1 Pe Tupàn heruzar har paw rupi pe wà,

Penurywete Tupàn Tuweharupi Wiko Ma'e hemiapo kwer rehe nehe.

Pe Tupàn heruzar har paw pe wà, pemume'u Tupàn ikatu haw nehe.

2 Pemupu wioràwiràn Tupàn Tuweharupi Wiko Ma'e ikatu haw imume'u pà nehe.

Pemuzàg zegar haw Tupàn ikatu haw imume'u haw nehe, wioràwiràn 10 ihàm hereko har imupu pà nehe.

3 Pemuzàg zegar haw ipyahu ma'e Tupàn pe nehe.

Pemupu pewioràwiràn pezegar pà wahyhaw rupi nehe.

4 Tupàn Tuweharupi Wiko Ma'e ze'eg azeharomoete har romo a'e.

Zapuner hemiapo nànàn zanezeruzar haw rehe zane.

5 Tupàn Tuweharupi Wiko Ma'e uzamutar katu ikatu ma'e a'e. Uzamutar katu ikatu haw no.

Ywy tynehem ipuruamutar katu haw pupe a'e.

6 Uze'eg Tupàn Tuweharupi Wiko Ma'e ywak iapo pà a'e.

Umume'u wemimutar kwarahy iapo pà, zahy iapo pà no, zahytata iapo pà no.

7 Omono'og Tupàn yryhu paw pitài yryhu romo iapo pà.

Omonokatu 'y yryhu rehe har imonokatu haw pupe no.

8 Tuwe ywy paw ukyze Tupàn Tuweharupi Wiko Ma'e wi nehe.

Tuwe ywy rehe har paw ukyze izuwi wà nehe.

9 Ta'e uze'eg ywy iapo pà a'e xe.

Umume'u ma'e paw wazexak kar àwàm. Na'arewahy ma'e paw uzexak kar a'e wà.

10 Tupàn Tuweharupi Wiko Ma'e umumaw ywy nànànar wanemiapo putar haw a'e.

Nuzapo kar kwaw wanemimutar a'e teko wanupe a'e.

11 Aze Tupàn Tuweharupi Wiko Ma'e umume'u amo ma'e wemiapo ràm a'e, a'e ma'e nukàzym pixik kwaw nehe.

Hemiapo putar haw nupaw pixik kwaw nehe.

12 Aze amo ywy rehe har wereko Tuweharupi Wiko Ma'e uzar romo wà, hurywete wà.

Aze Tupàn wexaexak amo teko wà, wemiaihu romo wamuigo kar pà wà, hurywete a'e teko wà.

13 Tupàn Tuweharupi Wiko Ma'e ume'e ywy rehe ywak rehe wiko mehe a'e.

Wexak teko paw wà.

14 Weko haw pe wiko mehe

Ume'e ywy rehe har nànàn a'e.

15 Tupàn uzapo teko ima'enukwaw ma'e romo a'e wà.

Ukwaw wanemiapo kwer upaw rupi a'e.

16 Amo tuwihawete nuweityk kwaw amo tuwihawete zauxiapekwer ikàg ma'e wamono kar pà ikutyr.

Hemiruze'eg zauxiapekwer nuweityk kwaw inugwer ukàgaw rupi wà.

17 Kawaru zeàmàtyry'ymawhu pe har nuweityk kwaw a'e tuwihawete wà.

Wakàgaw uhua'u ma'e nupuner kwaw wyzài teko wapyro haw rehe wà.

18 Xo Tupàn Tuweharupi Wiko Ma'e zo upyro izuwi ukyze ma'e a'e wà.

Xo a'e zo omonokatu ipuruamutar katu haw rehe uzeruzar ma'e wà.

19 Upyro wamàno haw wi wà.

Umuigo kar wiwi temi'u heta 'ym mehe wà no.

20 Xiàro Tupàn Tuweharupi Wiko Ma'e hemiapo ràm ikatu ma'e zane.

Wiko zanepytywà har romo a'e. Nuzawy kwaw u'yw wi zanemimaw ài no.

21 Zanepy'a hurywete

Tupàn Tuweharupi Wiko Ma'e hemiapo kwer rehe zane.

Zazeruzar hehe ta'e ikatuahy a'e xe.

22 O Tupàn Tuweharupi Wiko Ma'e, tuwe nepuruamutar haw wiko ureinuinuromo nehe,

Ta'e xiàro neremiapo ràm ikatu ma'e zane xe.