1 O Tupàn herenu pe hezai'oahy mehe nehe.

Einu newe heze'egaw nehe.

2 Aiko muite hereko haw wi iaiw haw inuromo ihe.

Aenoz hepytywà àwàm iteko ihe.

Hereraha pe amo hemim àwàm me nehe.

3 Ta'e ereiko herehe uzekaiw ma'e romo ne xe.

Ereiko hepyro har ikàg ma'e heàmàtyry'ymar wanuwi.

4 Tuwe aiko neràpuzuhu pupe he'ar nànàn nehe.

Nezewe mehe erezekaiw katu putar herehe nehe, wiràmiri upepo iwy pe umemyr wanehe izekaiw haw ài nehe.

5 O Tupàn, erenu heremiapo ràm heremimume'u kwer.

Eremono neze'egatu nereruzar har newi ukyze ma'e wanehe. Agwer ma'e eremur herehe no.

6 Eremumaw kar kwarahy tetea'u tuwihawete pe nehe.

Tuwe umumaw kwarahy tetea'u wiko pà nehe.

7 O Tupàn, tuwe eremono neze'egatu hehe tuweharupi tuwihawete romo heko mehe nehe.

Ezekaiw katu hehe nepuruamutar haw inuromo nehe, teko wanuwi netyryk 'ymaw inuromo nehe no.

8 Nezewe mehe amuzàg putar nekatu haw rehe zegar haw tuweharupi ihe nehe.

Tuweharupi amono putar ma'e newe heremimume'u kwer rupi katete ihe nehe.