1 Aze amo wekar weko katu haw Tupàn Ywate Wera'u Har inuromo nehe, aze uzeàmim Tupàn Ikàg

Wera'u Ma'e i'àg purumim ma'e iwy pe nehe,

2 A'e teko upuner nezewe u'e haw rehe Tupàn Tuweharupi Wiko Ma'e pe nehe, — Ereiko herehe uzekaiw ma'e romo ne.

Hepyro har romo ereiko no.

Ereiko hezar romo ne. Azeruzar nerehe ihe, i'i putar izupe nehe.

3 Tupàn nepyro putar ma'erahy newe uzeapo ma'e ràm uzeàmim ma'e kwer wi nehe.

Uzekaiw putar nerehe ma'eahy haw puruzuka ma'e wi nepyro pà nehe.

4 Nepyk putar upepo pupe nehe.

Ipepo iwype nuzeapo kwaw ikatu 'ym ma'e newe nehe.

Tupàn puruwi utyryk 'ymaw nerehe uzekaiw putar nehe. Nepyro putar ikatu 'ym ma'e wi u'yw wi purumimaw ài nehe.

5 Nerekyze kwaw ma'erahy pyhaw har wi nezuka haw pyhaw har wi nehe.

Nerekyze kwaw nezuka haw nerehe imunar haw 'aromo har wi nehe no.

6 Nerekyze kwaw ma'eahy haw ipytunaw rehe uhàz ma'e wanuwi nehe.

Nerekyze kwaw puruzuka ma'e kwarahy wapyter pe hin mehe har wanuwi nehe no.

7 Aze uzuka 1.000 teko neruwake har wà nehe,

Aze uzuka 10000 neywyr har wà nehe,

Nezewe rehe we nuzeapo kwaw ikatu 'ym ma'e newe nehe.

8 Ereme'e putar nehe.

Erexak putar ikatu 'ym ma'e wanehe izepykaw nehe.

9 — Eiko herehe uzekaiw ma'e romo nehe, ere Tupàn Tuweharupi Wiko Ma'e pe.

— Eiko hepyro har romo nehe, ere Ywate Wera'u Har pe.

10 A'e rupi ni amo ikatu 'ym ma'e nanekutuk kwaw nehe.

Ni amo ikatu 'ymaw nuhem kwaw neràpuz huwake nehe.

11 Tupàn umuzekaiw kar putar weko haw pe har nerehe a'e wà nehe.

Ne'ar nànàn nepyro putar nezuka haw wi wà nehe.

12 Nepyhyk putar nepo rehe wà nehe.

Nezewe mehe ni nepy nuzemuahy kar kwaw ita rehe nehe.

13 Nepy pupe erezuhazuhaw putar zàwàruhu iriàw ne wà nehe.

Erepyrog putar moz wanehe nehe no, zàwàruhu iriàw ipuruzukaiw ma'e wazuka pà nehe, mozaiw puruzuka ma'e wazuka pà nehe no.

14 Nezewe uze'eg Tupàn. — Apyro putar heamutar katu har ihe wà nehe.

Azekaiw putar Tupàn Tuweharupi Wiko Ma'e romo hereko haw ikwaw par wanehe ihe nehe no.

15 Herenoz putar wà nehe. Awazar putar waze'eg wanupe nehe.

Aiko putar wanehe we ma'erahy ipuraraw mehe nehe.

Apyro putar ihe wà nehe. Amuawate kar putar amogwer teko wanupe ihe wà nehe no.

16 Amono putar waneko haw ipukua'u ma'e wanupe wanemiapo kwer hekuzaromo nehe.

Aexak kar putar wapyro har romo hereko haw wanupe nehe no, i'i Tupàn.