1 Pezegar penurywete haw rupi Tupàn zanepyro har pe nehe.

Pemuzàg ikatu haw rehe zegar haw Zako izar pe nehe.

2 Pezypyrog zegar haw imuzàg pà nehe. Pemupumupu ipu ma'e ipew ma'e nehe no.

Pemupu wioràwiràn zegar haw hurywete ma'e rehe pezegar pà nehe.

Wioràwiràn pixika'i ma'e pemupu zegar haw imuzàg pà penurywete haw rupi nehe.

3 Pezupy ma'e'ak kwer xi'àm romo iapo pyrer mynykaw pe teko wamono'og pà nehe.

Zahy ipyahu mehe pezupy nehe. Zahy huahu mehe pezupy nehe no.

4 Tupàn uzapo kar ko ma'e Izaew wanupe.

Zako izar umume'u ko ma'e iapo àwàm peme a'e.

5 Umur ko ze'eg teko Izaew izuapyapyr wanupe a'e,

Ezit ywy rehe har waàmàtyry'ym mehe a'e.

Aenu amo heremigwaw 'ym ize'eg mehe ihe.

6 Nezewe i'i a'e 'ar mehe a'e.

— Azo'ok penemiraha ipuhuz katu ma'e pekupe wi ihe. Kok ywy imuàtà pyrer pupe tynehem ma'e peraha peiko a'e mehe.

Apupyro a'e ma'e penemiupir wi ihe.

7 Ma'erahy ipuraraw mehe herenoz pe pe.

Ihe apupyro ihe.

Ywytuaiw pupe hezeàmimaw pe hereko mehe

Awazar peze'eg peme.

Apuagaw ytyzuzàmaw Merima her ma'e pe ihe.

8 Heremiaihu wà, pezeapyaka katu heze'eg rehe nehe.

O Izaew wà, aze mo herenu pe, herurywete mo ihe.

9 Peiko pixik zo amo tupàn ua'u imuwete har romo nehe.

Pemuwete katu zo amo nehe. Xo ihe zo hemuwete katu pe nehe.

10 Aiko Tuweharupi Wiko Ma'e pezar romo ihe.

Apupyro Ezit ywy wi ihe.

Pezurupeka nehe, amono putar penemi'u ràm peme nehe.

11 — Nezewe rehe we heremiaihu na'ipurenu wer kwaw herehe wà.

Izaew izuapyapyr nahereruzar kwaw wà.

12 A'e rupi amuata kar wi wanape rupi hereruzar katu 'ymaw rehe ihe wà.

Azapo kar wanemimutar wanupe.

13 Aze mo heremiaihu herenu wà, ikatu mo ihewe.

Aze mo Izaew izuapyapyr hereruzar wà, herurywete mo ihe.

14 Aityk mo waàmàtyry'ymar na'arewahy ihe wà.

Azepyk mo wakutyr ur ma'e wanehe paw rupi ihe wà no.

15 Herehe iakatuwawahy 'ym ma'e uzeamumew mo herenataromo wà, ta'e aiko wazar romo ihe xe.

Wanehe hezepykaw nupaw pixik kwaw nehe.

16 Amono mo arozràn ikatu wera'u ma'e peme ihe.

A'u kar mo hàir kaiwer parer pupe.

Te uhyk mo peme, i'i Tupàn.