1 Urereinu pe nehe,

Izaew wanupe àràpuhàràn wamono'ogar zàwenugar.

Ezeapyaka katu urerehe nehe, urerehe uzekaiw ma'e àràpuhàràn wanehe uzekaiw ma'e zàwenugar.

Ne nerenawhu rehe wapyk ma'e ne, nerenawhu kerumin wa'aromo hin ma'e rehe har ne,

2 Exak kar Eparai izuapyapyr wamutar katu haw purupe nehe.

Exak kar Mezàmi izuapyapyr wamutar katu haw purupe nehe no. Exak kar Manaxe izuapyapyr wamutar katu haw purupe nehe no.

Exak kar nepuner haw urewe nehe.

Ezur urepyro pà nehe.

3 Uremuigo kar wi pe temi'u hereko har romo ma'e hereko har romo nehe, o Tupàn.

Exak kar nepurupuhareko katu haw urewe nehe. Nezewe mehe urepyro putar pe nehe.

4 Màràn kwarahy eremumaw putar neremiaihu waze'eg rehe nekwahy pà nehe,

O Tupàn Tuweharupi Wiko Ma'e Ikàg Wera'u Ma'e.

5 Eremur tehaykwer typy'ak romo iapo pyrer urewe ureremi'u romo ne.

Eremynehem kanek tehaykwer pupe i'u kar pà urewe no.

6 — Pezeàmàtyry'ym Izaew waywy rehe nehe, ere ureywy huwake har wanupe.

Eremuze'eg kar urywahyahy urerehe ne wà no.

7 Uremuigo kar wi temi'u hereko har romo ma'e hereko har romo nehe, o Tupàn Ikàg Wera'u Ma'e.

Exak kar nepurupuhareko katu haw urewe nehe. Nezewe mehe urepyro putar pe nehe.

8 Teko Izaew izuapyapyr wà, nuzawy kwaw ma'e'yw uwà'yw her ma'e wà.

Ererur i'yw Ezit ywy wi ne.

Eremuhem kar amogwer teko ko ywy wi ne wà. Erezutym uwà'yw waywy rehe.

9 Eremukatu ywy izupe.

Hapo wixe ywy pupe.

Uhàuhàz hapo ywy rehe.

10 Upyk ywytyr u'àg pupe.

Hàkàgwer aiha wera'u ywyràkàxigyw aiha wera'u ma'e wi a'e.

11 Omono kar wàkàgwer yryhu Mezitehàn her ma'e pe no,

Yrykawhu Ewparat pe no.

12 Màràzàwe tuwe ereityk pari i'yw izywyr har.

Ko 'ar rehe pe rupi wata ma'e upuner uwà rehe imunar haw rehe wà kury.

13 Tazahu ka'a pe har upyropyrog i'yw rehe imumaw pà wà.

Miar hehaite ma'e u'u paw rupi wà.

14 Ezewyr urewe nehe, Tupàn Ikàg Wera'u Ma'e.

Ywak rehe nereko mehe eme'e urerehe nehe.

Ezur ma'ywa'yw uwà'yw her ma'e ipyro pà nehe, neremiaihu wapyro pà nehe.

15 Ne ae erezutym a'e uwà'yw ne.

Epyro ezuwà nehe. Eremuezuz katu tuwe i'yw.

Ezur ipyro pà nehe.

16 Ureàmàtyry'ymar omonohok hapy pà tata pupe wà.

Nekwahy haw rupi eme'e a'e teko wanehe wamumaw pà nehe.

17 Ezekaiw katu teko neremixamixak kwer wanehe nehe.

Epyro a'e teko neremimueta tetea'u kwer ne wà nehe no.

18 Nurutyryk wi kwaw newi nehe.

Uremuigo katu kar pe nehe. Nezewe mehe urumume'u putar nekatu haw ure nehe.

19 Uremuigo kar wi pe temi'u hereko har romo ma'e hereko har romo nehe, o Tupàn Tuweharupi Wiko Ma'e, Ikàg Wera'u Ma'e.

Exak kar nepuruamutar katu haw urewe nehe, urepyro pà nehe.