1 O Tupàn Tuweharupi Wiko Ma'e. Neremimur kwer ikatu haw imume'u haw ikatuahy urewe.

Zegar haw nekatu haw rehe har imuzàgaw ikatuahy urewe no, o Ywate Wera'u Har.

2 Ku'em mehe nepuruamutar haw imume'u haw ikatuahy urewe.

Pyhaw puruwi netyryk 'ymaw imume'u haw ikatuahy urewe no.

3 Urumupu urewioràwiràn 10 ihàm hereko har newe urezegar mehe.

Urumupu urewioràwiràn irir her ma'e zegar haw newe imuzàg mehe no.

4 O Tupàn Tuweharupi Wiko Ma'e. Neremiapo ikàg ma'e hemurywete kar a'e.

Azegar herurywete haw rupi neremiapo kwer rehe no.

5 Azeharomoete erezapo uhua'u ma'e ne wà, o Tupàn Tuweharupi Wiko Ma'e.

Zawaiw katu tuwe nema'enukwaw paw ikwaw paw urewe.

6 Na'aw amo ma'e iranaiw ma'e hemigwaw 'ym xe a'e.

Ma'e kwaw par 'ym nupuner kwaw ko ma'e ikwaw paw rehe a'e wà.

7 Ikatu 'ym ma'e iapo har hezuz ka'a ài wà.

Iaiw ma'e upuner hemetarer katu haw rehe wà.

Nezewe rehe we eremumaw putar ne wà nehe.

8 Ne, Tupàn Tuweharupi Wiko Ma'e, ne, ereiko amo wa'aromo tuweharupi upaw rupi ne. Ereiko ma'e wa'aromo upaw rupi ne no.

9 Neàmàtyry'ymar umàno putar wà nehe. Urukwaw wamàno àwàm ure.

Ereityk putar ikatu 'ym ma'e paw rupi ne wà nehe.

10 Hemukàg kar pe tapi'ak awa hehaite ma'e ài hemuigo kar pà ne.

Eremur neze'egatu herehe hemurywete kar pà no.

11 Aexak heàmàtyry'ymar waneityk awer ihe.

Aenu ikatu 'ym ma'e wanehapukaz mehe ihe wà no.

12 Teko nemuwete katu har iputyr putar inàzàràn 'yw ài wà nehe.

Iaiha putar ywyràkàxigyw Irimano ywytyr rehe har ài wà nehe.

13 Nuzawy kwaw ma'e'yw Tupàn Tuweharupi Wiko Ma'e heko haw pe itym pyrer wà.

Iputyr ywy zanezar hàpuzuhu huwake har rehe wà.

14 Utua'uhez mehe i'a wi wi putar wà nehe.

Tuweharupi ikàg putar wà nehe. Tynehem putar ukàgaw pupe wà nehe.

15 Ipurumume'u wer putar Tupàn Tuweharupi Wiko Ma'e ikatuahy haw rehe wà nehe. Tupàn wiko itahu zàwenugar heàmàtyry'ymar wanuwi hemimar romo a'e.

Nuiko pixik kwaw ikatu 'ym ma'e romo.