1 Urepyro pe nehe, o Tupàn Tuweharupi Wiko Ma'e.

Ta'e naheta kwaw teko imunar 'ym ma'e hemu'em 'ym ma'e wà xe.

Teko nerehe uzeruzar ma'e ukàzym ywy wi wà.

2 Teko paw hemu'em uzeupeupe wà.

— Nekatuahy, i'i mua'u amo amo wanupe wà.

3 O Tupàn Tuweharupi Wiko Ma'e, emupytu'u kar nezewe uze'eg ma'e waze'eg ire ne wà nehe.

— Aiko wera'u amo wanuwi ihe, i'i amo wà. Emuze'eg kar zo ne wà nehe.

4 — Uruityk putar amogwer ureze'eg pupe nehe,

I'i wà.

— Ni amo na'uremupytu'u kar kwaw ureze'eg ire wà nehe, i'i wà.

— Ni amo nupuner kwaw ma'e iapo kar haw rehe urewe wà, i'i wà.

5 Tupàn Tuweharupi Wiko Ma'e uze'eg a'e kury.

— Azapo putar ma'e ihe kury.

Ta'e teko upuraraw kar ma'erahy waiko hemetarer 'ym ma'e wanupe wà xe.

Ipuraraw par ikuhem ma'erahy wi wà.

Heràro waiko wà, a'e rupi azekaiw putar wanehe ihe nehe, i'i Tupàn Tuweharupi Wiko Ma'e.

6 Pepuner Tupàn Tuweharupi Wiko Ma'e ze'eg rehe pezeruzar haw rehe.

Ize'eg nuzawy kwaw itaxig parat ikatuahy ma'e a'e.

Aze teko umupyràn parat tata pupe 7 haw tykwer imunyryk pà izuwi wà nehe, naheta kwaw ikatu 'ymaw a'e parat inuromo nehe. Tupàn ze'eg nuzawy kwaw parat 7 haw imukatu pyrer a'e.

7 O Tupàn Tuweharupi Wiko Ma'e, ezekaiw katu urerehe nehe,

Uremunyryk kar pà ikatu 'ym ma'e wanuwi nehe.

8 Ta'e ikatu 'ym ma'e wata oho waiko ywy nànàn a'e wà xe.

Ma'e ikatu 'ym ma'e ikatuahy teko paw wanupe.