1 O Tupàn, herenu pe newe heze'eg mehe nehe,

Ta'e zawaiw katu hereko haw kury xe.

Hepyro pe nehe,

Ta'e akyze heàmàtyry'ymar wanuwi ihe xe.

2 Ikatu 'ym ma'e umume'u hezuka àwàm uzeupeupe wà. Hepyro pe wanuwi nehe.

Awa iaiw ma'e uzemono'og ikatu 'ym ma'e iapo àwàm rehe wà. Ezekaiw katu herehe wanuwi hemunyryk kar pà nehe.

3 Teko ikatu 'ym ma'e umuaime katu uwapeku takihepuku ài wà.

U'yw ài uwako'ok uze'eg iaiw ma'e wà no. Waze'eg tynehem puruzuka haw pupe.

4 Umuhàmuhàz wemu'emaw iaiw ma'e na'arewahy wà.

Umumaw teko ikatu ma'e wemu'emaw iro ma'e pupe wà no.

5 Uzemurywete ikatu 'ym ma'e wemiapo ràm imume'u pà uzeupeupe wà.

Umume'u puruzuka haw imono àwàm rehe wà no.

— Ni amo nupuner kwaw zanerexakaw rehe wà, i'i uzeupeupe wà.

6 Wanemiapo ràm imume'u haw tynehem ikatu 'ymaw pupe.

— Ximume'u ikatu 'ym ma'e zaneremiapo ràm kwez kury.

Teko nukwaw pixik kwaw iapo arer wà nehe, i'i uzeupeupe wà. Teko nukwaw kwaw amo teko wama'enukwaw paw wà. Nukwaw kwaw wanemiapo putar haw wà.

7 Tupàn omomor putar u'yw wakutyr a'e nehe.

Na'arewahy uzywà putar a'e wà nehe.

8 Tupàn umumaw putar a'e teko waze'eg hekuzaromo a'e wà nehe.

A'e teko wanexakar uweruwaruwak putar uwàkàg wà nehe, wanehe uze'eg urywahyahy pà wà.

9 Na'e teko paw ukyze putar wà nehe.

Ima'enukwaw putar Tupàn hemiapo kwer rehe wà nehe.

Uze'eg putar hemiapo kwer ikàg ma'e rehe wà nehe no.

10 Tupàn Tuweharupi Wiko Ma'e umurywete kar teko ize'eg heruzar har a'e wà.

A'e teko wexak upyro haw Tupàn inuromo wà.

A'e paw umume'u putar ikatu haw wà nehe.