1 Pemuzàg zegar haw ipyahu ma'e Tupàn Tuweharupi Wiko Ma'e pe nehe.

Pezegar Tuweharupi Wiko Ma'e pe nehe, teko ywy nànànar wà.

2 Pezegar Tuweharupi Wiko Ma'e pe nehe. Pemume'u her ikatu haw nehe.

Tuweharupi pemume'u zanepyro awer nehe.

3 Peze'eg ikàgaw rehe ipuràg eteahy haw rehe ywy nànànar wanupe nehe.

Pemume'u hemiapo kwer ikatuahy ma'e teko paw wanupe nehe.

4 Uhua'u Tupàn Tuweharupi Wiko Ma'e a'e. A'e rupi ximume'u ikatu haw nehe.

Tuwe teko ukyze wera'u izuwi amogwer tupàn wanuwi upaw rupi wà nehe,

5 Ta'e amo ywy rehe har umuwete ywyra tupàn a'ua'u romo iapo pyrer a'e wà xe.

Tupàn Tuweharupi Wiko Ma'e uzapo ywak a'e. Tupànete romo hekon a'e.

6 Ikàgaw ipuràg eteahy haw umàmàn izywyr.

Ipuner haw ipuràg eteahy haw umynehem hàpuzuhu.

7 Pemume'u Tupàn Tuweharupi Wiko Ma'e ikatu haw nehe, teko ywy nànànar paw wà.

Pemume'u ikàgaw ipuràg eteahy haw nehe. Ipuner haw pemume'u nehe no.

8 Pemume'u ipuràg eteahy haw ikatu haw rehe we nehe.

Perur ma'e izupe imono pyràm nehe. Peixe katu ywy pehegwer hàpuzuhu huwake har pupe nehe.

9 Pezeamumew Tupàn Tuweharupi Wiko Ma'e ikatuahy ma'e henataromo nehe,

Izexak kar mehe nehe.

Peryryryryz henataromo nehe, ywy nànànar wà.

10 Pe ywy nànànar, peze'eg nezewe nehe.

— Tupàn Tuweharupi Wiko Ma'e wiko tuwihawete romo a'e.

Umuàtà ywy henaw rehe kwehe mehe.

Ni amo nupuner kwaw imunyrykaw rehe henaw wi wà.

Umume'u katu teko wanemiapo kwer ukatu haw rupi nehe, peze nehe.

11 Nerurywete nehe, ywy. Nerurywete nehe, ywak.

Ekororo nehe, yryhu. Pekororo nehe, yryhu pupe har paw wà.

12 Penurywete nehe, ywy katu paw. Penurywete nehe, ywy katu haw pe har paw wà.

A'e mehe ywyra ka'a pe har uhapukaz putar Tupàn Tuweharupi Wiko Ma'e henataromo urywete romo wà nehe,

13 Ta'e ur putar Tupàn ywy nànànar waneruze'eg pà nehe xe.

Ukatu haw rupi weruze'eg putar wà nehe.

Uzepyk putar ikatu 'ym ma'e iapo har paw wanehe nehe, wapuner haw rehe wanemetarer rehe ume'e 'ym pà nehe, ywy rehe har waneruze'eg mehe nehe.