1 O Tupàn Tuweharupi Wiko Ma'e, herehe uzekaiw katu ma'e, uruenoz iteko ihe.

Herenoz pe herehapukaz mehe nehe.

Aze nerewazar kwaw heze'eg ihewe nehe,

Aiko putar umàno ma'e kwer waneta haw pe wezyw ma'e wainuromo ihe nehe.

2 Hepytywà àwàm henoz mehe, herehapukaz mehe herenu katu pe nehe.

Apyho hepo neràpuzuhu imonokatu pyrer kutyr hepytywà àwàm henoz mehe ihe.

3 Ezepyk zo herehe iaiw ma'e wainuromo nehe,

Ikatu 'ym ma'e iapo har wainuromo nehe.

— Uruiko nemyrypar romo ure, i'i mua'u ihewe wà.

Tynehem wapy'a katu 'ymaw pupe wà.

4 Ezepyk a'e teko wanehe wanemiapo kwer hekuzaromo nehe,

Ikatu 'ym ma'e paw hekuzaromo nehe.

Emono wanemiapo kwer hekuzar wanupe nehe, ikatu 'ym ma'e wanupe nehe.

5 Na'ipurukwaw wer kwaw Tupàn Tuweharupi Wiko Ma'e hemiapo kwer rehe wà.

Nume'e kwaw hemiapo kwer ikàg ma'e wà.

A'e rupi uzepyk putar wanehe nehe.

Umumaw putar azeharomoete a'e wà nehe. Nuzewyr kwaw wà nehe.

6 Tuwe teko umume'u Tupàn Tuweharupi Wiko Ma'e ikatu haw wà nehe.

Wenu herehapukaz mehe hepytywà àwàm henoz mehe a'e.

7 Tuweharupi Wiko Ma'e wiko hekàgaw romo a'e. Wiko u'yw wi hemimaw ài no.

Azeruzar katu tuwe hehe ihe.

Tuweharupi Wiko Ma'e hepytywà a'e.

A'e rupi hepy'a hurywete a'e.

A'e rupi amuzàg zegar haw ikatu haw rehe izupe ihe.

8 Tupàn Tuweharupi Wiko Ma'e wiko wemiaihu wakàgaw romo a'e.

Tuweharupi Wiko Ma'e upyro tuwihawete wemixak kwer a'e, iàmàtyry'ymar wanuwi a'e.

9 O Tupàn, epyro neremiaihu wà nehe.

Ezapo ikatu ma'e neremiruze'eg wanupe nehe no.

Eiko àràpuhàràna'yr wamono'ogar zàwenugar neremiaihu wanupe nehe.

Ezekaiw katu wanehe tuweharupi nehe.