1 O Tupàn, màràzàwe tuwe eretyryk tuwe urewi.

Màràzàwe tuwe erekwahy àràpuhàràn neremimono'og zàwenugar wanupe.

2 Nema'enukwaw katu neremiaihu wanehe nehe.

Kwehe mehe erexarexak neremiruze'eg romo ne wà.

Erepyro amo wanupe uma'ereko e ma'e romo waneko haw wi wà, neremiaihu romo wamuigo kar pà ne wà.

Nema'enukwaw Xiàw ywytyr rehe nereko awer rehe ne.

3 Ezur 'aw ma'e imuaiw pyrer tetea'u rehe neata pà nehe.

Ureàmàtyry'ymar umumaw ma'e neràpuzuhu pupe har paw wà.

4 Neàmàtyry'ymar uhapukaz urywete haw rupi neràpuzuhu pupe wà.

Umupu'àm pàn uwer hereko har a'e pe wà, tàpuzuhu izar romo weko haw hexak kar pà purupe wà.

5 Nuzawy kwaw zepe'aw imono'ogar wà.

Nuzawy kwaw ywyra itazy pupe imonohonohokar wà no.

6 Umumaw ma'e ywyra iapo pyrer ipuràg eteahy ma'e

A'e pe har paw rupi wà.

7 Weityk neràpuzuhu tata imunyk pà hehe wà.

Umuaiw nerenaw nemuwete katu haw wà.

8 — Xiuhauhaw xe har paw rupi zane wà nehe, i'i uzeupeupe wà. Uzuhazuhaw wà.

Umunyk tata nemuwete haw Izaew ywy rehe har nànàn wà.

9 Ureràro ma'e purumupytuhegatu kar haw ure. Ni amo nuzapo kwaw urewe wà.

Naheta kwaw Tupàn ze'eg imume'u har ko 'ar rehe wà.

Màràn kwarahy urumumaw putar nezewe ure nehe. Ni amo nukwaw kwaw wà.

10 O Tupàn. Màràn mehe ureàmàtyry'ymar upytu'u putar urerehe uze'eg urywahyahy re wà nehe.

Aipo uze'eg zemueteahy putar nerehe tuweharupi upytu'u 'ym pà wà nehe.

11 Màràzàwe tuwe nanepurupytywà wer kwaw urerehe ne.

Màràzàwe tuwe erepyta ma'e iapo 'ym pà.

12 Ne Tupàn, ereiko ureruwihawete romo izypy mehe arer we te ko 'ar rehe ne.

Urepytywà pe tetea'u ureàmàtyry'ymar waneityk mehe ne.

13 Nekàgaw uhua'u ma'e rupi eremuza'aza'ak yryhu.

Erezuhaw miar uhua'u ma'e yryhu pupe har waàkàg ikamikamik pà ne wà.

14 Erekamikamik àzàg Erewiàtà her ma'e iàkàg ne wà no.

Eremono hetekwer miar ywyxiguhu rehe har wanupe wanemi'u romo.

15 Erewàpytymawok ytyzuzàmaw ne wà. Eremuyryk kar yrykaw ne wà no.

Yrykawhu eremuxinig kar ne wà no.

16 Erezapo 'ar. Erezapo pytunaw no.

Eremono kwarahy henaw rehe. Zahytata eremono wanenaw pe wà no.

17 Erezapo ywy iahykaw.

Eremugyr kar àmàn. Eremuhyape katu kar kwarahy no.

18 O Tupàn Tuweharupi Wiko Ma'e, nema'enukwaw katu neàmàtyry'ymar nerehe uze'eg urywahyahy mehe ne wà nehe. Nuzeruzar kwaw nerehe wà.

Uze'eg zemueteahy nerer rehe wà. Nema'enukwaw wanemiapo kwer rehe nehe.

19 Imunar neremiaihu wama'e rehe wà. Emono zo neremiaihu a'e teko wanupe ne wà nehe.

Upuraraw kar ma'erahy neremiaihu wanupe wà. Nereharaz zo neremiaihu ipetepetek pyrer wanuwi nehe.

20 Nema'enukwaw neze'egaw neremiapo katu kwer rehe nehe,

Ta'e heta puruzuka haw ko ywy nàn a'e xe.

21 Tuwe ikatu 'ym ma'e numuigo kar kwaw neremiaihu ma'e hereko 'ymar romo wà nehe. Upuraraw kar ma'erahy waiko neremiaihu wanupe wà.

Hemetarer 'ym ma'e wà nehe, ma'e hereko 'ymar wà nehe no, tuwe umume'u nekatu haw wà nehe.

22 Epu'àm, o Tupàn. Epyro nerer nehe, ikatu 'ym ma'e wanuwi nehe. Eityk neàmàtyry'ymar ne wà nehe.

Teko ma'e kwaw par 'ym uze'eg urywahyahy nerehe 'ar nànàgatu wà. Nema'enukwaw waze'eg rehe.

23 Nereharaz zo neàmàtyry'ymar wanehapukaz taw wi nehe. Heiheihem tuweharupi wekwahy haw rupi wà.

Nereharaz zo waneiheihemaw wi nehe. Einu ne wà nehe.