1 Pe tuwihaw wà, aipo penemu'em teko wanemiapo kwer imume'u mehe.

Aipo xo ikatu 'ym ma'e wanehe pezekaiw.

2 Azeharomoete napekatu kwaw. Xo ikatu 'ym ma'e iapo àwàm rehe pema'enukwaw.

Pezapo iaiw ma'e teko ko ywy rehe har wanupe.

3 Ikatu 'ym ma'e umumaw u'ar ikatu 'ym ma'e iapo pà wà.

Uzexak kar awer 'ar henataromo xo temu'emaw zo umume'u oho waiko wà.

4 Nuzawy kwaw mozaiw wà. Tynehem puruzuka haw pupe wà.

Uwàpytym wapyakwar moz ma'e henu 'ymar ài wà.

5 A'e moz na'ipurenu wer kwaw moz imugakwaw par rehe ize'eg mehe wà.

6 O Tupàn. Ezuhaw ikatu 'ym ma'e wanàz nehe.

O Tupàn Tuweharupi Wiko Ma'e, ezo'ok wanàz nehe, a'e zàwàruhu iriàw ipuruzukaiw ma'e wanuwi nehe.

7 Tuwe ikatu 'ym ma'e ukàzym 'y ywy rehe izakook pyrer ài wà nehe.

Tuwe uzezuhazuhaw ka'api'i pe rupi hezuz ma'e kwer ài wà nehe.

8 Tuwe ukàzym amu'a to'om inuromo har ài wà nehe.

Tuwe wiko kwarer umàno ma'e kwer romo uzexak kar ma'e ài wà nehe.

A'e kwarer nuexak pixik kwaw kwarahy a'e.

9 Uzeapo ma'e ikwaw 'ym mehe we

Ikatu 'ym ma'e uzemonohok kar ka'akyr ài wà.

Wanekuwe mehe we

Tupàn omono kar putar uzewi upytuhemaw pupe wekwahy haw ukaz ma'e rupi nehe.

10 Ikatu ma'e hurywete putar wà nehe,

Ikatu 'ym ma'e iapo har wanehe Tupàn izepyk mehe wà nehe.

Ikatu ma'e uhez putar upy ikatu 'ym ma'e wanuwykwer pupe wà nehe.

11 Paw rupi uze'eg putar nezewe wà nehe. — Azeharomoete Tupàn uzapo ikatu ma'e a'e, ikatu ma'e wanupe a'e.

Azeharomoete heta Tupàn ywy rehe har wanemiapo kwer imume'u har a'e, i'i putar wà nehe.