1 Tupàn, o Tupàn Tuweharupi Wiko Ma'e uze'eg iko ywy nànànar wanenoz pà a'e.

Wenoz teko ywy ipehegwer rehe har wà.

Wenoz teko inugwer ipehegwer rehe har wà no.

2 Tupàn heiny katu kwarahy ài pe pe Zeruzarez pe a'e.

Tawhu ikatuahy ma'e pe a'e, Ipuràg eteahy ma'e pe a'e.

3 Tupàn Zanezar ur iko a'e. Nur kwaw uze'eg 'ym pà nehe.

Nur kwaw wànoànog 'ym pà nehe.

Tata ma'e imumaw har ur henataromo.

Ywytuaiw ur iko izywyr no.

4 Wenoz ywak iko. Wenoz ywy iko no.

Wexak kar putar wemiaihu wanemiapo kwer imume'u haw nehe, wanupe nehe.

5 — Pemono'og herehe uzeruzar ma'e pe wà nehe, i'i wanupe.

— Pemono'og uze'egaw herehe we iapo katu arer pe wà nehe, i'i.

— Uzuka kar ma'ea'yr herenataromo wà, herehe uzeruzar haw hexak kar pà ihewe wà, i'i wanupe.

6 Ywak umume'u Tupàn ikatu haw.

Umume'u teko wanemiapo kwer imume'u har romo heko haw no.

7 Nezewe uze'eg Tupàn Tuweharupi Wiko Ma'e wemiaihu wanupe kury. — Pezeapyaka katu, heremiaihu, heremimume'u ràm rehe nehe.

Amume'u putar penemiapo kwer ikatu 'ym ma'e nehe, teko Izaew izuapyapyr wà.

Aiko Tupàn romo ihe, pezar romo aiko ihe.

8 Naze'egahy kwaw peme ma'ea'yr herenataromo izuka pyrer wanehe ihe nehe,

Ma'e ihewe imur pyrer wanehe ihe nehe.

9 Naputar kwaw tapi'ak awa peko pe har ihe wà.

Naputar kwaw àràpuhàrànete peneimaw wainuinuromo har ihe wà,

10 Ta'e miar ka'a pe har wiko hereimaw romo a'e wà xe.

Tapi'ak tetea'u ywytyruhu rehe har paw wiko hema'e romo wà no.

11 Wiràmiri ywytyr rehe har paw wiko hereimaw romo wà.

Miar katu pe har paw wiko hema'e romo wà.

12 Aze mo hema'uhez, nainoz iwer mo ma'e peme ihe.

Ta'e aiko ywy izar romo ihe xe. Aiko ywy rehe har paw wazar romo ihe no.

13 Aipo a'u putar tapi'ak awa ho'o kwer ihe nehe.

Aipo a'u putar àràpuhàrànete huwykwer ihe nehe.

14 Tuwe hekatu haw imume'u haw pemur ihewe imur pyr romo nehe.

Tuwe pemur ma'e penemimume'u kwer paw ihewe imur pyr romo nehe. Aiko Tupàn Ywate Wera'u Har romo ihe.

15 Aze herenoz pe ma'erahy ipuraraw paw 'ar mehe nehe,

Apupyro putar ihe nehe.

A'e mehe pemume'u putar hekatu haw nehe, i'i Tupàn wemiaihu wanupe.

16 Nezewe rehe we uze'eg Tupàn ikatu 'ym ma'e wanupe kury.

— Mo umume'u kar heze'eg peme.

Mo pemuze'eg kar heremimume'u kwer rehe wà.

17 Aze hepurumukatu wer penemiapo rehe peme, napeputar kwaw imukatu haw.

Aze azapo kar ma'e peme, naperuzar kwaw heze'eg.

18 Aze pexak amo imunar ma'e, pezemuryparypar hehe we.

Peata peho peiko awa wemireko 'ym puhe oho ma'e wanehe we, kuzà umen 'ym puhe oho ma'e wanehe we.

19 Pezemuàgà'ym tuweharupi ikatu 'ym ma'e amo wanupe imume'u àwàm rehe.

Penemu'em wanupe peze'eg rehe pema'enukwaw 'ym pà no.

20 Tuweharupi peze'eg zemueteahy penywyr wanehe.

Penemu'em wanehe purupe no.

21 Pezapo a'e ikatu 'ym ma'e peho. Naze'eg kwaw ihe.

— Wiko zanezàwe a'e, peze herehe.

Ko 'ar rehe amume'u putar pekatu 'ymaw ihe nehe kury.

Aexak kar putar penemiawy kwer nehe no.

22 Peneharaz ihewi. Pema'enukwaw katu penemiapo kwer rehe nehe.

Aze napema'enukwaw kwaw wanehe nehe, apumumaw putar ihe nehe.

Ni amo nupuner kwaw pepyro haw rehe wà nehe.

23 Aze amo teko werur ma'e ihewe nehe, hekatu haw rehe nehe, a'e teko hemuwete katu iko a'e.

Apyro putar herape rupi wata ma'e upaw rupi ihe wà nehe.