmàtyry'ymar wazàwe pe xe.
Penehe hezepykaw tàtàahy a'e,
ta'e heta tetea'u penemiapo kwer ikatu 'ym ma'e xe.
Pekatu 'ymaw uhua'u a'e no.
15 Pepytu'u pekutuk awer rehe peze'eg ire nehe.
Naheta kwaw imukatu àwàm.
Azepyk penehe ihe,
ta'e heta tetea'u penemiapo kwer ikatu 'ym ma'e xe.
Ta'e pekatu 'ymaw uhua'u a'e no xe.
16 Ko 'ar rehe pemumaw arer amumaw putar paw rupi ihe wà nehe.
Amo zauxiapekwer weraha putar peàmàtyry'ymar paw wemipyhyk romo wà nehe no.
Amo pekar ma'erahy ipuraraw kar pà peme wà. Amo ae zauxiapekwer upuraraw kar putar ma'erahy peme ipuraraw kar arer wanupe wà nehe.
Uzuka putar amo wazuka arer wà nehe no.
17 Peàmàtyry'ymar uze'eg nezewe wà.
— Xiàw uzeapo ikàg 'ym ma'e romo a'e.
Ni amo nuzekaiw kwaw hehe wà, i'i penehe wà.
Amono wi putar penuhàgaw peme nehe.
Amuke'e putar peperew nehe no.
Ihe Tupàn Tuweharupi Wiko Ma'e aze'eg kwez kury.
18 Amuzewyr kar putar Zako izuapyapyr wamuwà waiwy pe ihe wà nehe.
Apuhareko putar uzeànàànàm ma'e imono'og pyr pitàitàigatu ihe wà nehe.
Uzapo wi putar Zeruzarez a'e wà nehe.
Teko wiko putar tuwihawete hàpuzuhu pupe wà nehe no.
19 Teko a'e pe wiko ma'e uzegar putar hekatu haw imume'u pà wà nehe.
Uhapukaz putar urywete haw rehe wà nehe no.
Amueta tetea'u kar putar ihe wà nehe.
Areko katu kar putar a'e teko amo teko wanupe ihe wà nehe no.
20 Teko ko ywy rehe har ikàg putar kwehe mehe arer zàwe wà nehe.
Hehe we har ikàg wi putar wà nehe no.
Azepyk putar wyzài heremiaihu wanupe ma'erahy ipuraraw kar har wanehe ihe nehe no.
21-22 Amo wainuinuromo har wiko putar wanuwihaw romo nehe.
Waànàm wiko putar wanuwihaw romo nehe.
Aze ainoz imuwà hezeupe nehe, Uhem putar heruwake a'e nehe.
Aze naenoz kwaw amo nehe, a'e teko nur kwaw heruwake nehe.
Ta'e ukyze putar a'e wà nehe xe.
Wiko putar heremiaihu romo wà nehe.
Aiko putar wazar romo nehe no.
Ihe Tupàn Tuweharupi Wiko Ma'e aze'eg kwez kury.
23-24 Tupàn Tuweharupi Wiko Ma'e ikwahy haw nuzawy kwaw ywytu àmàn inuinuromo har. Opok putar ikatu 'ym ma'e waàkàg i'aromo ywytuaiw ài nehe. Tupàn uzapo putar wemimume'u kwer paw rupi nehe. Xo a'e mehe zo ikwahy haw hakuir putar nehe. Amo 'ar mehe hemiaihu ukwaw katu putar ko ma'e paw rupi wà nehe.