1 O Tupàn Tuweharupi Wiko Ma'e, newe aze'eg nezewe ihe.

2 Hezar, nerehe azeruzar.

Hepyro pe maranugar haw wi nehe, hemunyryk pe heretykaw wi nehe.

Emurywete kar zo heàmàtyry'ymar ne wà nehe, iaiw ma'e ihewe uzeapo ma'e rehe ne wà nehe.

3 Nerehe uzeruzar ma'e na'imaranugar kwaw wà nehe, ta'e nuzeityk kar kwaw wà xe.

Aze amo upytu'u e neze'eg heruzar ire wà nehe, amo weityk putar a'e teko a'e wà nehe.

4 O Tupàn Tuweharupi Wiko Ma'e, nerape rehe hemu'e pe nehe.

Ekwaw katu kar ihewe nehe.

5 Hemu'e pe neze'eg azeharomoete har rehe hereko àwàm rehe nehe, ta'e ne ereiko hezar romo ne xe.

Ereiko hepyro har romo ne no.

Azeruzar nerehe tuweharupi ihe.

6 O Tupàn Tuweharupi Wiko Ma'e, nema'enukwaw nekatu haw rehe nehe, nepuruamutar katu haw rehe nehe no.

Kwehe erexak kar nekatu haw teko wanupe.

7 Nereharaz ikatu 'ym ma'e heremiapo kwer hekwarer mehe arer wi nehe, heremiawy kwer hekwarer mehe arer wi nehe no.

Erepuruamutar katu ne. Nekatuahy no.

A'e rupi nema'enukwaw herehe nehe, o Tupàn Tuweharupi Wiko Ma'e.

8 Tupàn Tuweharupi Wiko Ma'e uzepyk ikatu 'ym ma'e wanehe. Ikatuahy a'e.

A'e rupi wexak kar wanape ràm ikatu 'ym ma'e iapo har wanupe a'e.

9 Tupàn umuata kar ikàg 'ym ma'e a'e wà, pe ikatu ma'e rupi a'e wà.

Umu'e wemimutar rehe wà no.

10 Nutyryk kwaw wemiaihu wanuwi a'e. Wexak kar wanape ràm wanupe upuruamutar katu haw rehe,

Aze a'e teko uzapo ma'e uze'eg Tupàn pe imume'u pyrer rupi wà,

Aze weruzar ize'eg wà.

11 O Tupàn Tuweharupi Wiko Ma'e, ezapo ma'e ze'eg neremimume'u kwer rupi nehe.

Emunàn heremiapo kwer ikatu 'ym ma'e nehe, ta'e heta tetea'u a'e wà xe.

12 Tupàn wi ukyze ma'e wà nehe,

Uzemu'e putar wape ràm Tupàn inuromo wà nehe.

13 Ikatuahy putar waneko àwàm nehe.

Wana'yr wiko putar ywy Tupàn hemimume'u kwer izar romo wà nehe.

14 Aze teko ukyze izuwi wà, Tupàn Tuweharupi Wiko Ma'e wiko wamyrypar romo a'e.

Umu'e a'e teko uze'eg iapo katu pyrer rehe wà no.

15 Tuweharupi ame'e Tupàn Tuweharupi Wiko Ma'e rehe,

Ta'e hepyro ikatu 'ymaw wi a'e xe.

16 O Tupàn, eme'e herehe hepuhareko pà nehe, ta'e heàmàtyry'ymar upuraraw kar ma'erahy ihewe wà xe.

Ni amo hepyro a'e wà.

17 Epyro hepy'a heremipuraraw haw wi nehe.

Hemunyryk kar ikatu 'ymaw nànàn nehe no.

18 Exak hezemumikahy haw nehe. Eme'e ma'erahy heremipuraraw rehe nehe no.

Emunàn heremiapo kwer ikatu 'ym ma'e paw nehe.

19 Eme'e heàmàtyry'ymar wanehe nehe. Heta tetea'u wà.

Herehe wakatuwawahy 'ymaw uhua'u a'e wà.

20 Ezekaiw herehe hepyro pà nehe. Hemumaranugar kar zo pe hereityk àwàm wi nehe,

Ta'e aekar hepyro àwàm nerehe we ihe xe.

21 Nahemunar kwaw ihe. Naheremu'em kwaw ihe.

Tuwe hekatu haw hepyro nehe, ta'e azeruzar nerehe ihe xe.

22 O Tupàn, epyro neremiaihu Izaew ne wà nehe. Ikatu 'ym ma'e wanupe uzeapo ma'e wi epyro ne wà nehe.