1 O Tupàn, nerehe uzeruzar 'ym ma'e wixe neywy rehe wà.

Umuaiw neràpuzuhu imonokatu pyrer wà no.

Weityk tàpuz Zeruzarez pe har paw wà no.

2 Weityk neremiruze'eg wanetekwer ywy rehe wà.

Weityk newi upuir pixik 'ym ma'e wà, wiràmiri wanemi'u ràm romo wà.

Omono miar hehaite ma'e wanupe wanemi'u ràm romo wà no.

3 Uzakook neremiaihu wanuwykwer ywy rehe 'y ài wà.

Uwyryk wanuwykwer 'y ài Zeruzarez tawhu nàn.

Ni pitài nuikuwe kwaw amogwer wanetekwer watym àràm romo wà.

4 Ywy ko ywy huwake har rehe har uze'eg zemueteahy urerehe wà.

Upuka urerehe uze'eg urywahyahy pà wà.

5 O Tupàn Tuweharupi Wiko Ma'e, màràn kwarahy eremumaw putar urewe nekwahy pà nehe.

Aipo nerepytu'u pixik kwaw nehe.

Aipo nekwahy haw ukaz wiwi putar tata ài nehe.

6 O Tupàn, eikwahy teko amo ywy rehe har nemuwete katu 'ym ma'e wanupe nehe.

Eikwahy nereityk àràm wanupe nehe.

7 Ta'e uzuka ureànàm a'e wà xe.

Umuaiw ureywy wà no.

8 Ezepyk zo urerehe ureipy wanemiapo kwer hekuzaromo nehe.

Urepuhareko pe nehe kury,

Ta'e uruzemumikahy tuwe urepyro haw hàro 'ym pà ure xe.

9 Urepytywà pe nehe, o Tupàn urepyro har.

Aze na'urepyro kwaw pe nehe,

Aze neremunàn kwaw ureremiapo kwer ikatu 'ym ma'e nehe, teko uze'eg zemueteahy putar nerehe wà nehe.

10 — Ma'e pe hekon Tupàn pezar a'e, i'i putar amogwer ywy rehe har urewe wà nehe.

Màràzàwe tuwe erepuranu kar amogwer ywy rehe har urerehe nezewe wà.

O Tupàn tuwe uruexak wanehe nezepyk àwàm nehe,

Ta'e uzakook neremiruze'eg wanuwykwer a'e wà xe.

11 Einu zemunehew paw pe har wakuhem mehe ne wà nehe.

Nepuner haw uhua'u ma'e rupi

Epyro ureàmàtyry'ymar wanemizuka ràm ne wà nehe no.

12 O hezar, ezepyk amogwer ywy rehe har wanehe 7 haw nehe.

Aze uzapo ikatu 'ym ma'e newe pitài haw wà nehe, ezepyk wanehe 7 haw nehe.

13 Na'e ure neremiaihu romo wiko ma'e ure,

Àràpuhàràn zàwenugar neremimono'og ure, ure nehe,

Urezuapyapyr a'e wà nehe no,

Urumume'u putar nekatu haw tuweharupi ure nehe.

Nekatu haw rehe zegar haw urumuzàg putar newe ure nehe no.