1 Tupàn Tuweharupi Wiko Ma'e uhua'u a'e.

Aze teko heko haw pe har tawhu pe har umume'u ikatu haw a'e wà, ikatuahy.

Ywytyr Xiàw her ma'e imonokatu pyrer rehe ikatu haw imume'u haw ikatuahy no.

2 Ywytyr Tupàn ima'e a'e, iaiha a'e, ipuràg eteahy no.

Tawhu tuwihawete ikàg ma'e henaw a'e, umurywete kar teko ywy nànànar a'e wà.

3 Tupàn omonokatu teko tawhu pupe a'e wà, tàpuz imuàtà pyrer pupe a'e wà.

Wexak kar wamonokatu haw wanupe a'e.

4 Amo tuwihawete uzemono'og wà,

Xiàw ywytyr iàmàtyry'ymaw rehe ur pà wà.

5 Tawhu hexak mehe ipytuhegatu wà.

Uzàn na'arewahy a'e wi ukyze pà wà.

6 Ukyze wà. Ukyze tuwe wà.

Nuzawy kwaw kuzà umemyrahy mehe har wà.

7 Wiko kanuhu pupe har

Ykotok uhua'u ma'e inuinuromo har zàwe wà.

8 Xinu Tupàn Tuweharupi Wiko Ma'e hemiapo kwer rehe ze'eg awer zane.

Kutàri xixak tawhu zanezar ikàg wera'u ma'e henaw rehe

Uzeapo ma'e kwer no.

Omonokatu tawhu tuweharupi.

9 Uruiko neràpuzuhu pupe, o Tupàn,

Nepuruamutar haw rehe urema'enukwaw pà ure.

10 Teko paw umume'u nekatu haw wà.

Nekàgaw teko ywy nànànar ukwaw wà.

Ta'e erepureruze'eg iko nekatu haw rupi xe.

11 Penurywete nehe, teko Zeruzarez pe har wà.

O Tupàn, nepureruze'egaw ikatuahy.

Teko tawhu Zuta ywy rehe har pe har wà, penurywete ipureruze'egaw ikatu ma'e rehe nehe.

12 Tupàn hemiaihu wà, peata Zeruzarez tawhu izywyr nehe.

Pepapar hàpuzaiha tawhu izywyr har pe wà nehe.

13 Peme'egatu pàrirogaw wanehe nehe.

Peme'e tuwe tàpuz imuàtà pyrer teko wazemonokatu haw wanehe nehe.

Nezewe mehe pepuner nezewe peze'eg pà pezuapyapyr wanupe nehe.

14 — Tupàn wiko putar zanezar romo tuweharupi nehe, peze putar wanupe nehe.

— Wexak kar putar zanerape ràm zaneho àwàm zanewe tuweharupi nehe, peze putar wanupe nehe.