1 Tupàn hezar, Tupàn hezar. Màràzàwe tuwe eretyryk ihewi ne.

Màràzàwe tuwe erepyta muite ihewi ne.

Màràzàwe tuwe naherenu kwaw pe hepytywà àwàm henoz mehe ne, newe herehapukaz mehe ne.

2 Tupàn hezar. Aenoz newe 'aromo ihe.

Nerewazar kwaw heze'eg ihewe.

Uruenoz pyhaw no.

Napuner kwaw hepytu'u haw rehe.

3 Ne nekatuahy ne.

Ereapyk nerenaw rehe.

Teko Izaew izuapyapyr paw umume'u nekatu haw newe wà.

4 Ureipy omono uzeruzar haw nerehe wà. Uzeruzar tuwe nerehe wà.

A'e mehe erepyro ne wà.

5 Urepytywà pe nehe, i'i newe wà. A'e rupi erepyro ikatu 'ymaw wi ne wà.

Uzeruzar nerehe wà. Nereityk kwaw ne wà.

6 Aiko amirikur romo ihe. Naiko kwaw awa romo.

Teko paw upuka herehe wà. Uze'eg zemueteahy herehe wà.

7 Teko herexakar paw uze'eg urywahyahy herehe wà.

Uwapeku wexak kar ihewe uwàkàg heruwaruwak pà hemaranugar haw imume'u pà ihewe wà.

8 — Aipo erezeruzar Tupàn Tuweharupi Wiko Ma'e rehe ne,

I'i ihewe wà.

— Màràzàwe tuwe nanepyro kwaw a'e.

Aze nekatu izupe, màràzàwe tuwe nanepytywà kwaw a'e, i'i ihewe wà.

9 Ne Tupàn hererur ko ywy rehe hezexak kar mehe ne.

Hekwarer mehe erezekaiw katu herehe.

10 Hemono newe hezexak kar mehe wà. Erezekaiw katu herehe.

Hezexak kar haw henataromo ereiko Tupàn hezar romo ne.

11 Etyryk zo ihewi nehe,

Ta'e ma'erahy namuite kwaw ihewi a'e xe.

Naheta kwaw hepytywà àràm ihewe wà.

12 Heàmàtyry'ymar tetea'u umàmàn heywyr wà. Nuzawy kwaw tapi'ak awa wà.

Upaw rupi umàmàn heywyr wà.

Wiko tapi'ak awa ikàg ma'e Màxà ywy rehe har ài wà.

13 Zàwàruhu iriàw ài uzurupeka wà.

Okororo hekutyr opor pà wà.

14 Hekàgaw uhem ihewi kury.

Aiko 'y ywy rehe izakook pyrer ài.

Hekàgwer paw uhem wenaw wi wà.

Hepy'a nuzawy kwaw iraity imupyràn pyrer a'e.

15 He'az uxinigahy ywy ku'i kwer ài a'e.

Heapeku uzemog hezuru i'aromo.

Hereityk pe umàno ma'e kwer ài ywy rehe ne.

16 Teko ikatu 'ym ma'e iapo har umàmàn waiko heywyr wà.

Ur hekutyr zawar ài wà.

Umu'i hepo hepy rehe we wà.

17 Amo upuner hekàgwer paw wapapar haw rehe wà.

Heàmàtyry'ymar ume'e herehe wà. Hekàg 'ymaw umurywete kar a'e wà xe.

18 Umuza'aza'ak hema'e uzeinuinuromo wà, ipyhyk pà wà.

Omomor ita'i ma'e ipapar haw hereko har hekamirpuku izar ràm hexaexak pà wà no.

19 O Tupàn Tuweharupi Wiko Ma'e, etyryk zo ihewi nehe.

Ezur na'arewahy hepytywà pà nehe.

20 Hepyro pe takihepuku wi nehe.

Tuwe a'e zawar zàwenugar nahezuka kwaw wà nehe.

21 Hemunyryk kar pe 'aw zàwàruhu iriàw wanuwi nehe.

Napuner kwaw hezepyro haw rehe 'aw tapi'ak awa hehaite ma'e wanuwi ihe.

22 A'e re amume'u putar neremiapo kwer heremiaihu wanupe nehe.

Amume'u putar nekatu haw teko wanupe wazemono'og mehe ihe nehe. Nezewe aze'eg putar wanupe nehe.

23 — Pe Tupàn Tuweharupi Wiko Ma'e wi ukyze ma'e wà, pemume'u ikatu haw nehe.

Zako izuapyapyr wà, pemuwete katu Tupàn nehe.

Teko Izaew izuapyapyr wà, pemuwete katu Tupàn Tuweharupi Wiko Ma'e nehe, a'e putar wanupe nehe.

24 — Nuityk kwaw ma'e hereko 'ymar a'e wà.

Naheharaz kwaw ma'erahy wanemipuraraw kwer wi.

Nuzeàmim kwaw wanuwi.

— Urepytywà pe nehe, aze i'i izupe wà, uwazar waze'eg wanupe a'e, a'e putar wanupe nehe.

25 O Tupàn Tuweharupi Wiko Ma'e, teko paw wazemono'og mehe,

Amume'u putar nekatu haw ihe nehe, neremiapo kwer imume'u pà ihe nehe.

Newi ukyze ma'e wainuinuromo,

Azuka putar ma'ea'yr nerenataromo heze'eg awer rupi katete ihe wà nehe.

26 Ma'e hereko 'ymar u'u putar a'e ma'ea'yr ho'o kwer a'e wà nehe. Uhyk putar wanupe nehe.

Tupàn Tuweharupi Wiko Ma'e imuwete katu har umume'u putar ikatu haw wà nehe.

Tuwe uhyk wama'e wanupe tuweharupi nehe.

Tuwe hurywete wà nehe.

27 Teko ywy nànànar ima'enukwaw putar Tupàn Tuweharupi Wiko Ma'e rehe wà nehe.

Teko ywy rehe har paw uzewyr putar izupe wà nehe.

Teko hexakaw paw hereko har umuwete katu putar wà nehe.

28 Ta'e Tupàn Tuweharupi Wiko Ma'e wiko tuwihawete romo a'e xe.

Weruze'eg teko ywy nànànar wanereko wà no.

29 Teko amo wanuwi wiko wera'u ma'e paw uzeamumew putar henataromo wà nehe.

Teko paw umuwete katu putar wà nehe.

Azeharomoete umàno ma'e ràm paw umuwete katu putar wà nehe.

30 Teko amo 'ar mehe àràm wiko putar hemiruze'eg romo wà nehe.

Uze'eg putar uzuapyapyr wanupe Tupàn Zanezar rehe wà nehe.

31 Uzexak kar ma'e ràm a'e wà nehe, wenu putar hemiapo kwer imume'u haw a'e wà nehe.

— Tupàn upyro wemiaihu a'e wà, i'i putar amo wà nehe.