1 Tupàn Tuweharupi Wiko Ma'e wiko tatainy ài ihewe. Hepyro har romo hekon a'e.

Mo wi akyze putar nehe.

Tupàn hepyro ikatu 'ymaw nànàn a'e.

Nakyze kwaw ni amo wanuwi nehe.

2 Heàmàtyry'ymar ikatu 'ym ma'e hekutyr wanur mehe,

Hezuka haw rehe uzeagaw mehe,

Uzepyapi u'ar pà wà.

3 Aze zauxiapekwer tetea'u uzemono'og heywyr umàmàn pà wà nehe,

Nakyze kwaw wanuwi nehe.

Aze heàmàtyry'ym heàmàtyry'ymar wà nehe,

Azeruzar wiwi Tupàn rehe nehe.

4 Xo pitài ma'e zo ainoz Tupàn Tuweharupi Wiko Ma'e pe. Xo a'e ma'e zo aputar ihe.

Tuwe hemuigo kar wàpuz me nehe.

Tuwe amumaw he'ar paw hàpuz me hereko pà nehe,

Ikatu haw ikwaw pà nehe,

Ima'ekwaw paw rehe hemu'e pà nehe no.

5 Aze zawaiw katu hereko haw nehe, hemim putar uzeàmimaw pe nehe.

Hemonokatu wàpuzuhu pupe nehe.

Ita 'aromo hemono putar ikatu 'ymaw wi hepyro pà nehe.

6 Nezewe mehe aityk putar heàmàtyry'ymar ihe wà nehe, heywyr har ihe wà nehe.

Ahapukaz putar herurywete haw rehe nehe.

Hàpuzuhu pe ma'ea'yr wazuka mehe nehe, azegar putar azeharomoete nehe. Amume'u putar Tupàn Tuweharupi Wiko Ma'e ikatu haw nehe.

7 O Tupàn Tuweharupi Wiko Ma'e, herenu pe nerenoz mehe nehe.

Hepuhareko pe heze'eg iwazar pà nehe.

8 — Ezur hemuwete katu pà nehe, ere ihewe.

— Aha putar nemuwete katu pà nehe, o Tupàn Tuweharupi Wiko Ma'e, a'e newe.

9 Ezeàmim zo ihewi nehe.

Eikwahy zo ihewe nehe.

Hemono kar zo pe nezewi nehe.

O Tupàn hepyro har, ereiko hepytywà har romo.

Etyryk zo ihewi nehe. Ihewi eho zo nehe.

10 Aze heru utyryk ihewi nehe, aze hehy utyryk ihewi nehe no, nezewe rehe we Tupàn

Tuweharupi Wiko Ma'e uzekaiw katu putar herehe nehe.

11 O Tupàn Tuweharupi Wiko Ma'e, hemu'e pe neremimutar iapo haw rehe nehe.

Hemuata kar pe ikatu ma'e rupi nehe,

Ta'e heta tetea'u heàmàtyry'ymar a'e wà xe.

12 Hemono zo pe heàmàtyry'ymar wapo pe nehe.

Hemu'em herehe a'e wà.

Umume'u hemuahy àwàm wà no.

13 Tupàn Tuweharupi Wiko Ma'e wexak kar putar ukatu haw herekuwe mehe nehe.

Akwaw tuwe ikatu haw hexak kar àwàm ihe nehe.

14 Ezeruzar Tuweharupi Wiko Ma'e rehe nehe.

Ezeruzar katu nekyze 'ym pà nehe.

Ezeruzar Tupàn Tuweharupi Wiko Ma'e rehe nehe.