1 Aiko Tupàn Tuweharupi Wiko Ma'e rehe we ihe,

A'e rupi nuzeapo kwaw ikatu 'ym ma'e ihewe nehe.

— Ezàn zeàmim wiràmiri ài ywytyr rehe nehe,

2 ta'e ikatu 'ym ma'e umuàgà'ym uwyrapar a'e wà xe.

Ta'e umuàgà'ym u'yw uzeàmimaw pupe wiko mehe a'e wà xe,

Awa ikatu ma'e wazywà pà a'e wà xe.

3 Teko ikatu ma'e nupuner kwaw ma'e iapo haw rehe.

Ta'e heta ikatu 'ymaw ywy nànàn taw nànàn a'e xe, i'i ru'u ihewe wà.

4 Tupàn Tuweharupi Wiko Ma'e wiko wàpuzuhu ikatuahy ma'e pupe.

Henaw ywak rehe hin.

Wexak teko paw wà.

Ukwaw wanemiapo.

5 Amo teko weruzar Tupàn Tuweharupi Wiko Ma'e a'e wà. Tupàn ume'e wanehe a'e. Ume'e ikatu 'ym ma'e wanehe no.

Teko upurumuahy ma'e wà, upuruzuka ma'e wà no,

Iro tuwe izupe wà.

6 Tupàn weityk ma'ezu ukaz ma'e purumuahy ma'e a'e, ikatu 'ym ma'e wanehe a'e. Tàtàpyz weityk wanehe no.

Uzepyk wanehe ywytu haku ma'e wamur kar pà wanehe. Ukaz wà.

7 Tupàn Tuweharupi Wiko Ma'e uzapo ikatu ma'e a'e. Uzamutar katu imunar 'ym ma'e hemu'em 'ym ma'e wà.

Teko Tupàn heruzar har wiko putar ipyr wà nehe.