1 — Tupàn Tuweharupi Wiko Ma'e hepytywà putar a'e nehe, a'e hezeupe. Àrogatu hepytywà àwàm ihe.

Uzeapyaka herehe. Wenu izupe hepytywà àwàm henoz mehe.

2 Hepyro ywykwar iaiw ma'e wi.

Herenuhem to'om heta haw wi.

Hemuapyk katu itahu rehe.

Uzapokatu heata haw.

3 Hemu'e zegar haw ipyahu ma'e imuzàgaw rehe a'e,

Tupàn Zanezar ikatu haw rehe zegar haw rehe a'e.

Teko tetea'u ukyze putar Tupàn Tuweharupi Wiko Ma'e wi wà nehe, a'e zegar haw henu mehe wà nehe.

Uzeruzar putar hehe wà nehe.

4 Hurywete putar Tupàn Tuweharupi Wiko Ma'e rehe uzeruzar ma'e wà nehe.

Hurywete putar tupàn a'ua'u wanekar 'ymar wà nehe.

Hurywete putar tupàn a'ua'u wamuwete katu har wainuromo uzemono'og 'ym ma'e wà nehe.

5 O Tupàn Tuweharupi Wiko Ma'e urezar.

Erezapo ma'e uhua'u ma'e urewe ne wà.

Naheta kwaw amo nezàwenugar wà.

Eremume'u ikatuahy ma'e urewe neremiapo ràm.

Aze mo heze'eg wer a'e ma'e nànàn,

Napuner iwer mo, ta'e heta tetea'u a'e wà xe.

Teko nupuner kwaw wapapar haw rehe wà.

6 Nereputar kwaw nerenataromo ma'ea'yr izuka pyr ne wà.

Nereputar kwaw arozràn newe imur pyr no.

Ma'ea'yr nerenataromo hapy pyr nerenoz kwaw ne wà.

— Pemur ma'e ihewe penemiapo kwer hekuzaromo nehe, nere kwaw teko wanupe.

Eremur hereapyakwar ihewe ne, ma'e henu kar pà ihewe ne.

7 A'e rupi aze'eg nezewe newe. — Aiko aiko xe ihe, a'e newe.

— Neze'eg ihewe imur pyrer eremuapyk kar pape neze'eg hereko har rehe ne.

8 O hezar, neremimutar iapo haw hemurywete kar a'e.

Amonokatu neze'eg hepy'a pe ihe, a'e newe.

9 O Tupàn Tuweharupi Wiko Ma'e, neremiaihu paw wazemono'og mehe, amume'u ze'eg puràg wanupe ihe.

Amume'u nepurupyro haw wanupe ihe.

Napytu'u pixik kwaw imume'u re nehe. Erekwaw hepytu'u àwàm ne.

10 Namonokatu kwaw nepurupyro haw imume'u haw hezeupe ihe nehe. Amume'u putar teko wanupe nehe.

Tuweharupi aze'eg puruwi netyryk 'ymaw rehe ihe. Erepuner teko wapyro haw rehe. Amume'u nepuner haw tuweharupi no.

Neremiaihu wazemono'og mehe napyta kwaw heze'eg 'ym pà ihe.

Amume'u nepuruamutar haw ihe. Puruwi netyryk 'ymaw amume'u no.

11 O Tupàn Tuweharupi Wiko Ma'e, nerepytu'u pixik kwaw ikatu ma'e romo nereko re ihewe nehe. Akwaw nepytu'u 'ym àwàm ihe.

Nepuruamutar haw a'e nehe, puruwi netyryk 'ymaw a'e nehe no, uzekaiw katu herehe tuweharupi a'e wà nehe.

12 Zawaiw katu haw tetea'u umàmàn heywyr wà.

Napuner kwaw wapapar haw rehe.

Heremiapo kwer ikatu 'ym ma'e hepyhyk a'e wà.

Uhem etea'i ma'e hexakaw ihewi kury.

Heremiapo kwer ikatu 'ym ma'e heta tetea'u wera'u he'aw heàkàg rehe har wanuwi wà.

A'e rupi azemumikahy ihe.

13 O Tupàn Tuweharupi Wiko Ma'e, hepyro pe nehe.

Hepytywà pe kury.

14 Tuwe amo weityk herehe ipuruzuka wer ma'e wà nehe, ikàg 'ym ma'e romo wamuigo kar pà wà nehe.

Tuwe hema'erahy rehe hurywete ma'e uzàn umaranugar romo wà nehe.

15 Tuwe herehe uze'eg urywahyahy ma'e u'ar iaiw paw rehe wà nehe.

Tuwe uzeapo he'o ma'e romo wà nehe no.

16 Nemuwete katu har a'e wà nehe, tuwe hurywete paw rupi wà nehe. Tuwe nekatuahy wanupe nehe.

Nepurupytywà haw rehe hurywete ma'e wà nehe, tuwe uze'eg nezewe tuweharupi wà nehe.

— Uhua'u tuwe Tupàn Tuweharupi Wiko Ma'e a'e, tuwe i'i wà nehe.

17 Aiko hemetarer 'ym ma'e romo ihe. Ma'e hereko 'ymar romo aiko.

Ne, hezar, erezekaiw katu herehe ne. Hepytywà pe iko.

Ereiko hepyro har romo no.

Tuwe hepytywà haw na'iàrew kwaw nehe, hezar.