1 Itazu or uzeapo ipihun ma'e romo azeharomoete a'e.

Or ikatuahy ma'e naheny kwaw kury.

Ita hekuzar katu ma'e tàpuzuhu pupe arer uhàuhàz nahu za'akaw pe kury.

2 Kwàkwàmo Zeruzarez pe har ikatuahy zanewe or ikatuahy ma'e ài a'e wà.

Ko 'ar rehe nuzawy kwaw ywy'a teko wanupe wà kury. Nuzeruze'eg kwaw wanehe wà kury.

3 Te awarahu umukamu kar umemyr wà.

Heremiaihu nuzawy kwaw wiranu zàwenugar wà.

Upuraraw kar ma'erahy umemyr wanupe wà.

4 Kwarera'i Zeruzarez pe har umàno waiko wà, ta'e naheta kwaw 'y wanupe xe.

— Temi'u, i'i kwarer wà.

Ni amo nomono kwaw wanupe wà.

5 Temi'u ikatuahy ma'e i'u arer

umàno nahu rupi umai'u 'ym pà wà kury.

Kamir hekuzar katu ma'e imunehew arer

wiko ity i'aromo wà kury.

6 Kwehe mehe Tupàn uzepyk Xotom pe har wanehe.

Na'arewahy Tupàn umumaw a'e.

Uzepyk wera'u heremiaihu wanehe kury.

7 Zaneruwihaw ta'yr ikatuahy ma'ekamy kwer ài wà.

Naheta kwaw ipihunaw wanehe. Nuzawy kwaw àmàn tàtà xig ma'e wà.

Ikàg wà, tynehem ukàgaw pupe wà.

Waneha heny katu ima'eahy 'ym ma'e ài wà.

8 Ko 'ar rehe wanuwa ipihun tàtàpyzgwer ài.

Nahu rupi wata mehe ni amo nukwaw kwaw wà.

Wapir uxinig ywyra ài.

Ururururu katu wàkàgwer rehe.

9 Zeàmàtyry'ymawhu pe umàno ma'e kwer

hurywete wera'u wà, amo a'e re umàno ma'e kwer wanuwi wà.

Ta'e umàno oho waiko mewe katu a'e wà xe.

Ta'e naheta kwaw wanemi'u wanupe xe.

10 Kuzà Zeruzarez pe har

umemyr iamutar katu har a'e wà,

tawhu imumaw mehe

umimoz umemyr i'u pà a'e wà kury.

11 Tupàn Tuweharupi Wiko Ma'e uzakook wekwahy haw a'e,

uzuhen wekwahy haw haku haw a'e no.

Umunyk tata Zeruzarez rehe,

ywy rehe imumew pà no.

12 — Ni amo iàmàtyry'ymar nupuner kwaw Zeruzarez ukenawhu rupi wixe haw rehe wà nehe,

i'i teko paw wà.

Te wanuwihawete uze'eg nezewe wà.

13 A'e ma'e paw uzeapo a'e, ta'e ipupe har uzapo ikatu 'ym ma'e Tupàn henataromo a'e wà xe.

Tupàn ze'eg imume'u har a'e pe har uzapo ikatu 'ym ma'e wà. Xaxeto a'e pe har uzapo ikatu 'ym ma'e wà no.

Uzuka kar teko ikatu ma'e wà.

14 Xaxeto a'e wà, Tupàn ze'eg imume'u har a'e wà no, wata nahu rupi hehàpyhà 'ym ma'e ài wà.

Wanemizuka kwer wanuwy kwer umuzipiw a'e wà. A'e rupi ni amo nopokok kwaw wakamir rehe wà.

15 Teko uhapukaz wà.

— Peho xe wi nehe.

Napekatu kwaw.

Pepokok zo urerehe nehe, i'i wanupe wà.

Wazàwehem mehe wà, ywy nànàn wata mehe wà, te uzeruzar 'ym ma'e uze'eg nezewe wanupe wà.

— 'Aw awa nupuner kwaw xe weko haw rehe wà nehe, i'i wanupe wà.

16 Tupàn Tuweharupi Wiko Ma'e nuzekaiw kwaw wanehe.

Umuhàmuhàz wà.

Nuzekaiw kwaw xaxeto zanerehe we har wanehe.

Nupuhareko kwaw zaneruwihaw wà.

17 Zame'e, te zanekene'o.

Xiàro zanepytywà haw. Nuhem pixik kwaw.

Zazeruzar teko amo ywy rehe har wanehe. — Zanepytywà putar a'e wà nehe, za'e zepe wanupe.

Nupuner kwaw wà.

18 Zaneàmàtyry'ymar ume'e waiko zanerehe.

Ni nahu rupi nazapuner kwaw zaneata haw rehe.

Zane'ar upaw etea'i.

Zanemumaw pàwàm uhem etea'i.

19 Zanekutyr ur ma'e uzàn wera'u wiràhu ywak rehe har wanuwi wà.

Ur zaneraikweromo ywytyruhu rehe wà.

Na'arewahy zaneàmàtyry'ym ywyxiguhu rehe zanemupytuhegatu kar pà wà.

20 Upyhyk zanereko haw imur har wà.

Tupàn Tuweharupi Wiko Ma'e wexaexak zaneruwihawete a'e. Zauxiapekwer upyhyk a'e tuwihawete wà.

— Zanepyro putar zauxiapekwer zaneywy rehe wixe ma'e wanuwi a'e nehe, za'e izupe. Nazanepyro kwaw a'e.

21 Pe teko Enom ywy rehe har wà, pe Uz ywy rehe har wà no, pepuner pepuka haw rehe.

Penurywete pekatu mehe nehe.

Ta'e iaiw haw penehe u'ar ma'e ràm uhem wà iko kury xe.

Peka'u putar nehe. Peiko putar kamir 'ym pà nehe no.

22 Tupàn uzepyk Zeruzarez pe har wanehe wanemiapo kwer hekuzaromo a'e.

Uhàuhàz ywy tetea'u wanehe wà.

Tupàn Tuweharupi Wiko Ma'e numupyta kar kwaw a'e ywy rehe wà nehe.

Tupàn uzepyk putar penehe a'e nehe, teko Enom ywy rehe har wà.

Ukwaw kar putar penemiapo kwer ikatu 'ym ma'e teko nànàn a'e nehe.