1 Pe teko paw pe wà, pezeapyaka katu ko ze'eg rehe nehe.

Peinu nehe, ywy nànànar wà.

2 Teko hemetarer katu ma'e pe wà,

Teko hemetarer 'ym ma'e pe wà no, peinu heze'eg nehe.

3 Aiko ma'e kwaw katu har romo ihe.

Amume'u putar a'e ma'e ma'e kwaw par ài nehe.

4 Azekaiw katu putar ze'eg xirogatu ma'e wanehe nehe.

Ze'eg xirogatu ma'e amume'u putar purupe ihe nehe, hewioràwiràn imupumupu mehe ihe nehe.

5 Aze hereko haw zawaiw katu ihewe,

Heàmàtyry'ymar iaiw ma'e heywyr wamàmàn mehe, nakyze kwaw wanuwi ihe.

6 A'e iaiw ma'e uzeruzar wemetarer rehe wà.

Wiko wera'u amo wanuwi wà, ta'e hemetarer katuahy wà xe.

7 Ni amo nupuner kwaw uzepyro haw rehe wà.

Ni amo nupuner kwaw weko haw imekuzar haw rehe Tupàn pe wà,

8 ta'e temetarer ko ywy rehe har

Nuhyk kwaw amo teko heko haw hekuzaromo a'e xe.

9 Aze amo teko hemetarer katu a'e nehe, nezewe rehe we umàno putar amo 'ar mehe nehe.

— Aiko putar tuweharupi nehe, nupuner kwaw u'e haw rehe.

10 Teko ma'e kwaw katu har umàno a'e wà. Teko paw wexak wamàno haw wà.

Iranaiw ma'e umàno a'e wà no. Ma'e kwaw par 'ym umàno a'e wà no.

Upaw rupi katete wezar wemetarer amo wanupe wà.

11 Watymaw uzeapo wapyta haw romo.

Upyta a'e pe tuweharupi wà.

Aze wereko ywy tetea'u wikuwe mehe wà, nezewe rehe we uzetym kar wà.

12 Teko ikàg wera'u ma'e wà, te teko hemetarer katu wera'u ma'e wà no, nupuner kwaw umàno àwàm wi uhemaw rehe wà.

Ma'ea'yr umàno wà.

Nezewegatete a'e teko umàno putar a'e wà nehe no.

13 Peme'e uzeapo ma'e ràm rehe nehe, uzehe uzeruzar ma'e wanupe uzeapo ma'e ràm rehe nehe.

Amo hurywete wemetarer uhua'u ma'e rehe wà.

Pexak wanupe uzeapo ma'e ràm iahykaw rehe àràm nehe.

14 Wamono'ogar weraha àràpuhàràn a'e wà. Nezewegatete teko wamàno haw weraha a'e teko a'e wà no.

Weraha wà.

Umàno putar àràpuhàràn izuka pyràm ài wà.

Iku'em mehe ikatu ma'e weityk putar a'e teko wà.

Wanetekwer inem putar umàno ma'e kwer wapyta haw pe wà nehe, muite waneko awer wi wà nehe.

15 Tupàn hepyro putar màno haw ikàgaw wi nehe,

Ta'e hemuixe kar putar weko haw pe nehe xe.

16 Aze amo uzeapo hemetarer katu ma'e romo nehe, pezekaiw zo hehe nehe.

Tuweharupi hemetarer uhua'u wera'u oho iko. Pezemumikahy zo hemetarer tetea'u rehe nehe,

17 ta'e umàno mehe nupuner kwaw ni pitài wemetarer heraha haw rehe nehe xe.

Hemetarer noho kwaw hupi itym àwàm mehe nehe.

18 Upuner weko haw rehe urywete haw rehe.

Teko upuner ikatu haw ikàgaw rehe uze'egatu haw rehe wà no.

19 Nezewe rehe we umàno mehe uzemono'og putar oho uwipy wainuinuromo nehe.

Ipytunahy haw nupaw pixik kwaw a'e pe nehe.

20 Teko ikàg wera'u ma'e

Nuhem kwaw umàno àwàm wi a'e wà.

Nezewe rehe we umàno putar ma'ea'yr ài wà nehe.