1 O Tupàn Tuweharupi Wiko Ma'e, nereharaz hewi ne. Màràn mehe nema'enukwaw wi putar herehe nehe.

Aipo nanema'enukwaw pixik kwaw herehe nehe.

Màràn 'ar eremumaw putar neruwa ihewi ipyk pà nehe.

2 Màràn 'ar amumaw putar ko ma'erahy ipuraraw pà nehe. Hepy'a tynehem hezemumikahy haw pupe, 'aromo, pyhaw.

Màràn 'ar amumaw putar nezewe nehe.

Heàmàtyry'ymar hemuzàn kar tuweharupi wà. Màràn 'ar amumaw putar nezewe nehe.

3 O Tupàn Tuweharupi Wiko Ma'e, eme'e herehe kury. Ewazar heze'eg ihewe kury.

Emur nekàgaw ihewe nehe. Nezewe mehe namàno kwaw nehe.

4 Nezewe mehe heàmàtyry'ymar nahurywete kwaw wà nehe, ta'e na'ar kwaw ihe nehe xe.

— Xityk kwez zane, ni'i kwaw wà nehe.

5 Heamutar katu pe ne. Azeruzar heamutar katu haw rehe.

Hepy'a hurywete putar nehe, ta'e hepyro putar pe ne nehe xe.

6 Amuzàg putar zegar haw newe nehe, o Tupàn Tuweharupi Wiko Ma'e pe,

Ta'e nekatuahy ihewe ne xe.