1 O Tupàn Tuweharupi Wiko Ma'e, nema'enukwaw urewe uzeapo ma'e kwer rehe nehe.

Eme'e urerehe iaiw haw urewe u'ar ma'e kwer hexak pà nehe.

2 Amo ywy rehe har wiko ureywy izar romo wà.

Teko ureremigwaw 'ym wiko ureràpuz pupe wà.

3 Uruiko tu 'ym ma'e romo.

Urehy wiko imen umàno ma'e kwer romo wà.

4 Te 'y urei'u àwàm urume'eg kar ure.

Urumekuzar zepe'aw urerata rehe àràm no.

5 Ureàmàtyry'ymar upuraraw kar ma'erahy urewe urereko mehe a'e wà.

Urekene'oahy ta'e na'uremupytu'u kar kwaw wà xe.

6 Aze uremai'u wer, urenoz ureremi'u ràm amo wanupe,

Ezit ywy rehe har wanupe, Axir ywy rehe har wanupe no.

7 Ureipy uzapo ikatu 'ym ma'e wà. Nuiko kwaw wà kury.

Urupuraraw ma'erahy ure, ta'e ureipy uzapo ikatu 'ym ma'e a'e wà xe.

8 Amo pe uma'ereko e ma'e wiko ureruwihaw romo wà.

Naheta kwaw wapo wi urepyro àràm wà.

9 Na'ikatuahy kwaw urewe aze urekar ureremi'u ràm.

Ta'e imunar ma'e ywyxiguhu rehe har ureàmàtyry'ym urepuhareko 'ym pà wà xe.

10 Urema'uhez haw uremuakuahy a'e.

Urepir haku zepehe ài.

11 Zeruzarez pe, tawhu Zuta ywy rehe har pe,

zauxiapekwer upyhykahyahy kuzà wà, kuzàwaza wà no.

12 Ureàmàtyry'ymar u'azuwyk ureruwihaw wà.

Nuzeruze'eg kwaw ureràmuzgwer wanehe wà no.

13 Umuma'erekoahy kar kwàkwàmo urera'yr arozràn imuku'i haw pe wà.

Uzepyapi zepe'aw heraha mehe wà.

14 Tua'uhez ma'e nuzemono'og kwaw nahu rupi wà kury.

Kwàkwàmo nuzegar kwaw wà kury.

15 Urerurywete haw uhem urepy'a wi.

Urezemumikahy haw upyta urepynykaw hekuzaromo kury.

16 Ni urekàgaw ipixika'i nupyta kwaw.

Uruzapo ikatu 'ym ma'e ure. A'e rupi Tupàn umume'u urerehe uzepykaw a'e.

17 Urepy'a ima'eahy.

Urerehay kwer uremupytu'u kar ma'e hexak ire a'e.

18 Ta'e naheta kwaw teko Xiàw ywytyr rehe wà kury xe.

Awara wata tàpuz imuaiw pyrer myteromo wà.

19 Nezewe rehe we ne o Tupàn Tuweharupi Wiko Ma'e ereiko ureruwihawete romo tuweharupi nehe.

Ereiko teko wazar romo tuweharupi har romo.

20 Màràzàwe tuwe eremumaw kwarahy tetea'u urerehe nezekaiw 'ym pà.

Aipo nema'enukwaw wi putar urerehe nehe.

21 Uremuzewyr kar pe newe nehe, o Tupàn Tuweharupi Wiko Ma'e.

Azeharomoete, uremuzewyr kar nehe.

Ezapo urereko àwàm urereko awer zàwe nehe.

22 Aipo urereityk pe azeharomoete.

Aipo urewe nekwahy haw nupaw pixik kwaw nehe.