1 Tupàn upu'àm wàmàtyry'ymar wamuhàmuhàz pà a'e.

Hehe iakatuwawahy 'ym ma'e uzàn henatar wi wà.

Tupàn weityk a'e wà.

2 Umuhàmuhàz tàtàxiner ài wà. Ukàzym tàtàxiner ywytu rehe.

Iraity typyràn tata huwake a'e.

Nezewegatete ikatu 'ym ma'e upaw Tupàn henataromo wà.

3 Ikatu ma'e hurywete wà. Hurywete henataromo wiko mehe wà.

Umuzàg zegar haw wà, ta'e tynehem turywete haw pupe wà xe.

4 Pezegar Tupàn pe ikatu haw imume'u pà nehe.

Pemume'u her ikatu haw pezegar pà nehe.

Pemukatu ywàkun ikupe pe ur ma'e ràm hape ràm nehe.

Tupàn Tuweharupi Wiko Ma'e her romo a'e. Penurywete henataromo peneko mehe nehe.

5 Tupàn a'e, tàpuzuhu imonokatu pyrer pupe wikuwe ma'e a'e, uzekaiw tu 'ym ma'e ihy 'ym ma'e wanehe a'e.

Upyro kuzà imen umàno ma'e a'e wà no.

6 Omono waneko àwàm heko haw 'ym ma'e wanupe no.

Umuhem kar imunehew pyrer wà.

A'e rupi wiko katu urywete haw rupi wà.

Tuwihawete romo heko haw iputar 'ymar wà nehe, wiko putar ywyxiguhu rehe wà nehe.

7 O Tupàn, neremiaihu waneraha mehe,

Ywyxiguhu rehe neata mehe,

8 Ywy uryryryryz a'e.

Ywak uzakook àmàn a'e no,

Ta'e ne Tupàn Xinaz rehe har ne xe, Izaew wazar ne xe, erezur a'e pe ne xe.

9 Eremugyr kar àmàn tetea'u ne.

Eremupyahu kar neywy ikatu 'ym ma'e no.

10 Neremiaihu uzapo weko haw ko ywy rehe wà.

Erezekaiw katu ma'e hereko 'ymar wanehe nekatu haw rupi.

11 Eremume'u neremimutar purupe a'e 'ar mehe.

A'e rupi kuzà tetea'u weraha ko neze'eg teko wanupe a'e wà.

12 — Tuwihawete a'e wà, wanemiruze'eg zauxiapekwer a'e wà no, uzàn oho waiko wà kury, i'i wà.

Wàpuz me kuzà uzaikaikaw ma'e wàmàtyry'ymar wanuwi ipyro pyrer wà.

13 A'e kuzà nuzawy kwaw pykahu parat pupe iwàiwàn pyrer wà, pykahu pepo or ikatu ma'e ài heny katu ma'e hereko har wà.

Màràzàwe tuwe amo zauxiapekwer upyta àràpuhàràn hawitu ma'e wamono'ogaw pupe wà,

Zeàmàtyry'ymawhu 'ar mehe wà.

14 Tupàn Ikàg Wera'u Ma'e umuhàmuhàz tuwihawete wamono a'e wà.

A'e 'ar mehe ukyr àmàn huwixàgatu ma'e xig ma'e ywytyr Xaramon her ma'e rehe.

15 Aiha katu ywytyr Màxà her ma'e.

Heta tetea'u iapyr izupe.

16 Apuranu a'e ywytyruhu wanehe. — Màràzàwe tuwe peme'e ywytyr rehe, Tupàn weko àwàm romo hemixak kwer rehe.

Penewyrowyro hexak mehe nehe, a'e wanupe.

Tupàn Tuweharupi Wiko Ma'e wiko putar a'e pe tuweharupi nehe.

17 Tupàn Zanezar ur Xiàw ywytyr wi weko àwàm imonokatu pyrer pe a'e,

Ywyramawa zeàmàtyry'ymaw rehe har tetea'u wainuinuromo a'e.

18 Uzeupir ywate wera'u har pe.

Weraha teko wemipyhyk kwer tetea'u uzeupi uzeupir mehe wà.

Te awa Tupàn heruzar 'ymar weraha ma'e imono pyràm izupe wà.

Tupàn Tuweharupi Wiko Ma'e wiko putar a'e pe nehe.

19 Tuwe teko umume'u zanezar ikatu haw wà nehe.

Tuweharupi weraha ipuhuz katu ma'e zanekupe pe har zanerekuzaromo a'e.

Tupàn wiko zanepyro har romo a'e.

20 Zanezar wiko Tupàn purupyro ma'e romo.

Wiko Tuweharupi Wiko Ma'e romo, zanezar romo hekon.

Zanepyro zanemàno haw wi.

21 Upemok putar wàmàtyry'ymar waàkàg a'e wà nehe,

Ikatu 'ygwer inuromo heko wiwi wer ma'e waàkàg a'e wà nehe.

22 Tupàn Zanezar uze'eg nezewe zanewe.

— Amuzewyr kar putar peàmàtyry'ymar Màxà ywytyr wi ihe wà nehe.

Ywy yryhu iwyr har wi amuzewyr kar putar wamuwà ihe wà nehe.

23 Nezewe mehe pezahak putar wanuwykwer pupe nehe.

Zawar peneimaw upuner wanuwykwer i'u haw rehe wemimutar rupi katu wà nehe no, i'i Tupàn.

24 O hezar heruwihawete, teko paw wexak neàmàtyry'ymar wanerur haw rehe neata haw wà.

Wexak neràpuzuhu pupe neixe haw wà no.

25 Uzegar ma'e ràgypy oho wà. Xi'àm ipy har wà, uzegar ma'e wà no, oho wanaikweromo wà.

Kuzàtàigwer upyta wamyter pe ipu ma'e ipew ma'e imupumupu pà wà.

26 Pemume'u Tupàn ikatu haw hemiaihu wainuromo nehe, wazemono'og mehe nehe.

Pe Izaew izuapyapyr paw wà, pemume'u Tupàn Tuweharupi Wiko Ma'e ikatu haw nehe.

27 Mezàmi izuapyapyr ràgypy ur wà.

Pixika'i wera'i amo Izaew ta'yr wazuapyapyr imono'og pyrer wanuwi a'e. Na'e ur Zuta izuapyapyr wanuwihaw wà, wemiaihu wanerur pà wà.

A'e re ur Zemurom wanuwihaw Napitari wanuwihaw wanehe we wà.

28 Exak kar nepuner haw nehe, o Tupàn.

Erezapo ikatu ma'e urewe a'e nepuner haw rupi.

29 Zeruzarez pe, neràpuzuhu pupe,

Tuwihawete werur ma'e newe wà.

30 A'e pe neapyk mehe emume'u Ezit ywy imumaw pàwàm nehe. Nuzawy kwaw zàwàruhu takwar inuromo har.

O Tupàn, emume'u amogwer ywy wamumaw pàwàm nehe.

Nuzawy kwaw tapi'ak awa tetea'u wana'yr wainuromo har wà.

Neze'eg henu mehe uzeamumew putar nerenataromo wà nehe. Werur putar parat tetea'u newe wà nehe.

Emuhàmuhàz teko zeàmàtyry'ymawhu iputar har ne wà nehe.

31 Tuwihawete ze'eg herur har ur putar Ezit ywy wi wà nehe.

Exio ywy rehe har ur putar opo hupir pà a'e wà nehe no. Uze'eg putar newe wà nehe, o Tupàn.

32 Pemuzàg zegar haw Tupàn pe nehe, teko ywy nànànar wà.

Pezegar zanezar ikatu haw imume'u pà nehe.

33 Pemume'u ikatu haw nehe, kawaru ku'az har ywak rehe har, ywak kwehe arer rehe har.

Pezeapyaka katu zanezar ize'eg mehe nehe. Ikàg ize'eg.

34 Pemume'u Tupàn ipuner haw nehe.

Ikàgaw ipuràg eteahy haw Izaew wanehe tuz.

Ikàgaw ywak rehe hin.

35 Ikatuahy Tupàn henaw pe heko haw.

Tupàn Izaew wazar omono ukàgaw wemiaihu wanupe.

Tupàn ikatu haw pemume'u nehe.