1 O Tupàn, hepyro pe nehe,

Ta'e azeapypyk etea'i 'y pupe ihe kury xe.

2 Apyta tekoko to'om ohoete ma'e pupe.

Naheta kwaw ywytàtà hepu'àmaw romo.

'Y ohoete ma'e pupe aixe.

'Y hereraha hezuka etea'i pà uwyryk mehe a'e.

3 Heze'eg myaw ihe, ta'e ahapukaz tetea'u ihe xe.

He'az uxinigahy ihewi.

Hereha ikene'o, ta'e aikar tuwe hezar tuweharupi ihe xe.

Àro hepyro àwàm.

4 Amo na'iakatuwawahy e kwaw herehe a'e wà. Heta tetea'u wà.

Waneta haw uhua'u wera'u he'aw heàkàg rehe har wanuwi wà.

Heàmàtyry'ymar umume'u temu'emaw herehe wà.

Ikàg a'e wà. Ipuruzuka wer herehe wà.

— Nemunar ma'e rehe. Emuzewyr kar a'e ma'e izarer pe nehe, i'i ihewe wà. Nahemunar kwaw ma'e rehe ihe.

5 O Tupàn, napuner kwaw heremiapo kwer ikatu 'ym ma'e imimaw rehe newi ihe.

Erekwaw iranaiw ma'e romo hereko awer.

6 O hezar, tupàn Tuweharupi Wiko Ma'e ikàg wera'u ma'e.

Emumaranugar kar zo nerehe uzeruzar ma'e ne wà nehe,

Heremiapo kwer rehe ne wà nehe.

O Tupàn Izaew wazar ne,

Erur kar zo heaiw paw nemuwete katu har wanupe nehe.

7 Teko uze'eg zemueteahy herehe a'e wà, ta'e aiko neremiruze'eg romo ihe xe.

Hemaranugar ihe no.

8 Aiko amo ae ywy rehe har ài heryky'yr wanupe ihe, herywyr wanupe ihe.

Aiko ikwaw pyr 'ym ài heànàm wanupe.

9 Neràpuzuhu iamutar katu haw ukaz hepy'a pe tata ài.

Nerehe uze'eg zemueteahy ma'e wanemiapo kwer iaiw ma'e u'ar herehe wà.

10 Apytu'u hemai'u re 'ar tetea'u imumaw pà ihe. Azemuigo kar ikàg 'ym ma'e ài.

Uze'eg zemueteahy herehe wà.

11 Amunehew kamir umàno ma'e kwer rehe zai'o haw rehe har ihe.

Upuka herehe wà.

12 Uze'eg herehe nahu rupi wà.

Uka'u ma'e uzapo ze'eg puràg herehe har wà. Umume'u umyrypar wanupe herehe upuka pà wà.

13 Nezewe rehe we, o Tupàn Tuweharupi Wiko Ma'e, aze'eg newe.

O Tupàn, ewazar heze'eg ihewe 'ar newe ikatu ma'e rehe nehe,

Ta'e heamutar katu pe ne xe.

Hepyro pe nehe neze'eg awer rupi katete nehe.

14 Hemukàzym kar zo pe to'om pupe nehe.

Hepyro pe heàmàtyry'ymar wanuwi nehe.

Hemunyryk kar pe màno haw 'y typya'u ma'e zàwenugar wi nehe.

15 Hereraha kar zo pe ykotok pe nehe.

Hemukàzym kar zo pe 'y typya'u ma'e pupe nehe.

Tuwe tywypaw nahemukun kwaw nehe.

16 O Tupàn Tuweharupi Wiko Ma'e. Ewazar heze'eg ihewe nehe, ta'e nekatu ne xe, ta'e erepuruamutar katu ne xe.

Hepytywà pe nehe, ta'e nepurupuhareko haw uhua'u a'e xe.

17 Ezeàmim zo neremiruze'eg wi nehe, ihewi nehe.

Ewazar heze'eg ihewe kury, ta'e apuraraw ma'erahy tetea'u ihe kury xe.

18 Ezur hepyro pà nehe.

Hepyro heàmàtyry'ymar wanuwi nehe.

19 Erexak heàmàtyry'ymar wanereko paw rupi ne wà.

Erekwaw herehe waze'eg zemueteahy awer ne.

Hemaranugar awer erekwaw. Erekwaw ma'e ikàg 'ym ma'e ài hereko awer no.

20 Herehe waze'eg zemueteahy awer upei'ài'àg hepy'a a'e.

Nàro kwaw hepyro àwàm kury.

— Aze ru'u amo hepuhareko putar wà nehe, a'e wanupe. Àro e hepuhareko àwàm.

Ni amo nahepuhareko kwaw wà.

— Aze ru'u amo hemurywete kar putar wà wà nehe, a'e wanupe. Àro e hemurywete kar àwàm.

Ni amo nuhem kwaw heruwake wà.

21 Hema'uhez mehe umur puruzuka haw ihewe heremi'u romo wà.

Heiwez mehe umur win hazahy ma'e ihewe wà.

22 Tuwe wamai'u hawhu umuaiw waneko haw nehe.

Tuwe tupàn a'ua'u wamuwete haw rehe wanurywete haw umumaw wà nehe.

23 Emuigo kar hehàpyhà 'ym ma'e romo ne wà nehe.

Ezo'ok wakàgaw paw wanuwi nehe no.

24 Ezakook nekwahy haw wanehe 'y ài nehe.

Tuwe nekwahy haw uhem wanupe tata ài nehe.

25 Tuwe wanemiruze'eg zauxiapekwer waneko haw uzeapo teko heta 'ymaw romo nehe.

Tuwe naheta kwaw ni pitài zauxiapekwer wikuwe ma'e wanàpuzràn pupe wà nehe.

26 Erezepyk amo teko wanehe. A'e zauxiapekwer oho a'e teko wanaikweromo wà.

Erekutuk amo teko ne wà. A'e zauxiapekwer uze'eg urywahyahy neremikutuk kwer wanehe wà.

27 Uzapo ikatu 'ym ma'e wà. A'e rupi ezepyk wanehe nehe.

Epyro zo ne wà nehe.

28 Emunàn kar waner pape wikuwe ma'e waner hereko har wi ne wà nehe.

Emuapyk kar zo waner pape teko ikatu ma'e waner hereko har rehe ne wà nehe.

29 Apuraraw ma'erahy iteko. Nàro kwaw hepyro haw.

O Tupàn, hemupu'àm pe nehe. Hepyro pe nehe.

30 Amume'u putar Tupàn ikatu haw amo zegar haw imuzàg pà nehe.

Amume'u putar uhua'u haw nehe, ta'e ikatuahy ihewe xe.

31 Nezewe haw ikatu wera'u putar Tupàn Tuweharupi Wiko Ma'e pe nehe,

Henataromo tapi'ak awa tua'u ma'e izuka haw wi nehe.

32 Aze ma'erahy ipuraraw par wexak a'e ma'e wà nehe, hurywete putar wà nehe.

Tupàn imuwete katu har hurywete putar wà nehe.

33 Ta'e Tupàn Tuweharupi Wiko Ma'e wenu ma'e hereko 'ymar a'e wà xe.

— Napupytywà kwaw nehe, ni'i kwaw zemunehew paw pe imunehew pyrer wanupe.

34 Pemume'u Tupàn ikatu haw nehe, o ywak, o ywy, o yryhu.

O ywak rehe har paw wà, o ywy rehe har paw wà, o yryhu pupe har wà.

35 Upyro putar Tupàn Zeruzarez tawhu nehe.

Umupu'àm kar wi tawhu Zuta ywy rehe arer wà nehe no.

Hemiaihu wikuwe putar a'e pe wà nehe. Wiko putar ywy imume'u pyrer izar romo wà nehe.

36 Tupàn hemiruze'eg wazuapyapyr wiko putar ko ywy izar romo wà nehe.

Iamutar katu har wikuwe putar hehe nehe.