1 Xo Tupàn inuromo zo hepy'a upytu'u.

Umur hepyro haw ihewe a'e.

2 Xo a'e zo wiko itahu hemimar ài a'e. Xo a'e zo hepyro.

Hemim heàmàtyry'ymar wanuwi.

Nahereityk pixik kwaw heàmàtyry'ymar wà nehe.

3 Awa na'ikàg kwaw a'e. Nuzawy kwaw pàri heityk pyrer.

Pezàmàtyry'ym a'e awa tuweharupi. Màràn mehe pepytu'u putar iàmàtyry'ym ire nehe.

4 Pepurumunyryk kar wer hehe tuwihawete romo heko haw wi pe.

Penemu'emaw ikatu peme.

Pemume'u mua'u ikatu ma'e hehe peze'eg mehe.

Pepy'a pupe zote pemono ze'egaiw hehe.

5 Xo Tupàn inuromo zo hepy'a upytu'u ihe.

Xo a'e zo àro ihe.

6 Xo a'e zo wiko itahu hemimar ài a'e. Xo a'e zo hepyro.

Hemim heàmàtyry'ymar wanuwi.

Nahereityk pixik kwaw wà nehe.

7 Xo Tupàn inuromo zo heta hepyro àwàm. Xo a'e zo wexak hekatu haw.

Wiko itahu hemimar ikàg ma'e ài.

8 Heremiaihu wà, pezeruzar tuweharupi Tupàn rehe nehe.

Pemume'u ma'erahy penemipuraraw paw izupe nehe,

Ta'e a'e wiko zanemimaw romo a'e xe.

9 Teko a'e wà, hemetarer 'ym ma'e wà, hemetarer katu ma'e wà no,

Nuzawy kwaw pytuhemaw wà.

Aze mo upyta ma'epuhuz taw hexak kar haw rehe wà,

Naheta iwer mo wapuhuz taw wà.

Wapuhuz taw ipixika'i wera'i pytuhemaw wi wà.

10 Pezeruzar zo puruzuka haw rehe nehe.

— Hemunar putar ma'e rehe temetarer tetea'u imono'og pà nehe,

Peze zo pezeupe nehe.

Aze penemetarer uhua'u wewer tuweharupi nehe, nezewe rehe we pezeruzar zo hehe nehe.

11 Aenu Tupàn Zanezar ize'eg mehe. Aenu wiwi ize'eg mehe no. — Aiko kàgaw izar romo ihe, i'i.

12 Aiko puruamutar haw izar romo no, i'i.

Umekuzar wanemiapo kwer

Teko wanupe pitàitàigatu a'e.