1 Teko Zuta ywy rehe har ukwaw katu Tupàn wà.

Izaew ywy rehe har ukwaw katu her wà.

2 Hàpuz Zeruzarez pe hin.

Wiko Xiàw ywytyr rehe.

3 Tupàn uzuhazuhaw wàmàtyry'ymar wapuruzuka haw paw a'e pe a'e:

U'yw wà, u'yw wi purumimaw wà, takihepuku wà.

4 Nekàgatu tuwe nereiny romo, o Tupàn.

Nekatuahy tuwe ywytyruhu wi nezewyr mehe.

Ereityk neàmàtyry'ymar a'e ywytyruhu rehe ne wà.

5 Ereraha kar a'e zauxiapekwer ipuruzukaiw ma'e wama'e paw ne.

Uker waiko umàno ma'e kwer waker haw rehe a'e wà kury,

Ta'e nupuner kwaw uzepyro haw rehe wà xe.

6 O Tupàn Zako izar, wanehe nezepyk mehe kawaru a'e wà,

Kawaru ku'az har a'e wà no, wiko umàno ma'e kwer ài wà.

7 Teko upaw rupi katete ukyze newi wà.

Ni amo nupuner kwaw nerenataromo weko haw rehe nekwahy mehe wà.

8 Ywak rehe nereko mehe erekwaw kar ikatu 'ym ma'e wanehe nezepyk àwàm purupe ne.

Ywy rehe har ukyze wà, uze'eg 'ym pà wà.

9 Erepu'àm teko ikatu 'ym ma'e wanehe nezepyk pà,

Ma'erahy ipuraraw par ywy rehe har paw wapyro pà.

10 Te teko wakwahy haw umuhua'u kar nekatu haw rehe ze'egaw no.

Teko zeàmàtyry'ymawhu pe umàno 'ym ma'e uzapo putar mynykawhu neze'eg rupi wà nehe.

11 Pemono penemimume'u kwer Tupàn Tuweharupi Wiko Ma'e Zanezar pe nehe.

Tuwe teko ko ywy huwake har paw weraha izupe imono pyr wà nehe.

Tuwe omono Tupàn pe wà nehe. Tuwe ukyze izuwi wà nehe no.

12 Tuwihaw amo wanuwi wiko wera'u ma'e a'e wà, Tupàn umuigo kar ma'e hereko 'ymar romo a'e wà.

Umukyze kar tuwe ywy rehe har wanuwihawete wà no.