1 O Tupàn, tuwe teko umume'u nekatu haw ywytyr Xiàw her ma'e rehe wà nehe.

Tuwe omono wemimume'u kwer newe wà nehe no.

2 Erewazar waze'eg wanupe ne.

A'e rupi ur putar nemuwete pà wà nehe,

3 Ta'e ikatu 'ym ma'e iapo har romo wanekon wà xe.

Ikatu ma'e ureremiapo 'ym uremuigo kar heityk pyrer romo.

Nezewe rehe we eremunàn ureremiawy kwer.

4 Neremixamixak kwer hurywete tuwe a'e wà.

Ererur a'e neremixamixak kwer ne wà, neràpuzuhu pupe wamuigo kar pà ne wà.

Ure urerurywete putar ikatu ma'e neràpuz me har rehe ure nehe.

Nema'e ikatu ma'e neràpuzuhu pe har ikatuahy urewe.

5 O Tupàn, erewazar ureze'eg urewe ne,

Uremuigo kar pà ureàmàtyry'ymar waneitykar romo ne.

Erezapo ikatuahy ma'e urepyro pà ne no.

Teko ywy nànànar a'e wà,

Te teko yryhu muite wera'u ma'e wi ur ma'e a'e wà, uzeruzar nerehe upaw rupi katete a'e wà.

6 Eremuapyk ywytyr wanenaw rehe nekàgaw rupi ne wà.

Nezewe erexak kar nepuner haw uhua'u ma'e purupe.

7 Eremupytu'u kar yryhu ikotok ire ne.

Eremumaw ikotok iànoànogaw no. Eremupytu'u kar teko waneiheihem ire ne wà.

8 Ywy nànànar ukyze newi wà,

Neremiapo kwer uhua'u ma'e iapo awer ikwaw mehe wà.

Wexak neremiapo kwer ikatuahy ma'e wà.

A'e rupi uhapukaz urywete haw rupi ywy nànàn wà.

9 Eremugyr kar àmàn. Nezewe mehe erexak kar ywy rehe nezekaiw paw purupe.

Eremukatu ywy.

Hezuz ma'e tetea'u hehe. Ne, o Tupàn, eremugyr kar àmàn.

Nezewe mehe eremynehem yrykaw 'y pupe.

Ywy umuezuz temi'u a'e, ta'e eremuàgà'ym a'e rupi ne xe.

10 Eremugyr kar àmàn tetea'u ko rehe.

A'e 'y umuàkym ywy.

Eremuàkym ywy àmàn pupe.

A'e rupi hezuz itym pyrer a'e.

11 Nekatuahy. A'e rupi heta tetea'u temi'u hezuz ma'e.

Aze erekwaw amo ywy rehe, heta tetea'u temi'u a'e ywy rehe hezuz ma'e.

12 Ka'api'i rehe heta tetea'u ma'ea'yr wà.

Ywytyr tynehem turywete haw pupe.

13 Àràpuhàràn upyk ywy katu wà.

Ywyàpyznaw tynehem arozràn pupe.

Heiheihem urywete haw rupi wà. Uzegar urywete haw rupi wà no.