1 Aze Tupàn umunàn hemiapo kwer ikatu 'ym ma'e amo wi nehe,

Aze o'ok hemiapo kwer rehe ima'enukwaw paw izuwi nehe, hurywete putar a'e teko a'e nehe.

2 Aze Tupàn Tuweharupi Wiko Ma'e numume'u kwaw ikatu 'ym ma'e neremiapo kwer nehe, nerurywete putar nehe.

Ikatu 'ym ma'e iapo har 'ym hurywete putar wà nehe no.

3 Ikatu 'ym ma'e heremiapo kwer Tupàn pe imume'u 'ym mehe we ihe,

Hekene'o ihe, hezai'o tetea'u pà 'ar katu ihe.

4 'Aromo nehe, pyhaw nehe no, herehe erezepyk, o Tupàn.

Zuwiri ukàzym hakuahy haw kwarahy mehe har rehe a'e.

Nezewegatete hekàgaw upaw ihewi a'e.

5 A'e rupi amume'u ikatu 'ym ma'e heremiapo kwer newe ihe.

Namim kwaw hekatu 'ymaw newi.

— Amume'u putar heremiapo kwer Tupàn pe ihe nehe, a'e hezeupe.

A'e rupi eremunàn ikatu 'ymaw paw ihewi ne.

6 Nezewe mehe, tuwe neamutar katu har paw uze'eg newe wà nehe,

Ma'erahy ipuraraw mehe wà nehe.

Nezewe mehe, ma'erahyhu ykotok ài tur mehe nehe,

Nuhem kwaw a'e teko wanupe nehe.

7 Ereiko hemimaw romo ne.

Hepyro ma'erahy wi.

Azegar tuwe nepurupyro haw rehe ihe,

Ta'e hepyk heàmàtyry'ymar wanuwi ne xe.

8 Tupàn Tuweharupi Wiko Ma'e uze'eg ihewe.

— Urumu'e putar pe neho àwàm rehe ihe nehe.

Aexak kar putar neho àwàm nehe. Akwaw kar putar neremiapo ràm nehe no.

9 Kawaru a'e, kawaràn a'e no, ma'e kwaw par 'ym romo wanekon a'e wà. Eiko zo wazàwe nehe.

Ximuata kar waàkàg rehe har pupe zane, wahàm pupe zane.

Xo nezewe mehe zo oho zaneremimutar rupi wà.

10 Ikatu 'ym ma'e iapo har a'e wà, upuraraw ma'erahy tetea'u a'e wà.

Aze teko uzeruzar Tupàn Tuweharupi Wiko Ma'e rehe wà,

Tupàn uzekaiw katu wanehe upuruamutar katu haw inuromo a'e.

11 Pe ikatu ma'e paw rupi pe wà, penurywete nehe.

Penurywete tuwe Tuweharupi Wiko Ma'e hemiapo kwer rehe nehe.

Pe Tupàn heruzar har pe wà, pezegar penurywete romo nehe.