1 Ywak a'e, hehe har paw a'e wà no, Tupàn Tuweharupi Wiko Ma'e wiko wazar romo upaw rupi katete a'e.

Ywy a'e, hehe wiko ma'e paw a'e wà no, Tupàn wiko wazar romo a'e no.

2 Tupàn uzapo ywy yryhu rehe.

Omono iwy pe har yryhu iwy pe no.

3 Mo upuner ywytyr Tupàn Tuweharupi Wiko Ma'e henaw rehe uzeupir haw rehe wà.

Mo upuner hàpuzuhu imonokatu ma'e pupe upyta haw rehe wà.

4 Xo ikatu ma'e iapo har zo upuner wà. Xo ikatu ma'e rehe ima'enukwaw ma'e upuner wà.

Xo tupàn a'ua'u wamuwete 'ymar zo upuner wà.

Xo wemiapo ràm imume'u mua'u 'ymar zo upuner wà.

5 Tupàn Tuweharupi Wiko Ma'e omono putar uze'egatu a'e teko rehe nehe.

Teko wanemiapo kwer imume'u haw 'ar mehe ipyro har umume'u putar ikatu haw a'e nehe.

6 Tupàn Tuweharupi Wiko Ma'e imuwete katu har wiko nezewe wà.

Zako izar imuwete katu har nezewe wanekon wà.

7 Pewàpytymawok ukenawhu nehe.

Ukenawhu kwehe arer pewàpytymawok nehe.

Tuwihawete ikàg ma'e ipuràg eteahy ma'e wixe putar a'e nehe.

8 Mo wiko Tuwihawete Ikàg Ma'e romo a'e.

Tupàn Tuweharupi Wiko Ma'e wiko tuwihawete ikàg ma'e romo a'e. Upuner a'e. Ikàg tuwe a'e no.

Tuweharupi Wiko Ma'e zeàmàtyry'ymawhu pe ikàg ma'e romo hekon a'e.

9 Pewàpytymawok ukenawhu nehe.

Ukenawhu kwehe arer pewàpytymawok nehe.

Tuwihawete puner haw puràg eteahy haw hereko har wixe putar nehe.

10 Mo wiko a'e Tuwihawete Ikàg Ma'e romo a'e, Tupàn ipuràg wera'u ma'e romo a'e.

Wiko tuwe Puner Haw Hereko Har romo a'e.

Wiko Tuwihawete Ikàg Ma'e romo ipuràg wera'u ma'e romo a'e.