1 Hurywete ma'e hereko 'ymar wapytywà har wà.

Tupàn Tuweharupi Wiko Ma'e upytywà putar a'e wà nehe no,

Waneko haw zawaiw katu mehe a'e wà nehe.

2 Tupàn Tuweharupi Wiko Ma'e upyro putar wà nehe. Uzekaiw putar waneko haw rehe nehe.

Umurywete kar putar ywy imume'u pyrer rehe wà nehe.

Nomono kwaw waàmàtyry'ymar wapo pe wà nehe. Nupuir kwaw wanuwi nehe.

3 Wanupaw rehe wama'eahy mehe nehe,

Tupàn Tuweharupi Wiko Ma'e upytywà putar wà nehe.

Omono wi putar wanuhàgaw wanupe nehe.

4 Aze'eg nezewe Tupàn pe ihe.

— O Tupàn Tuweharupi Wiko Ma'e, azapo ikatu 'ym ma'e ihe, neze'eg ihaw pà ihe.

Hepuhareko pe hemukatu pà nehe, a'e izupe.

5 Heàmàtyry'ymar uze'eg zemueteahy herehe wà.

— Tuwe umàno nehe, i'i herehe wà. — Tuwe teko heharaz izuwi wà nehe, i'i herehe wà.

6 Aze amo wainuromo har ur herexak pà,

Numume'u kwaw ze'eg azeharomoete har.

Wexak hema'eahy haw no.

Na'e umume'u a'e ma'e oho iko amogwer wanupe.

7 Herehe iakatuwawahy 'ym ma'e uze'eg zemueteahy herehe wà, uwewowewo pà wà.

— Iaiw wera'u ma'e uzeapo putar izupe nehe, i'i uzeupe herehe wà.

8 Nezewe i'i wà.

— Ima'eahy tuwe a'e,

Nupu'àm wi pixik kwaw nehe, i'i herehe wà.

9 Te hemyrypar heremiamutar katu wera'u wiko nezewe a'e no.

Azeruzar tuwe hehe ihe.

Umai'u heràpuz me a'e.

Te a'e wiko heàmàtyry'ymar romo a'e xe.

10 O Tupàn Tuweharupi Wiko Ma'e, hepuhareko pe nehe.

Emumaw hema'eahy haw hemukàg wi kar pà nehe.

Nezewe mehe apuner putar heàmàtyry'ymar wanehe hezepykaw rehe nehe.

11 Nahereityk kwaw wà nehe.

Nezewe mehe newe hekatu haw akwaw putar ihe nehe.

12 Hepytywà putar pe nehe, ta'e azapo ikatu ma'e ihe xe.

Hemuigo kar putar pe nepyr tuweharupi nehe no.

13 Tuwe teko umume'u Tupàn Tuweharupi Wiko Ma'e Izaew wazar ikatu haw wà nehe.

Tuwe umume'u ikatu haw kutàri wà nehe. Tuwe umume'u ikatu haw tuweharupi wà nehe no.

Amez, amez. Azeharomoete nehe, azeharomoete nehe.