1 Hepuhareko pe nehe, o Tupàn.

Hepuhareko pe nehe, ta'e aikar hepyro àwàm nerehe ihe xe.

Aexak hepyro haw nepepo i'àg rehe. Apyta a'e pe.

Xo ikatu 'ymaw iho re zo ahem a'e wi.

2 Aze'eg Tupàn Ywate Wera'u Har pe hepytywà àwàm henoz pà izupe.

Aenoz Tupàn ihe. Hepytywà ikatu 'ym ma'e wi hemunyryk kar pà a'e.

3 Uwazar putar heze'eg ywak rehe wiko mehe. Hepyro putar nehe.

Weityk putar hekutyr ur ma'e ràm wà nehe.

Tupàn wexak kar putar upuruamutar haw ihewe nehe. Wexak kar putar puruwi utyryk 'ymaw ihewe nehe no.

4 Heàmàtyry'ymar umàmàn heywyr wà.

Nuzawy kwaw zàwàruhu iriàw wà. Ipuru'u wer herehe wà.

Wanàz nuzawy kwaw purukutukaw wà. Nuzawy kwaw u'yw wà no.

Wapeku nuzawy kwaw takihepuku haime ma'e wà.

5 O Tupàn, exak kar nehua'u haw ywak rehe har nehe, purupe nehe.

Tuwe nekàgaw nepuràg eteahy haw heiny katu ywy nànàn nehe no.

6 Heàmàtyry'ymar uzapo ma'e hepyhyk pà wà, hezuka pà wà.

Azemumikahy hekyze pà ihe.

Uzapo ywykwaruhu herape rupi hetym àwàm romo wà.

Iapo har zote u'ar wemiapo kwer pupe wà no.

7 Hepy'a pe azeruzar katu nerehe, o Tupàn. Hekàg tuwe ihe.

Amuzàg putar zegar haw nekatu haw imume'u pà nehe.

8 Eme'e nehe, hepy'a.

Eme'e nehe, hewioràwiràn. Epu'àm nehe, hewioràw zàwenugar.

Amume'e kar putar kwarahy ihe nehe.

9 Hezar, amume'u putar nekatu haw ywy nànànar wainuinuromo nehe.

Amume'u putar nekàgaw amogwer teko wainuinuromo nehe.

10 Nepuruamutar haw uhua'u a'e.

Uhem ywak rehe. Puruwi netyryk 'ymaw uhem ywàkun rehe.

11 O Tupàn, exak kar nehua'u haw ywak rehe har purupe nehe.

Tuwe nekàgaw nepuràg eteahy haw heny katu ywy nànàn nehe no.