1 O Tupàn hemukàg kar har ne,

Ewazar heze'eg nerenoz mehe nehe.

Zawaiw katu hereko awer ihewe. Hepytywà pe a'e 'ar mehe.

Hepuhareko pe nehe. Einu newe heze'eg mehe nehe.

2 Pe, awa upuner ma'e, pe. Màràn 'ar pemumaw putar herehe peze'eg zemueteahy pà nehe. Awa upuner ma'e wà.

Màràn 'ar pemumaw putar heityk pyrer iamutar pà nehe, herehe penemu'em pà nehe,

Ze'eg azeharomo har 'ym imume'u pà herehe nehe.

3 Pema'enukwaw ko ma'e rehe nehe. Tupàn Tuweharupi Wiko Ma'e wereko katu uzehe uzeruzar katu ma'e a'e wà.

Herenu a'e, aze aze'eg izupe ihe.

4 Peryryryryz pekyze pà ikatu 'ym ma'e iapo re pepytu'u pà nehe.

Pema'enukwaw penemiapo kwer rehe nehe. Pe zutyka'i peker haw pe peneko mehe,

Pema'enukwaw ikatu 'ym ma'e penemiapo kwer rehe nehe.

5 Pemono ma'e Tupàn pe ize'eg rupi nehe.

Pezeruzar Tupàn Tuweharupi Wiko Ma'e rehe nehe.

6 Heta tetea'u teko ko ma'e imume'u har wà.

— Emur wi neze'egatu urerehe nehe, Tupàn Tuweharupi Wiko Ma'e.

— Ikatu ma'e, ere urewe urerehe neme'e mehe nehe, i'i izupe wà.

7 Temi'u tetea'u hereko har hurywete a'e wà.

Herurywete wera'u wanuwi ihe, ta'e ne hemurywete kar pe ne xe.

8 He'aw mehe aker zeàmàtyry'ym 'ymaw rehe ihe.

Ta'e ne, o Tupàn Tuweharupi Wiko Ma'e, hemuigo kar pe muite ikatu 'ymaw wi ne xe.